LEVÍTICO 23 - Quichua Chimborazo Bible

Taita Diosta yuyarishpa imalla fiestacunata ruranami(Nm 28.16–29.40)

1Mandaj Diosca Moisesta mandashpaca:

2“Tucui israelcunata cashna nishpa mandai: Mandaj Diosta yuyarina jatun fiestacunataca, cai punllacuna ruranguichij. Chai fiestacunaca Diospajlla cashcamanta chaimanca tucuicunata cayanguichij.

3Sujta punllacunata trabajanguichij. Canchis punllapica samaringuichij. Chaipica tucuita cayashpa Diospajlla tandanacuimi canga. Chai punllapica sinchi trabajocunataca imata ama ruranguichij. Chai punllacunapica cancuna maipi causajpipish Mandaj Diospajlla ch'icanchishca samana punllami canga.

4Tucuicuna Mandaj Diosta yuyaringapaj fiestataca ñuca mandashca punllapitaj ruranguichij.

5Huata callaripaj punta quilla chunga chuscu punlla tutayamuitaca Mandaj Diospaj Pascuami.

6Chai quillapaj chunga pichca punllapica, Mandaj Diosta alli nishpa, levadura illajlla tandata micuna jatun fiestami canga. Levadura illajlla tandataca canchis punllata micunguichij.

7Chai fiesta callari punllapica tucuita cayashpa Diospajlla tandanacuita charinguichij. Sinchi trabajocunataca imata ama ruranguichij.

8Mandaj Diosman rupachishpa cunataca canchis punllata cunguichij. Tucuri canchis punllapica tucuita cayashpa Diospajlla tandanacuimi canga. Chai punllapica sinchi trabajocunataca imata ama ruranguichij ningui” nircami.

Punta granota tandashpa rurana fiestami(Nm 28.26-31)

9Mandaj Diosca Moisesta mandashpaca:

10“Israelcunataca cashna mandai: Cancunaman ñuca cushca allpaman chayashpa, cancunapaj granota tandashpaca punta p'ucushca granotaca ñucaman cuna cashcamanta ñucamanraj cungapaj shuj gavillata curapajman apanguichij.

11Chai gavillata huichi ricuchishpa cuyuchishpa Mandaj Diosman cura cujpimi, cancunataca chasquinga. Chai gavillataca samana punlla cayandijta huichi ricuchishpa cuyuchichun.

12Chai gavillata Diosman cui punllaca shuj huatata charij ovejata cushpa rupachichun. Chaica Mandaj Diosman tucuita cushpa tucui rupachina cashcamanta ima mana tucushca cachun.

13Mandaj Diosman cuna cashcata cungapajca ashtahuan alli cutata shuj efamanta chungapi chaupishca, ishqui parteta aceitehuan chapushcata apamuchun. Chaitaca Mandaj Diosman cushpa rupachijpi mishquijllata ashnaj cachun cungapaj apamuchun. Mandaj Diosman cushpa tallina vinotapish shuj hinmanta chuscupi chaupishca shuj parteta apamuchun.

14Cancunapaj Taita Diosmanraj punta cuna cashcamanta chaita manaraj cushpaca, chai cuna punllacama tandatapish, canchashca granotapish, llulluraj espigatapish amaraj micunguichij. Cai mandashcacunaca, cancuna maipi causashpapish, huahua huahuacuna chaitataj pajtachicuchunlla mandashcami.

15Samana punlla cayandijmanta, gavillata huichi ricuchishpa cuyuchishpa cushca punllamanta canchis semanacunata yupanguichij.

16Canchis semana tucuri samana punlla cayandij punllacamaca pichca chunga punllacunata yupanguichij. Chaipica mushuj granocunata Mandaj Diosman cunguichij.

17Mandaj Diosman huichi ricuchishpa cuyuchishpa cungapajca, cancunapaj huasicunamanta ishqui tandacunata apanguichij. Chaicunaca ashtahuan alli cutata shuj efamanta chungapi chaupishca shuj parteta levadurahuan rurashpa cusashca cachun. Chaica cozicha callarinapaj Mandaj Diosman cushcami canga.

18Chai tandacunahuanca shuj huatayuj, ima mana tucushca canchis c'ari ovejacunata, shuj bizita, ishqui carnerotapish cunguichij. Chaicunaca Mandaj Diosman tucuita cushpa tucui rupachishca cachun. Chaicunataca chaquishca granohuanpish, tallina vinohuanpish cuchun. Chashna cushpa rupachijpimi Mandaj Diospajca mishquijllata ashnacuj canga.

19Juchamanta cuna cashcataca shuj chivota cunguichij. Sumaj causaimantaca shuj huatayuj ishqui ovejacunata cunguichij.

20Chai ishqui malta ovejacunataca punta p'ucushca granocunandij, cura huichi ricuchishpa cuyuchishpa Mandaj Diosman cuchun. Chai cushcacunaca Diospajlla ch'icanchishca cashcamanta curapajmi canga.

21Chai punllallataj Diospajlla tandanacuiman cayanguichij. Chai punllapica sinchi trabajocunataca imata ama ruranguichijchu. Tucui cai mandashcacunaca cancuna maipi causashpapish cancunapaj huahua huahua chaitataj pajtachicuchunlla mandashcami.

