JEREMÍAS 32 - Quichua Chimborazo Bible

Hanameelpaj allpata Jeremías randishcamanta

1Jatun mandaj Sedequías, Judá llajtata ña chunga huatata mandacujpica, Nabucodonosorca Babilonia llajtataca, ñami chunga pusaj huatata mandacurca. Mandaj Dios chai huatapi Jeremiasta huillachishca shimicunami caipica tiyacun.

2Chai huatami Babilonia llajtata jatun mandajpaj soldadocunaca, Jerusalenpi causajcunahuan macanacungapaj muyundijta chapacurcacuna. Chaipica Dios ima nishcata huillaj Jeremiasca, Judá llajtata jatun mandajpaj huasi ñaupajpi tiyaj carcelpimi prezu tiyacurca.

3Paitaca Judá llajtata jatun mandaj Sedequiasmi, cashna nishpa prezushca carca: “¿Ima nishpataj canca cashna nishpa huillanguiyari?: Mandaj Diosca cashnami nin: Ñucatajmi cai pueblotaca Babilonia llajtata jatun mandajpaj maquipi churani. Paica macanacushpa mishangami.

4Judá llajtata jatun mandaj Sedequiasca caldeo soldadocunapaj maquimantaca manataj quishpiringachu. Paica Babilonia llajtata jatun mandajpaj maquipi churashca cangatajmi. Ñahui ñahui ch'imbapura shayashpami paihuan rimanga.

5Sedequiastaca Babilonia llajtamanmi apachinga. Ñucallataj cutin ricugringacamami chaipi canga. Chai caldeo soldadocunahuan macanacushpapish, ashtahuan llaqui tucunguichijmi ninmi Mandaj Diosca ninguimari” nircami.

6Chashna nijpica, Jeremiasca cashnami nirca: “Mandaj Diosmi ñucataca cashna nirca:

7Cambaj yayapaj huauqui Salumpaj churi Hanameelmi cambajman shamushpaca: Anatot pueblopi ñuca allpata randi, canmari ñuca familia cashcamantaca, chai allpata randina cangui ningami nircami.

8Ñuca primo Hanameelca, Mandaj Dios nishca shinallatajmi, ñuca prezu tiyacun carcelman shamushpa cashna nirca: Benjamín llajtapi caj Anatotpi ñuca charishca allpata cunantaj randi. Ñuca yayamanta japishcataca, canmari randina cangui. Chai allpa ama shujtajcunapaj tucuchunca, canmari ñuca c'uchulla familia cashcamantaca randina cangui. Chashna cashcamantaca, cambaj cachun chai allpata randi nircami. Chashna nijpimi ñucaca, Mandaj Diostaj chaita randichun ñucata mandashcata yacharcani.

9-10Chaimantami Anatotpi ñuca tiopaj churi Hanameel charishca allpataca randircani. Chai allpamantaca balanzapi pizashpami, chunga canchis siclo cullquita curcani. Chaimantaca randishcata ricuchij quillcata rurashpami sellarcani. Chaipi ñuca randijta ricujcunatapishmi firmachircani.

11Chai q'uipaca c'atushcata ricuchij ishquindij quillcatami shujtaca sellashcata, caishujtaca pascashcata japircani. Chai quillcacunaca c'atujpaj familia cashcamanta, ñuca randina tucushpa, ñuca randishpa japishcata ricuchij quillcacunami carca.

12C'atushcata ricuchij quillcataca ñuca randijta ricushpa firmajcunapish, chai cárcel ñaupajpi caj tucui Judá runacunapish, ñuca tiopaj churi Hanameelpish ricucujpimi, Nerías runapaj churi Barucman curcani. Neriaspaj yayaca Maasiasmi carca.

13Tucui paicunapaj ñaupajpimi, Baructaca cashna mandarcani:

14Tucuita Mandaj, israelcunapaj Diosca cashnami nin: C'atushcata ricuchij cai sellashca quillcatapish, cai pascashca quillcatapish japishpa, unicama huaquichishca tiyachun allpa mangapi churai.

