JOSUÉ 8 - Quichua Chimborazo Bible

Hai pueblopi causajcunata tucui chingachishpa chai pueblota japishcami

1Mandaj Diosca Josuetaca: “Josué, ama manchaichu. Chai llajtapi causajcunataca ña mana mishashunchu nishpa ama yuyaichu. Hai pueblota jatun mandajtaca chai pueblondij, pai mandacun gentecunandij, tucui paipaj llajtandijmi cambaj maquipi churani. Chaimanta tucui macanacuj runacunata pushashpa Hai puebloman huichiyashpa macanacugri.

2Jericó pueblopi causajcunata jatun mandajtapish, chaipi causajcunatapish tucuitami chingachircanguichij. Chai shinallataj Hai pueblopi causajcunatapish jatun mandajtapish chingachinguichij. Cunanca paicuna ima charishcacunata, animalcunata quichushcacunataca cancuna japinguichijlla. Paicunahuan macanacungapajca pueblo huashapi soldadocunata churai” nircami.

3Chaimi Josueca Hai pueblopi causajcunahuan macanacungapaj huichiyangapajca 30.000 c'ari c'ari runacunata agllashpa, Hai puebloman tuta cachashpa,

4cashna nirca: “Riquichij, alli uyaichij. Chai pueblopica, pueblo huashanijlla mana achca carupi miticunguichij. Paicuna llujshijpica macanacunalla shuyanguichij.

5Ña cancuna chaipi cajpica, ñucahuan tucui caipi cajcunandijmi chai puebloman c'uchuyagrishun. Chai pueblopi causajcuna ñucanchijhuan macanacunaman llujshimujpica, ñaupaman callpashpa rij shinallatajmi callpashpa rishun.

6Pacatucugricuj shina ñucanchij callpajpica paicunaca: Sarun shinallatajmi ñucanchij callpachinchij yuyashpami, chai pueblomanta caruyangacama ñucanchijta catingacuna.

7Chai pueblomanta paicuna ña caruyajpica, cancunaca miticushcamanta llujshishcahuan chai pueblota llaquichingapaj yaicunguichijlla. Mandaj Diosca chai pueblotaca cancunapaj maquipimi churanga.

8Chai puebloman yaicushpa ninata japichishpaca, Mandaj Dios mandashca shinallataj tucuita rupachinguichij. Riquichij, ñucapish chashnallatajmi mandani” nircami.

9Josué chashna mandashpa cachajpi paicuna rishpaca Bet-el pueblohuan, Hai pueblohuan chaupipi miticushpa chapanamanmi rircacuna. Hai pueblomantaca inti huashicun ladomanmi miticurcacuna. Josueca chai tutaca carpa huasicuna maipi canllapitajmi israelcunahuan pacarirca.

10Josueca cayandij tutamanta utcata jatarishpami paihuan pacarijcunata alli allichirishcata ricushpaca, israelcunata cunaj yuyajcunahuan ñaupashpa Hai pueblopi causajcunahuan macanacunaman huichiyarcacuna.

11Josuehuan rij macanacuj runacunaca Hai puebloman huichiyashpa chaiman c'uchuyashpaca, chai pueblo ch'imbanijmanmi tandanacurcacuna. Chaica Haimanta janaj ladomanmi carca. Paicuna maipi tiyacunmanta Hai pueblomanta chaupipica, pugru pambami tiyarca.

12Chaipi cashpami Josueca, Hai pueblomanta inti huashicun ladoman caj Bet-el pueblo ladomanca, 5.000 shina soldadocunataca pacalla chapachun churarca.

13Josueca soldadocunataca maillapi churajpi alli canapimi churarca. Tucui caishuj soldadocunataca janaj ladomanmi churarca. Paihuan cajcunataca Hai pueblomanta inti huashicun ladomanmi churarca. Josueca chai tutaca chaupi pugru pambacamami rirca.

14Israelcuna Hai puebloman chayagricujta ricushpaca, chai pueblopi causajcunata mandajca paipaj soldadocunata pushashcahuanmi israelcunahuan macanacungapaj utca llujshirca. Paicunaca israelcunapaj soldadocuna Hai pueblo huashaman pacalla chapacushcataca mana yacharcacunachu. Chaimantami Arabá pueblo ch'imbapuracama rircacuna.

