2 REYES 18 - Quichua Chimborazo Bible

Judá llajtata Ezequías mandashcami(2 Cr 29.1-2)

1Elapaj churi jatun mandaj Oseas Israel llajtata quimsa huatata ña mandacujpimi, Acazpaj churi Ezequiasca, Judá llajtata mandai callarirca.

2Ezequiasca mandai callarinapajca ishqui chunga pichca huatayujmi carca. Ishqui chunga iscun huatatami, Jerusalenpi mandarca. Paipaj mamaca, Zacariaspaj ushushi Abi shutimi carca.

3Ezequiasca paipaj ñaupa yaya David tucui imatapish rurashca shinallatajmi, Mandaj Diospaj ñaupajpica ima pandata mana rurarca.

4Ezequiasca lomacunapi tiyaj altarcunatapish anchuchircami. Rurashcalla dioscunatapish p'aquircami. Asera huarmi diosman rijchajcunatapish p'aquircami. Israelcunaca Moisés rurashca bronce culebrapaj ñaupajpi chai punllacama inciensota rupachicushcamantarajmi chai culebrataca ñuturca. Chai culebrataca, israelcunaca Nehustán nijcunami carca.

5Ezequiasca israelcunata Mandaj Diosllapimi shunguta churarca. Judá llajtata jatun mandajcunaca, paipaj ñaupaman mandajcunapish, paipaj q'uipa mandajcunapish pai shinaca mana tiyarcachu.

6Ezequiasca Mandaj Dios mandashcata Moisesman cushpa ima shinalla pajtachina cashcata mandashca shina huaquichishpa causashpami, Mandaj Diosllata catishpa paimantaca mana anchurirca.

7Chashna cajpi Mandaj Dios Ezequiashuan cajpimi, Ezequías maiman rijpipish tucuipi alli llujshirca. Chashna cashpami Ezequiasca Asiria llajtata jatun mandajta c'ariyashpa ña mana ashtahuan paicunapajta rurarca.

8Filisteocunatapish mishashpami, Gaza pueblocama llaquichishpa paicunapaj llajtapaj lindecunacama llaquichirca. Chapana torrecunatapish, muyundijta jatun pircayuj pueblocunatapish urmachircami.

Samariapi causajcunata Asiriaman prezu apashcami

9Ezequías Judá llajtata ña chuscu huatata mandacujpi, Elapaj churi Oseaspish Israel llajtata, ña canchis huatata mandacujpimi, Asiria llajtata jatun mandaj Salmanasarca Samariapi causajcunahuan macanacungapaj huichiyashpa Samaria muyundijta shayarishpa,

10quimsa huatapica pai japirca. Ezequías Judá llajtata sujta huatata mandacujpi, Oseaspish Israel llajtata iscun huatata ña mandacujpimi jatun mandaj Salmanasarca Samariataca chashna japirca.

11Asiria llajtata jatun mandajca, israelcunata Asiriaman prezu apashpaca, Halah pueblopi, Gozán jatun yacu c'uchupi caj Habor llajtapi, medocunapaj pueblocunapimi churarca.

12Israelcunaca paicunapaj Mandaj Dios rimashcataca mana uyarcacunachu. Ashtahuanpish Mandaj Dioshuan ari ninacushcataca p'aquircacunami. Mandaj Diospajta ruraj Moisés mandashcacunatapish mana uyasha nircacunachu. Chai mandashcacunapi nishcacunata mana rurashun nishcamantami chashna tucurcacuna.

Judá llajtaman Senaquerib yaicushcami(2 Cr 32.1-19; Is 36.1-22)

13Judá llajtata Ezequías chunga chuscu huatata ña mandacujpimi, Asiria llajtata jatun mandaj Senaqueribca, Judá llajtapi caj sinchi pircayuj pueblocunapi causajcunahuan macanacungapaj huichiyashpa chai pueblocunataca pai japirca.

14Chaimi Judá llajtata jatun mandaj Ezequiasca, Asiria llajtata jatun mandaj Laquis pueblopi cajpi: “Ñucaca mana allitamari rurashcani. Cunanca can imata rurachun nijpipish chaita rurashallami. Cai ñuca llajtamanta ripailla” nichun cacharca. Shina nijpimi Asiria llajtata jatun mandajca, Judá llajtata jatun mandaj Ezequiastaca, 300 talento cullquita, quimsa chunga talento curita cuchun nijpi,

15Ezequiasca, Mandaj Diospaj huasipi tiyacuj tucui cullquitapish, mandana huasipi huaquichishca tiyacuj achca valijcunatapish llujshichishpa curca.

16Ezequiasca Mandaj Diospaj huasi pungucunata, pungu quisyucunata, paillataj curihuan llihuichishcacunata tucui llujshichishpami, Asiria llajtata jatun mandajman curca.

17Chai q'uipaca Asiria llajtata jatun mandajca Laquis pueblomantaca Tartán, Rabsaris, Rabsaces mandajcunatami achca soldadocunahuan Ezequiaspajman cacharca. Paicuna Jerusalenman chayashpaca, chaipi causajcunahuan macanacungapajmi janaj ladoman caj tanqueman shamuj larca c'uchupi carpa huasicunata shayachishpa tiyarircacuna. Chaitami tajshajcunapaj allpaman rina ñan carca.

18Chaipi cashpami, jatun mandaj Ezequiasta cayarcacuna. Paicunahuan tupangapajca mayordomo Eliaquimpish, quillcaj Sebnapish, quillcacunata huaquichij Joapishmi llujshircacuna. Eliaquimca Hilciaspaj churimi carca, Joaca Asafpaj churimi carca.