15Cai llajtapica huasicunatapish, allpacunatapish, uva chagrayuj allpacunatapish randina tiyangarajmi ninmi. Tucuita Mandaj, israelcunapaj Diostajmi chashna nin” nircanimi.

Mandaj Diosta Jeremías mañashca shimicunami

16Ñucaman c'atushcata ricuchij quillcata Barucman cushca q'uipami, Mandaj Diostaca cashna nishpa mañarcani:

17“¡Jatun Mandaj Dioslla, canmari jahua pachatapish, cai pachatapish tucuita rurai tucuj cambaj maquihuan rurarcangui! Cambajca imata ruranapish mana sinchichu.

18Canca cai tucui huaranga huaranga runacunatami c'uyashpa perdonashcangui. Shina cashpapish yayacuna juchata rurashcamantaca q'uipa huahuacunata llaquichijmi cangui. Tucuita rurai tucuj, tucuita Mandaj Jatun Dios shutimi cangui.

19Canca jatun ruranacunata yuyarijmi cangui, sumajcunata rurajmi cangui. Tucui runacuna huahua huahua ima shinalla causajtaca, tucuitami cambaj ñahuihuan ricucungui. Chaimantami tucuicunaman ima shinalla causashcamanta, imallata rurashcamantaca chai shinallataj cungui.

20Canmari Egipto llajtapica, pi mana rurai tucuipaj jatun señalcunata rurarcangui. Cunancamapish ruracunguirajmari. Tucui runacunapurapipishmi chashnacunataca rurarcangui. Cunancama chaicunata rurashpamari, canca rijsishca jatun Dios cangui.

21Canmari can agllashca israelcunataca, tucuita rurai tucuj maquihuan jatun señalcunata rurashpa, Egipto llajta runacunata yallitaj manchachishpa chaimanta llujshichimurcangui.

22Chaimantaca cambaj shimihuantaj paicunapaj ñaupa yayacunaman cushami nishca cai llajtatamari curcangui. Lechepish, sacha chuspi huachashca mishquipish yacu shina tiyaj sumaj llajtatamari curcangui.

23Cai llajtata japishpaca, caipi p'ucushcata micushpa cushicurcacunami. Shina cashpapish can rimashcataca mana uyarcacunachu, can mandashcatapish imata mana pajtachishpa causancunachu. Imallata rurachun can mandashcataca, imata mana rurarcacunachu. Chaimantamari cai tucui llaquicunata paicunapaj jahuapi cacharishcangui.

24Cunanca caldeocunaca mishashpa japingapajmari, cai pueblo tucui muyundijta caspicunahuan arietecunata rurancuna. Jatun macanacuipi huañushpa tucurishcamantapish, yaricaimantapish cai puebloca chai caldeocunapaj maquipi urmagrinca. Mandaj Dioslla, can huillashca ña pajtacujtaca canllataj ricunguimi.

25¡Mandaj Jatun Dioslla!, cai llajtataca caldeocunapaj maquipi churashca jahuaca ¿imapajtaj ñucataca cambaj familia charishca allpataca cullquihuan randishpa ricujcunata churai nihuarcangui?” nishpami Diosta mañarca.

26Chai q'uipami Mandaj Diosca, Jeremiastaca cashna nirca:

27“Ñucaca tucui cai pachapi causajcunata Mandaj Diosmi cani. Ñucapajca imata ruranapish mana sinchichu.

28Chaimantami Mandaj Diosca cashna nini: Ñucatajmi cai pueblotaca caldeocunata mishachishpa, Babilonia llajtata jatun mandaj Nabucodonosorpaj maquipi churagrini. Paimi cai pueblotaca japinga.

29Chai caldeocuna yaicushpami, cai pueblotaca ninata japichishpa tucui rupachingacuna. Israelcunaca huasi jahuacunapimi inciensota Baalman cushpa rupachijcuna carca. Shujtajcunapaj dioscunamanpish vinota cushpami tallijcuna carca. Chashna rurashpami ñucata p'iñachircacuna, tucui chai huasicunatami rupachingacuna.

