1Rurashcalla dioscunaman rupachinapaj cushca ima cashcata yachanataca tucuicunami yachanchij. Chaita yachanaca jatun tucunapajllami, ashtahuanpish c'uyaimi crijtaca sinchiyachin.
2Maijanpish yachajmi cani yuyashpapish, ima shina yachana cashca shinatajca manaraj imata yachanchu.
3Ashtahuanpish Diosta maijan c'uyajca, Dios rijsishcami.
4Rurashcalla dioscunaman rupachinapaj cushca micuicunamantaca caitami yachanchij. Rurashcalla diosca cai pachapica, ima mana canchu. Shujlla Diosmi tiyan.
5Jahua pachapipish, cai pachapipish dioscunami tiyan nijcunapajca, achca dioscuna, achca mandajcunami tiyan.
6Shina cajpipish ñucanchijpajca, shujlla Taita Diosmi tiyan. Pai Yayamantami tucui imapish shamun, ñucanchijpish paipajmi tiyanchij. Mandaj Jesucristopish shujllami. Paihuanmi tucui ima tiyajtapish rurarca, paimantami ñucanchijpish tiyanchij.
7Ashtahuanpish cai yachanataca, mana tucuicuna yachancunachu. Maijancunaca rurashcalla dioscunata cunancama adorajcuna cashcamantami, rurashcalla dioscunaman rupachinapaj cushcaca chai diospajtaj cashcata yuyashpa micuncuna. Chaimantami paicunapaj yuyaica, irqui cashcamanta mapayan.
8Micunaca, mana ashtahuan Diosman c'uchuyachinchu. Micushpapish mana ashtahuan alli cashunchu, mana micushpapish mana huashayashunchu.
9Chashna cancuna micushpaca, irquicunata pandachinguichijman alli yuyaringuichij.
10Yachanimi nishpa, rurashcalla dioscunata adoranapi caj mezapi quiquin tiyacujta maijan ricushpaca, ricujpaj yuyai irqui cashcamantaca ¿manachu chai rurashcalla dioscunaman rupachinapaj cushcata micunachinga?
11Quiquin yachashcamanta chashna rurajpica, irqui huauquica chingaringami. Paimantapishmi Cristoca huañurca.
12Chashna rurashpaca, huauquicunapaj irqui yuyaitami chugrichishpa juchallinguichij. Cristotapish p'iñashpami juchallinguichij.
13Chai micui ñuca huauquita urmachina cajpica, ñuca huauquita ama ñitcachingapaj aichataca manataj micushachu.
Who We AreWhat We EelieveWhat We Do
2025 by iamachristian.org,Inc All rights reserved.
