EZEQUIEL 37 - Quichua Chimborazo Bible

Pugru pambapi sirij chaquishca tullucunamanta

1Mandaj Diosmi paipaj maquita ñuca jahuapi churarca. Mandaj Diospaj Espiritumi shuj pugru pambaman pushashpa, chaipi tiyaj tullucuna chaupipi churarca.

2Chaimantaca chai tullucuna siricun muyundijtami purichirca. Chai pambapi siricuj tullucunaca yurajyajta chaquishca achca tullucunami carca.

3Chaimantami ñucataca cashna nirca: “Huañujlla aichayuj runalla, ¿cai tullucunaca causacungarajchu imashi?” nijpimi, ñucaca: “Mandaj Dioslla, canllami yachangui” nircani.

4Chaimantaca ñucataca cashnami nirca: “Cai tullucunamanca imalla tucuna cashcata cashna huillai: Chaquishca tullucuna, Mandaj Dios ima nishcata uyaichij.

5Mandaj Jatun Diosca chaquishca tullucunataca cashnami nin: Riquichij, ñucami cancunapica espirituta churani. Chaimantami cutin causanguichij.

6Shinallataj cancunapica angucunata churashpa, aichata jundachishpami, jahuataca carahuan tapachisha. Chai q'uipami espirituta cancunapi churasha. Chashna rurajpimi, cutin causaita charinguichij. Chaita ricushpami ñucataca, Mandaj Diostaj cashcataca yachanguichij ninmi ni” nircami.

7Taita Dios mandashca shinallatajmi chai tullucunamanca, imalla tucuna cashcata huillarcani. Chaimantaca ñapish allpa chujchushpa c'ulun nishcatami uyarcani. Chai tullucunaca maillapi cana cashcapimi tandanacurcacuna.

8Chai q'uipaca tullucunapica angucunami ricurirca, chai jahuapica aichami huiñarca. Chai jahuataca carami taparca, ashtahuanpish espiritutaca manaraj charircacunachu.

9Chaimantami ñucataca cashna nirca: “Huañujlla aichayuj runalla, espirituman cashna huillai: Espiritulla, Mandaj Jatun Diosca cashnami nin: Espiritulla, cai pacha chuscundij ladomanta tandanacushpa cai huañushcacunata p'ucui, cutin causachun ninmi ni” nircami.

10Chaitaca Taita Dios mandashca shinallatajmi huillarcani. Chaimantaca ñapish espíritu paicunapi yaicujpi causarishpami, jatarishpa shayarircacuna. Paicunaca yallitaj achca soldadocuna shinami carca.

11Chai q'uipami ñucataca cashna nirca: “Huañujlla aichayuj runalla, tucui cai tullucunaca israelcunami. Paicunaca cashnami nincuna: Ñucanchij tullucunaca chaquishcami, cutin causanataca mana yuyanchijchu, ñami tucui chingachishca canchij nincunami.

12Paicunamanca cashna huillai: Mandaj Jatun Diosca cashnami nin: Ñuca agllashca israelcunalla, cancunataca pambashca jutcucunamanta llujshichishpami, israelcunapaj llajtaman pushamusha.

13Ñuca agllashca israelcunalla, cancunataca pambashca jutcucunamanta llujshichijta ricushpami, Mandaj Diostaj cashcataca yachanguichij.

14Cancunapi ñuca Espirituta churajpimi, causaringuichij. Quiquin llajtallapitaj samarichunmi churasha. Chashna rurajpimi Mandaj Dios ñucataj chashna nishcataca yachanguichij. Chaitaca pajtachishatajmi ninmi Mandaj Diosca ni” nircami.

Judahuan Israelhuan tandachinamanta

15Mandaj Diosca ñucataca cashnami nirca:

16“Huañujlla aichayuj runalla, cunanca shuj caspita japishpa, cai caspipica: Judapajpish, paihuan alli apanacuj israelcunapajpishmi nishpa quillcangui. Chai q'uipaca, shujtaj caspita japingui. Cai caspipica: Efrainpaj caspica Josepajpish, paihuan alli apanacuj israelcunapajpishmi nishpa quillcangui.

17Chai q'uipaca shujlla shina cachun, ishquindij caspicunatataj tandachishpa lutsangui. Cambaj maquipica shujlla shinami saquiringa.

18Chaita ricushpaca, cambaj llajtapi causajcunaca: Chashna rurashpaca, ¿imatataj yachachisha ninguiyari? Ñucanchijman huillahuai ningacunami.

19Chaimantaca paicunamanca cashna huillangui: Mandaj Jatun Diosca cashnami nin: Ñucami Efrainpaj maquipi caj Josepaj caspitapish, paihuan alli apanacuj israelcunatapish japishpa, Judá llajtapaj caspihuan tandachishpa lutsasha. Shujlla caspita shina lutsajpimi, ñuca maquipica shujlla caspi canga ninmi ningui.

20Can quillcashca caspicunataca, paicuna ricuchun cambaj maquipi lutsashpa charinguilla.

21Chaimantaca paicunamanca cashna huillangui: Mandaj Jatun Diosca cashnami nin: Israelcunataca paicuna rishca shujtaj llajtacunamanta japimushpami, tandachishpa paicunapaj quiquin llajtallapitaj churasha.

22Paicunataca Israel llajta urcucunapi causachun churashpami, shujlla jatun llajtata rurasha. Chaipimi paicunataca shujlla jatun mandaj mandanga. Ña mana ashtahuan ch'icanyashca ishqui llajta cangachu, ña mana ashtahuan ishqui mandajcuna tiyangachu.

23Rurashcalla dioscunatapish ña mana ashtahuan adorangacunachu, ña mana ashtahuan ima millananacunata rurashpa mapayangacunachu, ña mana ashtahuan ñucata c'ariyangacunachu. Ashtahuanpish ñucata c'ariyashpa millaita rurashca cajpipish, quishpichishami. Paicunamantaca tucui juchatami p'ichasha. Paicunaca ñuca agllashcacunami canga, ñucaca paicunapaj Diosmi casha.

24Ñucata servij Davidmi paicunata jatun mandaj canga, tucuicunami shujlla michijta charingacuna. Paicunaca ñuca imallata rurachun nishca shinami causangacuna, ñuca quillcachishcatapish huaquichingacunami. Chaicunataca tucuitami pajtachingacuna.

25Ñucata servij Jacoboman cushca llajtapimi causangacuna. Chai llajtapimi cancunapaj ñaupa yayacunapish causarcacuna. Chai llajtallapitajmi paicunapish, paicunapaj huahuacunapaj huahuacunapish, chai huahuacunapaj huahua huahuacunapish huiñaita causangacuna. Ñucata servij Davidmi paicunapajca, huiñaita mandaj canga.

26Shinallataj sumajta causanatami ari ninacushun, chai ari ninacushcaca huiñaipajmi canga. Paicunataca chaipi causachun churashpaca, yallitaj achcatami mirachisha, ñuca huasitapish huiñaipajmi paicunapaj chaupipi shayachisha.

27Ñucapajlla carpa huasipish paicunapaj chaupipimi canga. Ñucaca paicunapaj Taita Diosmi casha, paicunaca ñuca agllashcacunami canga.

28Ñucapajlla huasita paicunapaj chaupipi huiñaipaj shayachishcata ricushpami, shujtaj llajtacunapi causajcunaca israelcunata ñucapajlla cachun agllashcataca yachangacuna. Chashna rurajpimi ñucataca, Mandaj Diostaj cashcataca yachangacuna ninmi ni” nircami.