EFESIOS 6 - Quichua Chimborazo Bible

1Huahuacuna, Mandaj Jesuspi shujlla cashcamantaca cancunapaj yaya mamata cazuichij, chashna cashpami cashcata rurajtaj cana.

2(Cazujpimi cusha nishca punta mandashcapica) “Cambaj yaya mamata alli ningui” ninmi.

3Chashna rurashpaca, tucui imapipish allimi cangui. Cai allpapipish unitami causangui.

4Shinallataj yaya mamacuna, cancunapaj huahuacunata ama p'iñachichijchu. Chaipaj randica, ima shinapish llaquichishpa, cunashpa Mandaj Jesús munashca shina huiñachichij.

5Amopajta rurajcuna, cai pachapaj cancunapaj amocunata, Cristota shinallataj manchaihuan, chujchuihuan, cancunapaj alli shunguhuan cazuichij.

6Amopi ricuringa raiculla rurajcuna shina, pai ricucujllapi ama ruraichijchu. Ashtahuanpish Cristopajta ruracujcuna shina, Diospaj munaita shungumanta ruraichij.

7Runacunapajta shinallaca ama ruraichijchu. Mandaj Jesuspajta shina, shungumanta ruraichij.

8Amopajta ruraj cashpa, amopajta mana ruraj cashpapish, cada quiquin allita rurashcamanta, Mandaj Jesuspajta chasquina cashcataca yachanguichijmi.

9Amocuna cancunapish paicunataca imata ama manchachishpa paicunapaj allita ruraichij. Paicunata mandajpish cancunata mandajpish jahua pachapi cashcata yachashcamanta chashna ruraichij. Paica pita ñahuita ricushpalla allimi mana ninchu.

Dios cushca macanacunata churarichij

10Ñuca huauquicunalla caillahuanmi nisha nini, paipaj poderyuj fuerzahuan Mandaj Jesuspi sinchiyaichij.

11Diablo ima shinapish umashpa urmachisha nijpi, sinchi cangapajca, Dios cushca tucui macanacunata churarichij.

12Ñucanchijca yahuaryuj, aichayujhuanca mana macanacucunchijchu. Ashtahuanpish jahua huairapi purishpa mandacuj millai supaicunahuanmi macanacucunchij. Chaicunami cai pacha amsapaj cajcunata mandashpa mana allita rurachicun.

13Chaimanta mana alli punllapi sinchita shayaringapajca, Taita Dios cushca tucui macanacunata churarichij. Chashna tucuita allichishca cashpami sinchi catishun.

14Chaimanta mana llullahuan alli chumbillirishca sinchi caichij. Pechopi fierro churanata churarishca shinaca cashcata ruranata churarichij.

15Chaquicunapi zapatosta churarishca shinaca, sumaj causai alli huillaita huillanaihuan caichij.

16Tucuimanta yallica, escudota shinaca crishcata chariraichij. Chashna cashpami nina shina millaipaj tucui yuyaicunataca huañuchi tucunguichij.

17Cascota churarishca shinaca, quishpichishca cashcata yuyaichij. Espiritupaj espadatapish chariraichij. Chaica Diospaj shimimi.

18Chaipajca, punllanta Diosta mañaichij. Espíritu yuyachishca shina tucuimanta mañashpa rogaichij. Chai yuyai chaparaichij. Jucha illajcunamantapish tucuicunamanta mañaichij.

19Pi mana yachashca alli huillaita mana manchashpa yachaj chayachingapaj, ñuca shimita pascajpi rimanata ñucaman cuchun, ñucamantapish mañaichij.

20Paipaj randi huillachun cachashcamantami cadenacunapi huatashca cani. Paimanta ima shina rimana cashcataca, mana manchashpa rimangapaj mañaichij.

21Mandaj Jesusmanta Diospajta rurashpa alli pajtachij c'uyashca huauqui Tiquicomi, ñuca ima shina cashcata cancunapish yachachun, tucuita alli huillanga.

22Ñucanchij ima shina cashcata yachaj chayashpa, cancunapaj shungucuna cushicuchunmi paitaca cachani.

23Dios Yayapaj, Mandaj Jesucristopaj sumaj causaipish, c'uyaj canapish, alli crij canapish huauquicunahuan cashca cachun.

24Ñucanchijta Mandaj Jesucristota, mana chingarij c'uyaihuan tucui c'uyajcunamanca, mana c'uyaipajta c'uyaj canata cushca cachun. Chashna cachun.