MARCOS 8 - Quichua Chimborazo Bible

Chuscu huaranga gentecunaman carashcami(Mt 15.32-39)

1Chai punllacunami achcacuna Jesuspajman shamushpa tandanacurcacuna. Chaicunaca ima micunapish illajlla cajta ricushpami Jesusca paipaj yachacujcunata cayashpa:

2–Caipi cajcunaca ñamari quimsa punllacunata ñucahuan caipi. Ima micunata mana charijpimi paicunataca llaquinayan.

3Taucacunami caru llajtamanta shamushcacuna. Mana micushcata huasiman cachajpica, ñahui amsayashpa ñanpi urmanamantami paicunataca mana cachai tucuni– nirca.

4Chaimi yachacujcunaca:

–¿Pitaj maimantataj cai shitashca pambapica, cai tucuicunamanca carangari?– nijpi,

5Jesusca:

–¿Mashna tandatataj charinguichij?– nijpi paicunaca:

–Canchis tandallatami charinchij– nircacuna.

6Chaimi tucui chaipi cajcunataca pambapi quinrilla siririchun mandarca. Chai canchis tandata japishpaca, Taita Diosta pagui nishpami chaupishpa chaupishpa paipaj yachacujcunaman curca. Yachacujcunaca tucui chaipi cajcunamanmi cararcacuna.

7Yachacujcunaca asha chalhuacunatapishmi charircacuna. Taita Diosta pagui nishpaca, chaicunatapish carachunmi curca.

8Chaitaca tucuicunami mana nijta micurcacuna. Puchushca mirga mirgataca canchis canasta jundatami tandarcacuna.

9Micujcunaca chuscu huaranga shinami carca. Carashca q'uipaca Jesusca cayacamachij nishpaca,

10yachacujcunandij barcoman yaicushpami, Dalmanuta llajtaman rirca.

Milagrota rurachun mañashcami(Mt 16.1-4; Lc 12.54-56)

11Fariseocuna shamushpaca, Jesús imapi pandarijpica juchachingapaj nishpami, jahua pachamanta cashpaca milagrota rurashpa ricuchi nishpa Jesushuan rimanacui callarircacuna.

12Chaimi Jesusca shungu llujshishpa:

–Cai punllacunapi causajcunaca ¿ima nishpataj milagrota rurachun nincunachu imamí? Paicunamanca ima milagrota manataj ricuchishcachu canga. Chashnatajmi canga– nirca.

13Paicunata chaipi saquishpaca, barcoman cutin yaicushpami cucha caishuj lado uriman ch'imbarca.

Fariseocunapaj levadurami(Mt 16.5-12; Lc 12.1-3)

14Yachacujcunaca tandata apanatami cungashca carca. Barcopica shuj tandallatami charircacuna.

15Jesusca:

–Riquichij, fariseocunapaj Herodespaj levaduramantaca huaquichiringuichij– nijpimi,

16yachacujcunaca:

–Tandata mana apamushcamantami chashna nin– ninacurcacuna.

17Chaita Jesús yachashpami:

–¿Imatataj rimanacucunguichij? ¿Tandata mana charishcamantachu rimanacunguichij? ¿Manarajchu entendinguichij, manarajchu yuyaita japinguichij? ¿Cancunapaj shunguca rumi shinarajchu?

18¿Ñahuita charishpapish manachu ricunguichij, rinrinta charishpapish manachu uyanguichij? ¿Manatajchu yuyaringuichij?

19Pichca huaranga gentecunaman pichca tandamanta ñuca chaupishpa chaupishpa carajpica ¿mashna canasta jundatataj puchushcacunataca tandarcanguichij?– nijpica, paicunaca:

–Chunga ishqui canastata– nircacunami.

20–Shinallataj canchis tandamanta chuscu huaranga gentecunaman ñuca chaupishpa chaupishpa carajpica ¿mashna canasta jundatataj puchushcacunataca tandarcanguichij?– nijpi paicunaca:

–Canchis canastata– nircacunami.

