JUECES 16 - Quichua Chimborazo Bible

Gaza pueblo punguta Sansón llujshichishcami

1Sansonca, Gazaman rishpaca, huainayashcahuan causaj shuj huarmita ricushpami, chai huarmipi chayarirca.

2Gazapi causajcunaca Sansonmi caiman shamushca nishcata yachashpami, chai tutaca chai huasi muyundijtapish pueblo pungupipish chaparcacuna. Paicunaca: “Achijyajpi caya tutamanta huañuchishunllami” nishpami upajlla chaipi carcacuna.

3Sansonca chaupi tutacama dormishpa jatarishcahuan chai huasimanta llujshishpami, chai pueblo pungutaca aparij ishqui caspicunandij, pungupi quinriman churashca fierrondij llujshichishpa rigra jahuashpa, Hebrón pueblo ch'imbapurapi caj urcupi shitagrirca.

Sansonta Dalila huarmi jatun llaquipi churashcami

4Chai q'uipami Sansonca, Sorec pugru pambapi causaj Dalila huarmita munarca.

5Chaimantami filisteocunata mandajcunaca, Dalila huarmipajman rishpaca:

–Sansontaca imamanta yallitaj fuerzasapa cashcatapish, paitaca imata rurashpa mishai tucunatapish sumajta inquitashpa tapui. Chaita yachaj chayashpami paitaca alli huatashpa charishun. Chashna tapushpa ñucanchijman huillajpica, canmanca tucui ñucanchijmi cada shuj 1.100 siclo cullquita cushun– nircacuna.

6Chaimi Dalila huarmica, Sansontaca:

–Canca ¿imamantataj yallitaj fuerzasapa canguiyari? ¿Ima shina huatajpitaj canca mana cachariripaj canguiyari? Chaita huillahuai– nirca.

7Shina nijpimi Sansonca:

–Ñucaca manaraj chaquishca canchis angucunahuan huatajpica, shujtaj runacuna shinallataj fuerza illaj tucushpa mana p'iti tucushachu– nirca.

8Dalila huarmi chaita huillajpimi filisteocunata mandajcunaca, manaraj chaquishca canchis angucunata Dalilaman cugrircacuna. Chai angucunahuanmi Sansontaca huatarca.

9Ña huatashpaca, Dalila huarmica caishuj ucupi tauca runacunata pacashpa churashcamantami paitaca:

–Sansón, filisteocunaca canta japinaman shamunmari– nishpa caparijpi Sansonca, paita huatashca angucunataca supasta nina rupachij shinalla p'itirca.

Chashna p'itijpimi, imamanta paica yallitaj fuerzasapa cashcataca filisteocunaca mana yachai tucurcacuna.

10Cutinllatajmi Dalila huarmica Sansontaca:

–Canca ñucataca umashcanguimari, llullashpallamari ñucamanca chashna nishcangui. Ima shina canta huatana cashcataca cunantajca ama pacashpa huillachunmi rogani– nirca.

11Shina nijpimi Sansonca:

–Imata manaraj rurashca mushuj huascacunahuan sinchita huatajpica, shujtaj runacuna shinallataj fuerza illaj tucushallami– nirca.

12Chaimi Dalila huarmica, mushuj huascacunahuan Sansonta huatashpaca:

–Sansón, filisteocunaca canta japinaman shamunmari– nishpa caparijpi Sansonca, paita huatashca huascacunataca ñañu puchcata shinalla p'itirca. Dalila huarmica ñaupaman shinallatajmi tauca runacunata shujtaj ucupi pacashpa charicurca.

13Dalila huarmica Sansontaca:

–Cunanpish cutinllatajmari umashpa, llullashpa catinguiraj. Ima shina canta huatana cashcata cunantajca huillahuai– nijpimi Sansonca:

–Ñuca ajchataca ahuana puchcahuan canchis ch'imbacunata rurashpa ahuana chucupi alli huatai– nirca.

14Shina nijpica Dalila huarmica ahuana chucupi alli huatashpami:

–¡Sansón, filisteocunaca canta japinaman shamunmari!– nishpa caparijpi dormicunmanta Sansón rijcharishpaca, ahuana chucundij, ahuacushcandij p'itishpa shitarca.

15Chaimi Dalilaca:

–Cambaj shungu manapish ñucapi cajpica ¿ima shinataj ñucataca c'uyanimi ninguiyari? Ñamari quimsa cutin ñucataca umashpa, can imamanta yallitaj fuerzasapa cashcataca manataj huillasha ningui– nirca.