30Israelcunapish, Judá runacunapish ñuca ñaupajpi ima allita ruranapaj randica, callarimantapacha millaillata rurashpami causarcacuna. Tucui israelcunallatajmi paicunapaj maquihuan rurashca dioscunahuan ñucata p'iñachishpalla causancuna. Ñuca, Mandaj Diostajmi chashna nini.

31Cai pueblopish shayachi callarimantapacha cunancama, ñucata p'iñachishpallami tiyan. Chaimantami cunanca ñuca ñaupajmanta anchuchigrini.

32Tucui israelcuna, tucui Judá runacuna, paicunata jatun mandajcunandij, caishuj mandajcunandij, paicunapaj curacunandij, paicunaman huillajcunandij millaita rurashpa ñucata p'iñachishpa causashcamantami anchuchigrini. Tucui Judá llajtapi, Jerusalén pueblopi tucui causajcunallatajmi ñucata p'iñachircacuna.

33Ñucaca manataj upalla saquishcanillachu, ñaupamantapacha yachachicurcanillami. Ashtahuanpish paicunaca ñuca yachachishcata chasquingapaj ñahuita ricuchinapaj randica, huashatami ricuchircacuna.

34Ashtahuanpish ñucata mañana huasitapish paicuna rurashca millanana dioscunata churashpami mapayachircacuna.

35Hinompaj churipaj pugru pambapipish Baalpaj altarcunata rurashpamari, tucui Judapi causajcunata juchata rurachircacuna. Chaicunapimi paicunapaj churicunata, ushushicunata Molocman cushpa rupachincuna. Chaita rurachunca, shuj shimillatapish mana mandashcanichu. Chashna millaita paicuna ruranataca mana yuyashcanillapishchu” ninmi.

Q'uipa punllacunapi allita ruranata huillashcamanta

36Chashna nishpapish, israelcunata Mandaj Diosca cashnami nin: “Cai pueblotaca cancunaca: Jatun macanacuihuan, yaricaihuan, ungüihuanmi Babilonia llajtata jatun mandajpaj maquipi churagrin ninguichijmi.

37Shina cajpipish ñucaca yallitaj p'iñarishpa, manataj ashtahuan charisha nishpa llujshichishpa cachashcacunataca, tucui cai pachamantami cutin tandachimusha. Chashna tandachimushpa, cutin caipi causachun churashatajmi.

38Paicunaca ñucapajlla runacunami canga, ñucapish paicunapaj Diosmi casha.

39Paicunamanca tucui causaipi ñucata cazuj cana shunguta yuyaitami cusha. Paicunallatajpish, paicunapaj huahua huahuacunapish alli causaita charichunmi chashna rurasha.

40Shinallataj paicunahuanca huiñaita paicunapaj allita ruranata manataj saquinatami ari ninacushun. Paicuna ñucamanta amataj anchurichunca, ñucata manchana yuyaitami paicunapaj shungupi churasha.

41Ñucaca paicunapaj allita rurashpami cushicusha. Cai llajtapica tarpuj shinami churasha. Cutinca mana shitangapaj ñuca tucui shunguhuan, tucui almahuanmi caipi charisha” ninmi.

42Mandaj Diosca cashnapishmi nin: “Cai llajta runacunapajca cai tucui jatun llaquicunata apamushca shinallatajmi, paicunaman imalla allicunata cusha nishcataca pajtachisha.

43Paicunami cai llajtataca, paicuna quiquinpaj cachun japishpa causangacuna. Cancunaca: Cai llajtaca gentecunapish, animalcunapish illajlla shitashcamari saquirin. Cunanca caldeocunapajmari ninguichijmi.

44Shina cajpipish caimanta prezu apashcacunataca, ñucatajmi tigrachimusha. Paicunami allpacunata cullquihuan randingacuna. Randishcata ricuchij quillcata rurangacunami. Chai quillcataca randijta ricujcunata firmachishpa sellangacunami. Benjamín llajtapi, Jerusalén muyundijcunapi, Judá llajtallapitaj caj caishuj pueblocunapi, urcucunapi caj pueblocunapi, Sefela pamba pueblocunapi, Neguev pamba pueblocunapipishmi allpacunata chashna randingacuna” ninmi Mandaj Diosca.