22Cambaj allpapi granota tandai punllacuna tandacushpaca, ama maipi tiyajta tucuita tandanguichijchu. Pambapi urmashca granotapish ama pallanguichijchu. Chaicunataca imata mana charij huajchacuna, shujtaj llajtamanta shamujcunapaj saquinguichij. Ñucami Mandaj Dios cancunapaj Dios cani ninmi ni” nircami.

Trompetacunapi tocashpa fiestata ruranami(Nm 29.1-6)

23Mandaj Diosca Moisesta mandashpaca:

24“Israelcunata cashna nishpa mandai: Canchis quillapaj callari punllapica samana punllami canga. Chai punllapica trompetacunapi tocashpa tucuita cayashpa Taita Diosta yuyarishpa Diospajlla tandanacuita charinguichij.

25Sinchi trabajocunataca imata ama ruranguichijchu. Chai punllapica, Mandaj Diosman rupachishpa cunguichij ni” nircami.

Dios perdonana punllami(Nm 29.7-11)

26Mandaj Diosca Moisesta mandashpaca:

27“Chai canchis quillapaj chunga punllapica, Dios perdonana punllami canga. Chai punllapica tucuita cayashpa, tucui almahuan llaquirishpa Diospajlla tandanacuita charinguichij. Mandaj Diosman rupachishpa cunatapish cunguichij.

28Mandaj Dios cancunata perdonana punlla cashcamanta ima trabajota ama ruranguichijchu. Mandaj cancunapaj Dioshuan alli tucuna cashcamantami chashna rurana canguichij.

29Chai punllapi mana ayunajcunataca tucuicunatami israelcunapuramanta anchuchishca canga.

30Chai punllapi maijanpish ima trabajota rurajpica, chai runataca ñucami israelcunapuramanta chingachisha.

31Chashna cashcamanta chai punllapica ima trabajota ama ruranguichij. Chaitataj pajtachichun mandashcaca, cancunapaj huahua huahuacuna pajtachicuchunlla mandashcami. Chaimanta maipi causashpapish chaitataj pajtachicunguichijlla.

32Chai punllaca cancuna samana punllami. Chaipica ayunanguichij. Chai quillallapitaj iscun punlla chishita callarishpaca, cayandij chishi chai horascamallataj samarichun” nircami.

Ramacunahuan rurashca chugllacunapi fiestata ruranami(Nm 29.12-40)

33Mandaj Diosca Moisesta mandashpaca:

34“Israelcunaman cashna nishpa huillai: Chai canchis quillallapitaj chunga pichca punllapica, ramacunahuan rurashca chugllacunata rurashpa canchis punllacunata Mandaj Diosta alli nishpa jatun fiestata ruranguichij.

35Fiesta callari punllapica tucuita cayashpa Diospajlla tandanacuimi canga. Chaipica sinchi trabajocunataca imata ama ruranguichijchu.

36Chai canchis punllacunapipish Mandaj Diosman rupachishpa cunguichij. Pusaj punllapica tucuita cayashpa Diospajlla tandanacuita charinguichij. Chai punllapipish Mandaj Diosman cushpa rupachinguichij. Fiesta punlla cashcamanta chai punllapica sinchi trabajocunataca imata ama ruranguichijchu.

37Mandaj Diospajlla jatun tandanacuita rurangapaj cayashpaca caicunapajmi: Mandaj Diosman cushpa rupachinapaj, tucuita cushpa tucui rupachinapaj, chaquishca granocunata cungapaj, animalta huañuchishpa Diosman cungapaj, vinota tallingapajmi tandachina canguichij. Chaicunataca maijan punllallapi cunapimi huashan huashan cuna canguichij.

38Samana punllacunapi Mandaj Diosman cuna cashcata cushca jahua, cusha nishcatapish pajtachishca jahua, cushca cashpapish cushca jahuami chaicunataca rurana canguichij.

39Shinallataj canchis quillapaj chunga pichca punllapica, cancunapaj chagramanta p'ucushca granocunata ña tucui tandai punllapica Mandaj Diosta pagui nishpa canchis punllacunata fiestata ruranguichij. Chai fiesta callari punllapipish, tucuri pusaj punllapipish tucuicunapaj samarinami canga.

40Chai fiesta callari punllapica tucuimanta yalli alli yuracuna p'ucushca granocunatapish, palmera ramacunatapish, p'angasapa yura ramacunatapish yacu c'uchupi tiyaj sauce ramacunatapish japishpa canchis punllacunata Mandaj Dios cancunapaj Taita Diospaj ñaupajpi cushicunguichij.

41Mandaj Diospaj fiestataca cada huata canchis punllacunata ruranguichij. Cancunapaj huahua huahua pajtachicuchunlla mandashcami. Chaitaca huatapaj canchis quillapi ruranguichij.

42Chai punllacunapica canchis punllacunata ramacunahuan rurashca chugllacunapi causanguichij. Israeltaj cajcunaca chai punllacunapica chai carpa huasita shayachishcallapi tucuicuna causanguichij.

43Cancunata Egiptomanta llujshichimucushpa, carpa huasicunapi causachun ñuca churashcata cancunapaj huahua huahuacuna yachachunmi chashna rurana canguichij. Ñucami Mandaj Dios cancunapaj Taita Dios cani ni” nircami.

44Chashna mandashca shinallatajmi Moisesca Mandaj Diosta yuyaringapaj jatun fiestata ima punllallapi ruranataca tucui israelcunaman yachachirca.