2 CRÓNICAS 2 - Quichua Chimborazo Bible

Salomonhuan jatun mandaj Hiramhuan ari ninacushcami(1 R 5.1-18; 7.13-14)

1Salomonca Mandaj Diospaj huasitapish, pai mandashpa tiyana huasitapishmi shayachina tucurca.

2Chaita rurachingapajca, urcupi rumicunata labrachunmi 80.000 runacunatami churarca. Ashtachunca 70.000 runacunatami churarca. Chaita ruracuj runacunata mandachunca, 3.600 q'uipucunatami churarca.

3Salomonca, Tiro llajtata jatun mandaj Hiramman, huillachunca cashna nishpami cacharca: “Ñuca yaya Davidhuan rurashca shinallataj rurashun. Paimanca, pai mandashpa causana huasita shayachichunmi, cedro caspicunata cacharcangui.

4Ñucaca ñucata Mandaj Taita Diospajlla cachunmari, shuj huasita shayachisha nini. Chaipimari mishquijllata ashnaj inciensota cushpa paipaj ñaupajpi rupachisha nini. Shinallataj paipajlla ch'icanchishca tandatapishmi churasha nini. Chashnallataj samana punllacunapipish, shujtaj tucui punllacunapi tutamantapish, chishipishmi animalcunata paiman cushpa tucui rupachisha nini. Mushuj luna punllacunapipish, ñucanchijta Mandaj Taita Diosmanta yuyarina shujtaj jatun punllacunapipishmi animalcunata paiman cushpa tucui rupachisha nini. Chaicunaca israelcunapajca, huahua huahuacuna ruracunallamari.

5Paipajca shuj jatun huasitamari shayachisha nini. Ñucanchij Diosca tucui dioscunata yalli jatun Diosmi.

6Jahua pacha yallitaj jatun cashcahuanpish pai causanapajca, mana pajtaipajchu. Paipaj huasitatajcarin ¿pitaj shayachi tucungari? Ñucacarin paipaj huasita shayachingapajca, ima mana canichu. Inciensota paipaj ñaupajpi rupachingapajllami, paipaj cachun chai huasita shayachigrini.

7Ñuca yaya Davidca curimanta, cullquimanta, broncemanta, fierromanta ima charinacunata ruranatapish morado, puca, azul linsocunahuan imacunata ruranatapish yachajcunatami cai Jerusalenpipish, Judapipish ñuca maquipi saquirca. Chai runacunahuan chaicunata rurachunca chai ruranacunata alli yachaj runata cachapai.

8Shinallataj Líbano urcumantapish, cedro caspicunata, ciprés caspicunata, sándalo caspicunata cachai. Cambajta rurajcunaca, Líbano urcupi caspicunata p'itinata allimi yachancuna. Cambajta rurajcunataca, ñucapajta rurajcuna ayudagringallami.

9Chashnami Diospajca, jatun sumaj huasita ñuca shayachingapaj achca caspicunata allichingacuna.

10Caspicunata p'iticuj cambajta rurajcunamanca, 20.000 coros trigota, 20.000 coros cebadata, 20.000 bato vinota, 20.000 bato aceitetapishmi cusha” nichunmi cacharca.

11Chaita huillajpimi, Tiro llajtata jatun mandaj Hiramca, cashna quillcashpa Salomonpaj cacharca: “Mandaj Diosca pai agllashca israelcunata c'uyashcamantami cantaca paicunata jatun mandaj cachun churashca” nircami.

12Hiramca, cashnapishmi nirca: “¡Israelcunata Mandaj Taita Diosca alli nishca cachun. Paimi jahua pachatapish, cai pachatapish rurarca. Pai Mandaj Diospaj huasitapish, mandashpa tiyana huasitapish shayachichunca, paillatajmari jatun mandaj Davidmanca cashna yachaj, alli yuyaiyuj, alli umayuj yuyaisapa churita cushca!

13Cambaj ruranacunata rurachunca alli yachaj, alli yuyaiyuj Hiram-abi runatami cambaj cachani.

14Paica Dan aillupuramanta shuj huarmipaj churimi. Paipaj yayaca cai Tiro pueblomantami carca. Hiramca curimanta, cullquimanta, broncemanta, fierromanta imatapish ruranata alli yachajmi. Shinallataj rumihuanpish, caspihuanpish, morado linsohuanpish, amsa puca linsohuanpish, azul linsohuanpish, lino linsohuanpish, tucui imatapish ruranata alli yachajmi. Ima laya charinacunata sumaj ricunacunata rurachun nijpipish, paiman mingajpica rurangallami. Chai ruranacunata yachaj cambaj runacunahuanpish cambaj yaya ñuca amo David charishca yachaj runacunahuanpish chai ruranacunapi churanguilla, paica rurangallami.

15Cunanca can ñuca amitoca can cusha nishca trigotapish, cebadatapish, aceitetapish, vinotapish cambajta ruraj ñucanchijpaj cachapailla.

16Shinallataj ñucanchijca Líbano urcupica, can mashna mañashca caspicunata p'itishunllami. Chai caspicunataca balsacunapi churashpami, Jope pueblocama mama cuchapi huambuchishpa apamushun. Chaimantaca canllataj Jerusalenman ashtanguilla” nishpami, quillcashpa cachashca carca.

17Chai q'uipami Salomonca, Israel llajtapi causaj mana israelcunataca tucuicunata yupachirca. Paipaj yaya Davidpish ñami paicunataca yupachishca carca. Chai runacunaca, 153.000 runacunami tiyashca carca.

18Chai runacunamantaca, 70.000 runacunatami ashtanapi churarca. Urcupi rumicunata labrachunca, 80.000 runacunatami churarca. 3.600 runacunataca, chai runacunata ricushpa trabajachichunmi churarca.