ROMANOS 5 - Quichua Chimborazo Bible

Justificashcamantaca imallata chasquishcacunami

1Crishcamanta justificashcacuna cashpami, ñucanchijta Mandaj Jesucristomanta Dioshuan sumaj causaita charinchij.

2Paita crishcamantami, mana c'uyaipajta c'uyashcata chasquishcanchij. Chaipimi sinchicuna canchij. Chaimantami Diospaj sumaj cashcata chasquina yuyailla cushicucunchij.

3Mana chaillachu, ashtahuanpish llaquicunapipishmi cushicucunchij. Llaquicunaca mana p'iñarijta ruraj cashcatami yachanchij.

4Mana p'iñarij canaca crijtaj cashcata ricuchinami, crijtaj cashcata ricuchijca shuyana yuyaillami.

5Shuyaj yuyailla canaca mana pingachinchu. Diosca paipaj jucha illaj Espirituta ñucanchijman cushpami, paipaj c'uyaitaca ñucanchij shungupi tallirca.

6Cristoca ñucanchijllataj mana quishpiripaj cajpimi, pai huañuna punlla chayajpica, Diosta mana rijsijcunamanta huañurca.

7Cashcata rurajmantapish pi mana huañusha ninmanchu. Shina cajpipish alli cajmantaca, maijan huañusha ninmanchari.

8Ashtahuanpish ñucanchijca juchayujcuna cajpiraj Cristo ñucanchijmanta huañujpimi, Diosca ñucanchijta c'uyaj cashcataca ricuchin.

9Tucuimanta yallica Cristopaj yahuarhuan justificashcacunami canchij. Chashna cashpami, Dios p'iñarishpa llaquichinamantaca quishpichishca cashun.

10Diosta p'iñajcuna cajpipish, paipaj Churi huañushcamantami, Diosca ñucanchijhuan alli tucurca. Ashtahuancarin ña alli tucushca cashcamantaca, Jesús causacushcamantaca quishpichishcami cashun.

11Mana chaillachu, Dioshuan alli tucunataca ñucanchij Mandaj Jesucristomanta chasquishcamantami Taita Diospica cushicunchij.

Adanmantapish Cristomantapish

12Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca.

13Mandashca manaraj tiyajpimi, juchaca cai pachapica ña tiyarca. Mandashca mana tiyashcamantami chai juchataca imata mana nishca.

14Chashna cajpipish, Dios mandashcata Adán p'aquishca shina mana p'aquishpapish juchallijcunataca, Adanmanta Moisescamami huañuica mandarca. Adanca shamuna cajta ricuchijmi carca.

15Ashtahuanpish Dios cushcaca, mandashcata p'aquishcata yalli ashtahuan allimari. Dios mandashcata shuj runa p'aquishcamantaca, achcacunami huañurcacuna. Mana c'uyaipajta c'uyashpa shujlla runa Jesucristomanta Dios cushcaca, achcacunapaj yallitaj allipajmi shamurca.

16Dios cushcaca, shuj runa juchallishca shinaca mana canchu. Ima shina rurashcata ricuchishpa llaquichinaca shuj juchallamantami, jatun llaquiman cachangapajtaj shamurca. Ashtahuanpish Dios cushcaca, mandashcata achcacuna p'aquishcamantami justificangapaj shamurca.

17Mandashcata shuj runa p'aquishcamantami, huañuica mandai callarirca. Ashtahuanpish Diosca mana c'uyaipajta c'uyashpa yallijta cushcamantami, justificashcata chasquincuna. Chaicunami shujlla Jesucristomanta shamuj causaipica mandangacuna.

18Mandashcata shuj runa p'aquishcamantami, tucuicunata jatun llaquiman cachanaca callarirca. Chashnallatajmi shuj cashcata ruraj runamantaca, justificashpa tucuicunaman causaita cunapish callarirca.

19Shuj runa mana cazushcamantami, achcacuna juchayujcuna tucurcacuna. Chashnallatajmi shuj runa cazushcamantaca, achcacuna cashcata rurajta rurashca tucungacuna.

20Jucha ashtahuan mirarichunmi, Mandashcaca yaicushca. Jucha ashtahuan mirarijpica, Dios mana c'uyaipajta c'uyanacarin yallitajmi mirarirca.

21Ima shinami juchaca huañuiman apangapaj mandacurca, chai shinallatajmi ñucanchij Mandaj Jesucristomantaca, mana c'uyaipajta c'uyaipish justificashcacunataca huiñai causaita cushpa huiñaipaj mandanga.