21Chaimi Jesusca:

–Chaita ricushca jahuachu ¿manaraj entendinguichij?– nirca.

Mana ricuj runata Betsaidapi Jesús alliyachishcami

22Chai q'uipami Jesusca, Betsaidaman chayarca. Jesús chaipi cajpimi, mana ricuj runata pushamushpa, paipi tuparichun rogarcacuna.

23Chaimi Jesusca mana ricuj runataca maquimanta japishpa, chai pueblomanta llujshichishpa, chai runapaj ñahuipi ch'ucata churashpa, maquicunata paipaj jahuapi churashpaca: ¿Imallatapish ricunguichu? nishpa tapujpi,

24ña ricushpaca:

–Runacunaca yuracuna shinami ricurin. Paicunaca puricuncunamari– nirca.

25Chaimi Jesusca, maquicunata ñahuipi churashpaca: “Cutin ricui” nirca. Chaipica ña alliyashpa mai carutapish tucuita alli ricucujmi saquirirca.

26Chaimi Jesusca:

–Chai pueblomanpish ama tigrashpa, alliyachishcatapish piman ama huillashpa cambaj huasiman rilla– nishpa cacharca.

Pedroca Jesustaca Quishpichij Cristomi cangui nishcami(Mt 16.13-20; Lc 9.18-21)

27Jesusca paipaj yachacujcunandij, Filipo callarichishca Cesarea pueblocunaman ñanta ricushpami, paipaj yachacujcunataca:

–Gentecunaca ¿pi cashcatataj ñucataca yuyancuna?– nishpa tapujpi,

28paicunaca:

–Shujcunaca, Bautizaj Juanmi. Caishujcunaca, Eliasmi. Maijancunaca profetacunamanta maijantajshimari yuyachin nincunami– nircacuna.

29Chaimi Jesusca:

–Cancunaca ñucataca ¿pi cashcatataj yuyanguichij?– nijpi, Pedroca:

–Canca Cristomi cangui– nirca.

30Chaimi paipaj yachacujcunataca: “Ñuca pi cashcataca pajta piman huillanguichijman” nirca.

Jesusca pai huañuna cashcata huillashcami(Mt 16.21-28; Lc 9.22-27)

31Chaipimi Jesusca, Runa Aichayujca achca llaquita apanatajmi can nishpa yachachi callarirca. Cunaj yuyajcunapish, curacunata mandajcunapish, mandashcacunata quillcajcunapish paitaca yangallami nishpami huañuchingacuna. Huañuchijpipish quimsa punllapica causaringallami nircami.

32Yachacujcuna alli entendichunmi chashna nishpa huillarca. Pedroca Jesusllata chaininijman pushashpami ama chashna nirichu nishpa jarcasha nirca.

33Ashtahuanpish Jesusca yachacujcunata tigrarishpa ricushpami Pedrotaca:

–¡Ñuca ñaupajmanta anchui, Satanás! Taita Dios imata pajtachisha nicushcataca mana yuyanguichu. Ashtahuanpish runacunapaj yuyaillatami yachangui– nirca.

34Gentecunatapish, yachacujcunatapish cayashpaca:

–Maijanpish ñucata catisha nijca, quiquin causaita ama llaquichun. Chacatashca shina llaquita apana tucushpa ñucata catichun.

35Pipish quiquin causaita quishpichisha nijca, chingaringami. Pipish ñucata catishcamanta, alli huillaimantapish quiquin causaita chingachijcunami, quishpiringa.

36Runaca cai pachapi tucui tiyajcunata japishpapish, paipaj almata chingachishpaca ¿ima allitaj cangari?

37Paipaj almata quishpichingapajca ¿imatashi cunga?

38Cunan cai punllacunapi causaj huainayaj millaicunapaj ñaupajpi, ñucamanta, ñuca yachachishcacunamantapish maijan pingarijtaca Runa Aichayuj ñucaca jucha illaj angelcunandij, ñuca Yayapaj achij nicuj sumaj cashcahuan shamushpaca, paimantapish pingarishami– nircami.