1Babilonia llajtata jatun mandaj Nabucodonosorca, ñami Joacimpaj churi, Judá llajtata jatun mandaj Coniastapish, Judá llajtata shujtaj mandajcunatapish, ima charinacunata rurajcunatapish, fierrota tacajcunatapish Jerusalenmantaca, Babilonia llajtaman prezu aparca. Chai q'uipami, Mandaj Diosca ñucamanca ishqui canasta higo paipaj huasi ñaupajpi tiyacujta ricuchirca.
2Shuj canastapica, punta p'ucushca shina sumaj higocunami tiyacurca. Caishuj canastapica, mana micui tucuipaj yallitaj ismushca higocunami tiyacurca.
3Chaita ricuchishpami Mandaj Diosca: “Jeremías, ¿imatataj ricungui?” nishpa tapujpi, ñucaca: “Higocunatami ricuni. Alli higocunaca sumaj higocunami, ismushca higocunapish mana micui tucuipaj, yallitaj ismushca higocunami” nircanimi.
4Shina nijpimi, Mandaj Diosca ñucataca cashna nirca:
5“Israelcunata Mandaj Diostajmi cashna nini: Cai Judá llajtamanta llujshichishpa, caldeocunapaj llajtaman cachashcacunataca, cai alli higocunata shina cushijlla ñahuihuanmi ricusha. Paicunapajca allita rurashami.
6Paicunapaj allita rurangapajmi, paicunapaj jahuapi ñuca ñahuita churasha. Cutintaj cai llajtaman tigrachimushpami, cutin shayachisha. Chashna shayachishcataca, cutinca manataj chingachishachu. Ñuca shayachishca yurataca, manataj cutinca sapimanta aisashachu.
7Paicunaca, tucui shunguhuanmi ñucapajman cutiringacuna. Ñucataca Mandaj Diostaj cashcata rijsichun paicunamanca alli shungutami cusha. Chashnami paicunaca ñuca runacuna canga. Ñucapish paicunapaj Diosmi casha” nircami.
8Shinallataj Mandaj Diosca cashnapishmi nirca: “Ashtahuanpish cai Judá llajtapi saquirijcunataca, cai llajtata jatun mandaj Sedequiastapish, pai churashca mandajcunatapish, Jerusalenpi causajcunapuramanta saquirishcacunatapish, Egipto llajtapi causagrijcunatapish mana micui tucuipaj cai ismushca higocunata shinamari ruragrini.
9Tucui shujtaj llajtacunapi causajcuna mancharishpa parlanacuna, c'amishpa pingachina, shujtajcunatapish paicuna shina tucushca alli cachun ninatami ruragrini. Shinallataj yuyachij shimicunata paicunamanta surcunatapishmi ruragrini. Ñuca maijan llajtaman cachajpipish, chashnami cangacuna.
10Paicunapaj ñaupa yayacunamanpish, paicunamanpish cushca cai llajtapica shujllatapish mana saquishachu. Jatun macanacuita, yaricaita, ungüita cachashpami tucui chingachisha” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
