1Shuj punllami Saulpaj churi Jonatanca, macanacunata apaj paipajta rurajtaca:
–Shamui, filisteocunapaj soldadocuna cuidacunman ch'imbangapaj– nirca.
Chaitaca paipaj yayamanca mana yachaj chayachircachu.
2Saulca 600 shina runacunandijmi Migrón pueblopi caj granada yura ucupi carca. Chai puebloca Gabaa c'uchupimi carca.
3Efod nishcata apajca, Ahitob curapaj churi Ahiasmi carca. Ahitobca, Icabodpaj huauquimi carca. Ahitobca, Fineespaj churimi carca. Fineesca, Elipaj churimi carca. Elica, Silo pueblopimi Mandaj Diospajta ruraj cura carca.
Israelcunaca Jonatán rishcataca mana yacharcacunachu.
4Filisteocuna cuidacunman Jonatán pasanaca ishquindij ladota jatun peñacuna chaupitami shuj shujlla quichqui ñanta rina carca. Chai peñacunaca shujca Boses, caishujca Sene shutimi carca.
5Janaj ladoman caj peñaca, Micmas pueblo ladomanmi carca. Ura ladoman caj peñaca, Gabaa pueblo ladomanmi carca.
6Jonatanca, paipaj macanacunata apajtaca:
–Cuidacuj circunsicionta mana rurashcacunapajman ch'imbashpa jacu. Mandaj Diosca ñucanchijpaj imallatapish rurangapishchari, paipajca ima mana sinchichu. Achcahuan cashpapish ashallahuan cashpapish, paica mishachinllami– nirca.
7Chaimi paipaj macanacunata apajca:
–Cambaj shungupi imata yuyashcata rurailla, ñucapish caipimi cani can munashcata rurangapaj– nirca.
8Shina nijpi Jonatanca:
–Jacu, paicunapajman ch'imbashpa paicunapi ricuringapaj.
9Paicuna cashna nijpica: Ñucanchij cancunapajman shamungacama chaillapitaj shuyaichij nijpica, ñucanchij maipi cashcallapitaj shuyashpa paicunapajmanca mana huichiyashunchu.
10Ñucanchijta paicunapajman huichiyachun nijpica, paicunapajman huichiyashunllami. Paicuna chashna nishcaca Mandaj Dios paicunata ñucanchij maquipi churashca cashcata ricuchijmi canga– nircami.
11Chashna nishpaca cuidacuj filisteocunapi ishquindijtaj ricurijpimi, paicunaca: “Riquichigari, hebreocunaca miticushpa tiyacun jutcucunamantamari llujshicuncuna” ninacurcacuna.
12Chaita ricushpami cuidashpa chapacujcunaca, Jonatantapish, paipaj macanacunata apajtapish:
–Caiman huichiyamuichij, ñucanchijca cancunamanca shuj huillanatamari huillashun ninchij– nijpimi Jonatanca, paipaj macanacunata apajtaca:
–Ñucata catishpa jaculla. Mandaj Diosca paicunataca, israelcunapaj maquipimari ña churashca– nirca.
13Jonatanca, paipaj macanacunata apajta catichishcami, maquicunahuan chaquicunahuan llucashpa huichiyarca. Filisteocuna Jonatanpaj maquipi urmajpica, paipaj macanacunata apajmi huañuchishpa catirca.
14Punta huañuchipica Jonatanhuan, paipaj macanacunata apajllahuanmi chashna rurarcacuna. Chaipica ishqui chunga shina filisteocunatami, shuj yunta chaupi punllacama yapuna shinalla allpapi huañuchircacuna.
15Chaimi filisteocunaca carpa huasipi cajcunapish, canllaman cajcunapish, tucui cuidaj soldadocunapish, yallitaj mancharircacuna. Chapaj soldadocunatapish, mirga mirga chaupishca soldadocunahuan llujshimuj shuhuashpa purijcunatapish tucuicunatami jatun manchai japirca. Allpapish chujchujpi yallitaj jatun manchaimi japirca.
16Saúl churashca cuidaj soldadocunaca, Benjamín aillupaj Gabaa pueblomantami chai achca gentecuna musparishpa, caiman chaiman callpanacushpa caita chaita rijta ricurcacuna.
17Chaimi Saulca paihuan cajcunataca:
–Ñucanchijpuramanta maijantaj illan, yupashpa ricuichij– nijpi tucuicunata yupashpaca Jonatanhuan, paipaj macanacunata apaj runahuan illashcata ricurcacuna.
