1Mandaj Dioslla, ¿ima nishpataj ñucamanta carupi canguiyari?
Ñuca llaquihuan cai punllacunapica ¿ima nishpataj miticunguiyari?
2Millai runaca huajcha runataca, jatun tucushpa llaquichina yuyailla tucushpami llaquichin.
Huajcha runa urmachun nishpa churashca urmanapica paillatajmi urmanga.
3Millai runaca paipaj shungu munashcata rurashpami cushicun.
Yallitaj charinallata munajtami alli nin,
Mandaj Diostaca p'iñanmi.
4Uma alzashca millai runaca, Diostaca mana mashcanchu.
Paipaj yuyaipica Diosca manataj tiyashcatami yuyan.
5Paipaj tucui causaica huishtu ñan shinami.
Imalla rurashcata ricuchishpa can llaquichinapish yallitaj carupi cashcatami yuyan.
Tucui paita p'iñajcunatapish chanzatami ruran.
6Paipaj shungupica: “Ñucataca pi mana urmachingachu, ima llaquipish manataj japingachu” ninmi.
7Paica imapish tucushca canman nishcahuan, umanahuan, llullanahuan jundami.
Paipaj c'alluca rimashpa llaquichinahuan, millaita rimanahuan jundami.
8Uchilla llajtaman chayanllacunapi, paca tucushpami chapancuna.
Ima mana allita mana ruraj runatapish, pacallapi japishpami huañuchin.
Mana mitsari tucuipajtaca paipaj ñahuica chaparacunmi.
9León paipaj jutcumanta pacalla chapaj shinami chapan.
Huajcha runata japingapajmi chashna chapan.
Japishpaca paipaj linchimanmi apamun.
10Mana mitsari tucujcunaca león japigrijpi cumurishpa paipaj sinchi sillucunapi japi tucuj shinami millaipaj maquipi japi tucun.
11Millai runapaj shunguca: “Diosca cungarinllami.
Diospaj ñahuica tapashcami, nunca mana ricucunchu” ninmi.
12Jatun Mandaj Dioslla, jatariyari.
Cambaj maquita alzayari.
Huajchacunataca ama cungarichu.
13Millai runaca ¿Ima nishpataj Diostaca yangachin?
Paipaj shungupica Diostaca:
“Canca imalla rurashcata tapunataca mana charinguichu” ninmi.
14Mana allita rurajtaca, canllataj ricunguimi.
Paitapish cambaj maquihuan chai shinallataj llaquichingapajmi ricuracungui.
Mana mitsari tucujcunaca cantami mashcan.
Yaya mama illajcunamantaca Canmi shayaringui.
15Millaita rurajtaca paipaj rigratapish p'aquiyari.
Millaita rurajtaca pai rurashcacuna chingaringacama catirashpa llaquichiyari.
16Mandaj Diosca huiñaimanta huiñai huiñaita
Jatun Mandajmi.
Mandaj Diosta mana manchaj llajtacunaca Diospaj allpamantaca chingaringami.
17Mandaj Dioslla, mana jatun tucushcacuna mañashcataca uyanguimi.
Paicuna mañashcata cushpami cushichingui.
18Yaya mama illajlla huahuacunatapish, llaquita apacujcunatapish cashcata rurashpami mitsangui.
Allpamanta rurashca runacuna, ama ashtahuan llaquichishpa catichunmi chashna rurangui.
Who We AreWhat We EelieveWhat We Do
2025 by iamachristian.org,Inc All rights reserved.
