1 CORINTIOS 3 - Quichua Chimborazo Bible

Diospajta paihuan rurajcunami canchij

1Huauquicuna, ñucaca cancunataca Espiritupajlla cajcunata shinaca mana rimai tucurcanichu. Cristopi huahuarajcuna cashpa, aicha munaillata ruracujcunamanmi rimarcani.

2Cancunamanca lechellatami ubyachircani, chaquishca micuitaca mana carai tucurcanichu. Chaitaca manaraj micui tucurcanguichijchu, cunancamapish manaraj micui tucunguichijchu.

3Aicha munaitapish ruracujraj cashcamantami chashna canguichij. Chaimantami cancunapurapica huañurinacucunguichij, p'iñanacushpa rimanacucunguichij, chaupirinacucunguichij. Chashna cashpaca ¿manachu aicha munaita rurashpa mana crijcuna shinallataj puricunguichij?

4Shujca: “Ñucaca Pablopajtajmi cani”, caishujca: “Ñucaca Apolospajtajmi cani” ninacucushpaca ¿manachu aicha munaita ruracunguichij?

5¿Pablopish, Apolospish imataj canchigari? Ñucanchij huillajpimi crircanguichij. Ñucanchijca Cristopajta rurajcunallami canchij. Ñucanchijca cada quiquinman imata rurai tucunata Mandaj Jesús cushca shinalla rurajcunami canchij.

6Ñucaca tarpurcanimi, Apolosca yacutami churarca, ashtahuanpish huiñachijca Diosmari.

7Chashnami tarpujpish, yacuta churajpish mana ima canchij, ashtahuanpish huiñachijca Diosmari.

8Tarpujpish, yacuta churajpish chai shinallatajmi. Shina cashpapish cada quiquin imata rurashca shinallatajmi japinga.

9Ñucanchijca, Diospajta paihuan rurajcunami canchij. Cancunaca Diospaj chagrami canguichij, Dios huasichicun huasipishmi canguichij.

10Diosca paipaj mana c'uyaipajta c'uyaj canata ñucaman cushca shinallatajmi, huasichinata alli yachaj shina callarichircani. Chai callarichishca jahuapica, shujtajmi huasichicun. Ima shina huasichicushcataca cada quiquin alli yuyarichun.

11Callarichishcapica shujtaj callaritaca pi mana churai tucunchu. Paica Jesucristomi.

12Chai callarichishca jahuapica maijanpish curihuan, cullquihuan, sumaj rumicunahuan, mana cashpaca caspihuan, ujshahuan, p'angacunahuan huasichingachari.

13Cada quiquin imata rurashcataca, shamuj punllapimi ninahuan ricuchishca canga. Cada quiquinpaj imalla rurashcataca, alli cashcatapish mana alli cashcatapish ninallatajmi ricuchinga.

14Maijanpaj huasichishca mana chingarijpica, japina cashcataca chasquingami.

15Maijanpaj rurashcapish rupajpica, chingachishcamanta llaquitami apanga. Shina cajpipish, paillami rupacuj ninamanta llujshishpa quishpirishca canga.

16Cancunaca Diospaj huasi cashcata, Diospaj Espíritu cancunapi cashcatapish ¿manachu yachanguichij?

17Maijanpish Diospaj huasita chingachijtaca, Diospish paitaca chingachingami. Diospaj huasica, jucha illajmi. Chai huasica, cancunallatajmi canguichij.

18Pi cashpapish quiquinllatajca ama umarichun. Cancunapurapi maijanpish cai pachamanta yachaihuan yachaisapami cani yuyashpaca, mana yachaj shina cachun. Chashna cashpami yachaisapataj canamanca chayanga.

19Cai pachamanta yachashcahuanca, Diospaj ñaupajpica yuyai illaj shinami. Cashnami quillcashca tiyacun: “Paimi yachaisapacunataca, paicuna umangapaj yachaj cashcallapitaj tsagnarichin”.

20Cashnapish ninmi: “Jatun Diosca yachaisapacunapaj yuyaicunataca rijsinmi, chai yachaica yanga cashcatapish yachanmi”.

21Chaimantami maijanpish yachachijcunallamantaca mana jatun tucuna. Tucuimi cancunapaj:

22Pablo cashpa, Apolos cashpa, Cefas cashpa, cai pacha cashpa, causai cashpa, huañui cashpa, cunan punllacuna cashpa, shamuj punllacuna cashpapish tucuimi cancunapaj.

23Cancunaca Cristopajmi canguichij, Cristoca Diospajmi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help