18Chai punllapica Diospaj arcaca israelcunapurapimi carca. Chaimi Saulca Ahiastaca:
–Diospaj arcata apamui– nirca.
19Ahías curahuan Saúl rimacujpirajmi, filisteocunapaj carpa huasicunapi bullaca ashtahuan ashtahuan mirarishpa catirca. Chaimi Saulca curataca:
–Saquilla, ama apamugrichu– nirca.
20Chai q'uipami Saulca tucui paihuan cajcunata tandachishpa macanacucun chaiman chayagrirca. Chaipimi filisteocunataca musparinacushpa espadacunata llujshichishpa paicunapurallataj macanacucujta ricurcacuna.
21Maijan hebreocunaca, ñaupamantami filisteocunapurapi causarcacuna. Chaimantami paicunaca filisteocunapaj soldadocunahuan tandanacungapaj huichiyarcacuna. Chai hebreocunaca Saulhuan Jonatanhuan caj Israel soldadocunapurami tucurcacuna.
22Efraín urcupi miticushpa tiyacuj israelcunapish filisteocuna miticushpa callpacun nijta uyashpami, paicunapish catishpa macanacushpaca,
23Bet-avén pueblocama catircacuna. Chashnami chai punllaca Mandaj Diosca israelcunataca quishpichirca.
24Chai punllaca israelcunaca yallitaj shaicushcami carca. Saulca israelcunataca: “Manaraj tutayajpi, ñucata p'iñajcunata manaraj tigra llaquichishpaca, mana micunachu canchij nishpami ari nichirca. Maijanpish micujca jatun llaqui tucushcatajmi canga” nishcamantami israelcunaca imallatapish pi mana micurcacuna.
25Tucui israelcunami achca yuracuna tiyan pambaman chayarcacuna. Chai pambapica sacha chuspi huachashca mishquimi tiyarca.
26Chai yuracuna chaupiman israelcuna yaicushpaca, sacha chuspipaj mishquica yacu shina pambata ricujtami ricurcacuna. Ashtahuanpish manataj micuchun nishpa ari nichishcamanta manchashpami pi mana micurcacuna.
27Jonatanca, israelcunata paipaj yaya manataj micushunchu nishpa ari nichishcata mana uyashcamantami, pai charicushca varahuan chai mishquita japishpa chai varamantaca maquihuan japishpa micujpi paipaj ñahuicunaca achijllata ricurca.
28Chaimi israelcunapuramanta shujca:
–Cambaj yayami tucui israelcunataca cunan punllaca manataj micushunchu nishpa ari nichirca. Maijanpish micujca llaqui tucungatajmi nircami. Chaimantami tucuicuna ña huañunalla– nircami.
29Chaimi Jonatanca:
–Ñuca yayaca, cai llajtapi causajcunataca muspachishcamari. Riquichij, sacha chuspipaj asha mishquita micujpimari ñuca ñahuicunaca achijllata ricun.
30Jarcashca mana tiyashca cajpi, p'iñajcunata cunan punlla quichumushcacunata tucui israelcuna micushca cashpaca ¿ima shinashi canman carca? ¿Manachu filisteocunataca ashtahuan huañuchinchijman carca?– nircami.
31Chai punllapica israelcunaca, Micmasmanta Ajalón pueblocama filisteocunata mishashcamantami shaicushcacuna carca.
32Chaimi israelcunaca filisteocunata quichumushca ovejacunatapish, vacacunatapish, bizicunatapish urmachishcahuan cungata p'itishpa aichataca yahuarndijta micurcacuna.
33Chaipimi Saulmanca cashna huillarcacuna:
–Israelcunaca yahuarndij aichata micushpami, Mandaj Diosta p'iñachishpa juchallicuncuna– nijpimi Saulca:
–¡Cancunaca pajtachishun nishpapish mana pajtachijcunami canguichij! Shuj jatun rumita singuchishpa caiman apamuichij– nirca.
34Cashnapishmi nirca: Tucui Israelta caita chaita rishpa cashna nichij. Tucuicuna quiquin huagrata, quiquin ovejata caiman apamushpa cungata p'itishpa caipi micuichij. Yahuarndij aichata micushpa Mandaj Diosta p'iñachishpa ama juchallichijchu nigrichij– nircami.
Tucui israelcunami chai tutaca quiquin huagrata apamushpa chaipi cungata p'itircacuna.
35Saulca chaipica, Mandaj Diospaj shuj altartami rurarca. Chai altartami Mandaj Diospajca punta rurarca.
