CANTARES 3 - Quichua Chimborazo Bible

Huarmi muscushcamanta

1Ñucata c'uyajtaca tutacunami

ñuca camapi mashcarcani.

Mashcashpapish manamari japircanichu.

2Chaimantaca cashnami nircani: “Cunanca jatarishpa,

cai pueblo muyundijta mashcagrishalla.

Ñucata c'uyajtaca ñancunapi,

plazacunapipish mashcagrishalla” nircanimi.

Chashna mashcashpapish paitaca manamari japircanichu.

3Ashtahuanpish pueblota cuidajcunarajmi

ñucahuanca tuparca.

Paicunataca: “¿Manachu ñuca c'uyashcahuan

tuparcanguichij?” nishpami tapurcani.

4Paicunamanta ashata caruyashpaca,

ñapish ñuca c'uyashcahuanmi tupanacurcani.

Paihuan tupashpaca manataj cacharircanichu.

Ashtahuanpish paitaca ñucata huachaj mamapaj

huasiman pushashpami, chaiman yaicuchircani.

C'ari cantashcami:

5Jerusalenpi causaj solteracunalla,

corzocunamantapish, sacha tarugacunamantapishmi

cashna nipani: Ñuca c'uyashcataca amataj

rijchachipaichijchu.

Maicamapish samarichun saquipaichijlla.

Boda huasiman apashcamanta cantanami

6¿Shitashca pambataca pi huarmitajshimari,

tucui layaman ashnacuj cutahuanpish,

inciensohuanpish, mirrahuanpish

churarishpa mishquijllata ashnacuj,

cushni shina huichiyacun?

7Riqui, chaica Salomonta huanduna literami.

Chai huanduna literataca sujta chunga c'ari c'ari

Israel soldadocunami cuidashpa shamucuncuna.

8Paicunaca tucuicunami espadata charicuncuna,

macanacunatapish alli yachajcunami.

Paicunata tuta ima manchachinamantapish

cinturapi espadata aparishcamari.

9Jatun mandaj Salomonca, Libanomanta apamushca

caspicunahuanmi paipaj shuj carretata rurachishca.

10Chai carretapica cullqui pilarcunatami churachirca.

Paipaj huasha quimirinatapish curihuanmi c'atachirca.

Pai tiyarinatapish pucajlla linsohuanmi rurachirca.

Jerusalenpi causaj solteracunami pai tiyarinataca

c'uyaihuan sumajta bordarcacuna.

11Siónpi causaj solteracunalla,

jatun mandaj Salomonta ricunaman llujshichigari.

Paipaj shungu cushicuna punllapi,

pai casarai punllapi, paipaj mama churachishca

coronata churashcamari shamucun.