16Punllanta chashna nishpa chai huarmi p'iñachicujllapimi, Sansonca paipaj tucui almahuan huañuna shinata p'iñarishpa,

17Dalila huarmimanca pai imamanta chashna cashcata paipaj shungullapi yachashcataca:

–Ñuca ajchataca nunca mana p'itishcami cani. Ñucaca mamapaj huijsamantapachami Diospaj nazareo cani. Ñuca ajchata p'itijpica ñuca fuerzaca ñucamanta anchunmanllami, tucui caishuj runacuna shinallatajmi caiman– nirca.

18Paipaj shungullapi yachashcata mana pacashpa Sansón huillajpimi Dalilaca:

–Cunantajca shamuichijlla. Sansonca mana pacashpami tucuita huillan– nishpa filisteocunataca paicunata mandajcunata cayamuchun cacharca.

Chaita huillajpimi filisteocunata mandajcunaca, Dalilaman cuna cashca cullquita apashpa shamurcacuna.

19Dalilaca paipaj changapi Sansonta dormichishpa shuj runata cayashpami, Sansonpaj ajcha canchis ch'imbacunata p'itichirca. Sansonmantaca chai fuerza anchujpimi, Dalila llaquichi callarishpaca,

20cashna nishpa caparirca:

–¡Sansón, filisteocunaca canta japinaman shamunmari!– nishpa caparijpi Sansón rijcharishpaca, cunanpish ñaupaman shinallataj jahualla quishpirishallami yuyarca. Ashtahuanpish paimanta Mandaj Dios anchurishcataca mana yacharcachu.

21Filisteocunaca paita japishpaca ñahuita surcushpa Gazaman apashpami, cadenahuan huatashpa carcelpi tiyaj molino rumita muyuchichun churarcacuna.

22Sansonpaj ajchaca p'itishca cashpapish, cutinllatajmi huiñai callarirca.

Sansón huañushcami

23Filisteocunata mandajcunaca paicunapaj Dagón diosman sacrificiota cungapaj, cushicungapaj tandanacushpami:

“Ñucanchijta p'iñaj Sansontaca, ñucanchij diosmari ñucanchij maquipi churarca” nircacuna.

24Filisteocunaca chaita ricushpami paicunapaj diostaca:

“Ñucanchijta p'iñaj, ñucanchij chagracunata tucuchijtaca, ñucanchij diosmari ñucanchij maquipi churashca.

Ñucanchijpura achcacunata huañuchijtaca paimari ñucanchij maquipi churashca” nishpa cantarcacuna.

25Chashna paicunapaj shungupi cushicuihuan cashpami: “Pugllashpa cushicushpa asingapaj Sansonta pushamuichij” nijpi, carcelmanta Sansonta pushamujpica, filisteocunaca pugllashpa cushicushpa asircacuna. Chai q'uipaca pilarcuna chaupipimi churarcacuna.

26Sansonca maquimanta aisashpa paita pushacuj huambrataca:

–Cai jatun huasita aparij pilarcunapimi taunarisha nini. Chai pilarcunapi ñuca maquicunata churai– nirca.

27Chai huasipica filisteocunapaj tucui mandajcunami tiyacurcacuna. Shinallataj shujtaj c'aricunapish, huarmicunapish chai huasi jundami tiyacurcacuna. Jahua altibajomantapish 3.000 shina c'aricuna huarmicunami Sansonta caishujcuna pugllashpa asijta ricucurcacuna.

28Chaipimi Sansonca Mandaj Diostaca: Mandaj Jatun Dioslla, shuj cutinllahuan ñucata yuyarihuai. Filisteocuna ñuca ishqui ñahuita surcushcamanta cunantaj tucuicunata huañuchingapaj fuerzata cuhuai,

29nishpa mañashpaca huasita aparij ishqui pilarcunapi ishqui maquihuan alli taunarirca.

30Chaipi taunarishpaca Sansonca: “Filisteocuna ñucahuan huañuichij” nishpa caparishpaca, tucui paipaj fuerzahuan chai ishqui pilarcunata t'angajpimi, chai huasica filisteocunata mandajcunapaj jahuapi, tucui chaipi cajcunapaj jahuapipish urmarca. Sansón chaipi huañushpaca, tucui paipaj causaipi huañuchishcatapish yallitami huañuchirca.

31Paipaj huauquicuna, paipaj yayapaj huasi familiapish uriyashpami Sansonpaj cuerpotaca apashpa, paipaj yaya Manoata churashca ladollapitaj Zora, Estaol shuti pueblocuna chaupipi churarcacuna. Sansonca, ishqui chunga huatatami israelcunataca mandarca.