36Chaimi Saulca:
–Cunan tutallataj filisteocunahuan macanacungapaj uriyashunchij. Shujllatapish mana saquishpa tucuicunata huañuchishpa pacarinapajca paicuna imalla charishcacunata quichumushunchij– nijpi paicuna:
–Tucui imapish cambaj yuyaipi alli cajpica, chaita rurailla– nijpi curaca:
–Manaraj macanacuiman rishpa Diostaraj tapushunchij– nirca.
37Saulca Taita Diostaca:
–¿Filisteocunata catishpa uriyashachu? ¿Paicunataca israelcunapaj maquipi churanguichu?– nishpami tapurca.
Ashtahuanpish Mandaj Diosca, chai punllaca imata mana cutichircachu.
38Chaimi Saulca:
–Cunanca soldadocunata mandajcuna tucuicuna caiman tandanacumuichij. Maijan ima juchata rurashcamantataj caica tucunchij. Tapuichij, ricuichij.
39Israelcunata quishpichij ¡Mandaj Diosca causajmi! Ima mana allita rurashca cashpaca ñuca churi Jonatán cashpapish huañungatajmi– nijpipish, tucui israelcunaca pi imata mana nircachu.
40Saulca, tucui israelcunatami:
–Cancunaca shuj ladoman shayarichij, ñucapish, ñuca churi Jonatanpish shuj ladoman shayarishun– nijpi israelcunaca Saultaca:
–Allimi, can yuyashca shina rurailla– nircacuna.
41Saulca, israelcunata Mandaj Diostaca:
–Maijan juchallishpa mana allita rurashca cajpica, chaitataj ricuchipai– nishpa sorteajpica, Saulpaj, paipaj churi Jonatanpajmi urmarca. Tucui israelcunaca ima juchachina illajllami saquirirca.
42Saulca:
–Cunanca ñuca churi Jonatanpaj, ñucapaj sorteachij– nijpi sorteajpica, Jonatanpajmi urmarca.
43Chaimi Saulca Jonatantaca:
–¿Imatataj rurarcangui? huillai– nijpi Jonatanca:
–Mana pacashpami huillana cani. Ñuca apamucushca caspi puntahuanmi sacha chuspi huachashca asha mishquita japishpa micurcani. ¿Chaimantatajchari huañushari?– nirca.
44Chaipimi Saulca:
–Jonatán, canca huañunatajmi cangui. Canta mana huañuchijpica, Taita Dios ñucata jatunta llaquichichun– nirca.
45Shina nijpipish israelcunaca Saultaca:
–Cai jatun macanacuipi israelcunata quishpichij Jonatanchu ¿huañunga? ¡Maitataj chashnaca cangari! Mandaj Diosca causajmi. Taita Dios paihuan cajpimi chashnaca rurarca. Jonatanpaj umamantaca shuj ajchallapish mana pambaman urmangachu– nircacuna. Chashnami israelcunaca Jonatantaca huañunamanta quishpichirca.
46Saulca filisteocunataca ña mana ashtahuan catishpa rircachu. Filisteocunapish paicunapaj llajtaman rircallacunami.
47Saulca, israelcunata jatun mandaj tucushca q'uipaca, muyundijpi caj paita p'iñaj cai llajtacunahuanmi macanacurca. Moab, Amón, Edom llajtacunahuanpish, Soba llajtata jatun mandajcunahuanpish, filisteocunahuanpishmi macanacushpa misharca. Maipi macanacugrishpapish paica mishajtajmi carca.
48Saulca soldadocunata tandachishpami, amalecitacunata mishashpa, israelcunataca imatapish quichujcunapaj maquimanta llujshichirca.
49Saulpaj churicunaca, Jonatán, Isúi, Malquisúa shuticunami carca. Paipaj ishqui ushushicunapaj shuticunaca punta ushushica Merab, q'uipa ushushica Micalmi carca.
50Saulpaj huarmica, Ahimaas runapaj ushushi Ahinoammi carca. Saulpaj soldadocunata mandajca, Saulpaj tio Nerpaj churi Abnermi carca.
51Saulpaj yaya Cispish, Abnerpaj yaya Nerpish Abielpaj churicunami carca.
52Saulca tucui paipaj causaipimi filisteocunahuanca yallitaj sinchita macanacuj carca. Chaimi Saulca c'ari c'ari caj macanacushpa mishaipajtaj caj runacunata paipaj soldadocuna cachunca japij carca.
Who We AreWhat We EelieveWhat We Do
2025 by iamachristian.org,Inc All rights reserved.
