PROVERBIOS 29 - Quichua Chimborazo Bible

1Jarcacushca jahua mana cazuj

runaca, ñapish chingaringallami.

Paipajca ima jambi mana tiyangachu.

2Cashcata rurajcuna mandajpica,

tucuicunami cushicuncuna.

Ashtahuanpish Diosta mana manchaj runa

mandajpica, llaquihuan aij nincunami.

3Alli yachaita c'uyaj churica,

yayatamari cushichin.

Ashtahuanpish huainayaj huarmicunahuan

puricujlla runaca tucui charishcatami

tucuchinga.

4Cashcata ruraj jatun mandajca,

llajtataca sinchitami shayachin.

Ashtahuanpish cullquita yalli mañajca,

tucui llajtatami huajchayachin.

5Maijanpish shujtajta alli nij tucujca,

ñaupajpi linchita churaj shina umanllami.

6Millai runaca juchallapitaj

tsagnarishpa urmanllami.

Ashtahuanpish cashcata ruraj runaca,

cushicuihuan cantashpami causan.

7Cashcata ruraj runaca,

huajchacunapaj llaquita ricunmi.

Ashtahuanpish Diosta mana manchaj runaca,

chai alli yachaitaca mana charinchu.

8Pitapish mana cazushpa asijcunaca,

tucui pueblocunapimi ninata japichincuna.

Ashtahuanpish alli yachajcunaca,

p'iñanacuitapish anchuchinmi.

9Yachaisapa cashpapish rumi shungu

runahuan p'iñanacuipi yaicushpaca,

asijpipish p'iñarijpipish mana

allichi tucungachu.

10Pitapish mana llaquishpa huañuchijcunaca,

ima pandata mana ruraj runataca p'iñanmi.

Ashtahuanpish alli runacunaca, paita

cushichinatami mashcancuna.

11Rumi shungu runa p'iñarishpaca,

shungu yuyashcata ruranllami.

Ashtahuanpish yachaisapa runaca,

jarcashpa upallachinmi.

12Mandajllataj llulla huillashcata

chasquijpica, tucui paita servijcunami

Diosta mana manchangacuna.

13Huajcha runahuan, cullquita alquilachij

runahuanca ishquimi purin.

Mandaj Diosmi ishquindijman causaita cun.

14Huajchacunapajpish allita ruraj jatun

mandajca, mandanapica huiñaitami

tiyacungalla.

15Alli tucuchun anguhuan llaquichijpimi,

huahuacunaca alli yachaj huiñancuna.

Ashtahuanpish imata rurachunpish saquijllapica,

mamallatatajmi pingachinga.

16Diosta mana manchajcuna llajtapi

jundarijpica, ashtahuan llaquicunami tiyan.

Ashtahuanpish cashcata rurajcunaca,

paicuna llaqui tucujtaca ricungacunami.

17Cambaj churitaca, alli tucuchun

llaquichingui.

Chashna rurajpimi cantaca samachinga.

Cambaj shungu cushicunatamari causanga.

18Dios ima nishcata pipish mana huillajpica,

tucuicunamari cacharishcacuna tucun.

Ashtahuanpish Dios mandashcata

pajtachijca cushicunmi.

19Servij runataca mana rimashpalla,

allichi tucuipajchu.

Rimajllapica, entendishpapish mana

cazunchu.

20¿Manapish alli yuyarishpa rimarijlla

runa imata rurajta ricushcanguichu?

Chaipaj randica rumi shungu runarajchari

imallatapish ruranman.

21Uchillamantapacha amo yallitaj c'uyashpa,

imata mana mitsashca huiñaj runaca

q'uipataca amo charishcataca quichunllami.

22Yallitaj p'iñarijlla runaca,

p'iñanacuita callarichinllami.

Yalli pi'ñarij runaca, ima llaquitapish

ruranllami.

23Jatun tucujtaca, chaillataj

pingaipi churanllami.

Ashtahuanpish mana jatun tucushca runataca,

pai alli cashcallatajmi huaquichin.

24Shuhua runahuan shuj yuyailla tucujca,

quiquin causaitami p'iñan.

Chaimantami llaqui tucushca alli canman

nijta uyashpapish, manataj huillan.

25Runata manchanaca tsagnarishpa

urmana linchimi.

Ashtahuanpish Mandaj Diosca, paipi

shunguta churajtaca huaquichingami.

26Achcacunami mandajtaca quiquinpajlla

allita rurachun mashcancuna.

Shina cajpipish Mandaj Diosmari

tucuicunallamantaj ima shina cashcata

ricushpa cun.

27Millai runaca cashcata rurajcunapajca,

p'iñananami ricurin.

Allita rurashpa causajpish, Diosta mana

manchaj runapajca, p'iñananami ricurin.