19Paicunataca Rabsaces nishca mandajca:

–Asiria llajtata jatun mandaj cashna nichun cachashcata Ezequiasman huillaichij: ¿Maijanpi shunguta churashpataj canca mana manchanguiyari?

20Canca cambaj shimi rimarishcallahuanchu macanacuitaca c'ari c'ari soldadocunahuan shina jahualla mishanata yuyangui. ¿Maijanpi shunguta churashpataj ñucataca c'ariyasha ninguiyari?

21Cantaca Egiptopaj chijtaricuj carrizopi taunaricujtami ricuni. Chai chijtaricuj carrizopi maijanpish taunarijpica, jahuaman pasajtami maquipi yaicunga. Egiptota jatun mandaj faraonpi shunguta churajcunaca tucuicunami chashna tucunga.

22Ñucanchijta Mandaj Diospimi shunguta churanchij ninguichijmari. Chashna nishpaca ¿ima nishpataj lomacunapi paipaj tiyaj altarcunata anchuchishpa Ezequiasca judacunatapish, Jerusalencunatapish cai Jerusalenpi tiyaj altar ñaupajllapimi adorana ninyari?

23Cunanca Asiria llajtata jatun mandaj ñuca amohuan shuj ruranata ari ninacui. Can 2.000 caballopi tiyarij soldadocunata charijpica, ñucaca 2.000 caballocunata cusha.

24Egiptopaj carrocunapi, caballopi tiyarij gentecunapi shunguta churashpapish, ñuca amopaj soldadocunata mandajpajta rurajllahuanpish mana ch'imbapura shayari tucunguichu.

25Cai llajtata llaquichingapajca, manapish Mandaj Dios cachajpi shamushcataca ama yuyaichu. Mandaj Diosmari ñucataca: Chai llajtaman huichiyashpa tucui chingachi nirca ninmi nigrichij– nircami.

26Shina nijpimi Hilciaspaj churi Eliaquimpish, Sebnapish, Joapish Rabsacestaca:

–Cambajta ruraj ñucanchijmanca arameo rimaipi rimahuayari, chai rimaita yachapanchijmi. Ama Judá llajta rimaipi rimahuaichu, tucui cai jatun pirca jahuapi tiyacujcunamari uyacuncuna– nircacuna.

27Shina nijpipish, Rabsacesca:

–Ñuca amoca mana cancunaman, cancunapaj amomanchu caitaca huillanaman cacharca. Ashtahuanpish chai jatun pirca jahuapi tiyacujcunamantajmari huillanaman cacharca. Paicunaca quiquin mapallatataj micungapaj, quiquin ishpallatataj cancunandij ubyangapajmi tiyacuncuna– nircami.

28Chashna nishpaca Rabsacesca, alli shayarishpa Judá llajtapaj rimaipi sinchita caparishpami:

–Asiria llajtata jatun mandaj imata nishcata uyaichij.

29Paica cashnami nin: Ezequías umashcaca ama caichijchu. Paica ñuca maquimantaca cancunataca mana quishpichi tucungachu.

30Ezequías cashna nishpa Mandaj Diospi shunguta churachishcapish ama caichijchu. Paica Mandaj Diosca quishpichingatajmi. Cai pueblotaca Asiria llajtata jatun mandajpaj maquipica manataj churangachu ningami.

31Chashna nijpipish Ezequiastaca ama uyaichijchu. Ashtahuanpish Asiria llajtata jatun mandajca cashnami nin: Ñucata rogarishpa ñucahuan alli tucuichij. Chashna cashpaca quiquin uva chagracunamanta, quiquin higo yuracunamantami micunguichij, quiquin pugyucunamantami yacutapish ubyanguichij.

32Cancunata ñuca cancunapaj llajta shinallataj llajtaman pushaj shamungacamami chashna micunguichij chashna ubyanguichij. Ñucaca cancunataca granocunapish, vinopish, micunapish, uvapish, aceiteta cuj olivos yuracunapish, sacha chuspipaj mishquipish tiyaj llajtamanmi pushasha. Chaipica allimi causanguichij mana huañunguichijchu. Mandaj Diosmi quishpichinga nishpa Ezequías nishcataca ama uyaichijchu. Paica cancunataca umacunllami.

33Asiria llajtata jatun mandajpaj maquimantaca caishuj llajtacunapaj dioscunaca, mana quishpichi tucurcachu.

34Hamatpaj, Arfadpaj dioscunaca ¿maipitaj quishpichircari? Sefarvaimpaj, Henapaj, Ivapaj dioscunapish ¿maipitaj quishpichircari? Chai dioscunaca Samariataca ¿maipitaj ñuca maquimantaca quishpichi tucurcacunari?

35Mandaj Dios ñuca maquimanta cai Jerusalén pueblota quishpichingami nishpa shunguta churachunca, cai pachapi tiyaj dioscunaca ¿maijan diostaj paipaj llajtapi cajcunata ñuca maquimanta quishpichi tucushcari? ninmi– nircami.

36Chashna nijpipish, chaipi cajcunaca imata mana cutichishpa upalla carcallacunami. Jatun mandaj Ezequiasllatajmi: “Ama imata cutichishpa upalla canguichijlla” nishpa mandashca carca.

37Chai q'uipaca mayordomo Eliaquimpish, quillcaj Sebnapish, quillcacunata huaquichij Joapish, churanacunata lliquirishcacuna jatun mandaj Ezequiaspajman shamushpami Rabsaces imallata nishcata tucuita huillarcacuna. Eliaquimca, Hilciaspaj churimi carca. Joaca, Asafpaj churimi carca.