15Hai pueblopi causajcuna shamujta ricushpaca, Josueca paihuan caj israelcunandijmi manchashpa tigraj shina tucushpa shitashca pamba ladoman callparcacuna.

16Hai pueblopi causajcunaca tucuicuna tandanacushpaca, Josueta catishpa rishpami, paicunapaj pueblomanta caruyarcacuna.

17Hai pueblopi causajcunapish, Bet-el pueblopi causajcunapish c'aricunaca shujllapish mana saquirishpami israelcunata catishpa, pueblo pungucunatapish pascashcata shitashpa rircacuna.

18Chaipimi Mandaj Diosca Josuetaca: “Can charicun lanzata Hai pueblo ladoman ricuchi. Paicunataca ñami cambaj maquipi churagrini” nijpimi Josueca, pai charicushca lanzata chai pueblo ladoman ricuchirca.

19Josué chashna rurajpica, pacallapi chapacujcunaca callpashpa Hai puebloman yaicushpami, chai pueblota rupachircacuna.

20Israelcunata catishpa ricujcuna paicunapaj pueblota tigralla ricunapajca, chai pueblomantaca mana jahualla cushni jahua pachacama llujshicujtami ricurcacuna. Paicuna chaita ricungacamaca shitashca pambata callpacuj israelcunapish paicunahuan macanacungapajmi tigrarcacuna. Chaimi Hai pueblopi causajcunaca maiman mana callpai tucurcacuna.

21Pacalla chapacujcuna Hai pueblota ña paicuna japishpa rupachijpi cushnicujta ricushpami Josuepish, paihuan caj israelcunapish paicunata caticujcunata huañuchingapaj tigrarcacuna.

22Hai pueblota rupachij israelcunapish chaimanta rishpa, chai pueblomanta llujshishcacunataca miticushpa rij tucucuj israelcunandij tucushpami chaupipi churarcacuna. Chashna rurajpimi, Hai pueblomanta cajcunaca maiman mana ri tucujpi tucuicunata huañuchircacuna.

23Hai pueblota jatun mandajllatami mana huañuchishpa, Josuepajman prezu apamurcacuna.

24Hai pueblopi causajcuna israelcunata llaquichingapaj shitashca pambacama catishpa rijcunataca, chaillapitajmi tucuicunata huañuchircacuna. Chashnami macanacunaman rijcunaca tucuicuna espadapi tucuringacama huañurcacuna. Chai q'uipaca israelcunaca chai pueblomanta mana llujshijcunatami tigrashpa tucuicunata huañuchircacuna.

25Chai punllapica Hai pueblopi causajcunaca c'aricunandij huarmicunandijmi, 12.000 gentecuna huañurcacuna.

26Josueca Hai pueblopi causajcunata tucui chingachingacamami, paipaj maquihuan lanzata chai pueblo ladoman ricuchicushcataca mana anchuchirca.

27Mandaj Dios Josueta mandashca shinallatajmi, israelcunaca Hai pueblopi causajcunapaj imalla tiyajcunatapish, animalcunatapish tucuita paicunapaj aparcacuna.

28Hai pueblota Josué tucui rupachijpica, ushpa montonllami saquirirca. Chashnami chai puebloca tucui ñutuchishca shitashca saquirirca. Chaica cunancama chashnallatajmi.

29Hai pueblota jatun mandajtaca, Josueca yurapi huarcushpa sipichunmi mandarca. Tutayangacamami huarcushca carca. Ña tutayajpica huañushca aichata uricuchishpami, Hai puebloman yaicuna pungullapi churashpa, chai jahuapica rumicunata montonachirca. Cunancamami chai rumicunaca chaipi tiyacun.

Moisesman cushca mandashcata Ebal urcupi Josué rezashcami

30Josueca, Ebal urcupimi israelcunata Mandaj Diospaj shuj altarta rurarca.

31Taita Diospajta ruraj Moisés israelcunata mandashpa ima shinalla quillcashca shinallatajmi, mana labrashca rumicunahuan altarta rurarcacuna. Chai altar jahuapimi Diosman cushpa tucui rupachinatapish curca. Dioshuan alli cangapajpishmi, animalcunata cushpa huañuchishpa rupachirca.

32Chai altar pircapica Josueca Moisesman cushca mandashcatami israelcunapaj ñaupajpi chai rumicunapi quillcarca.

33Tucui israelcunami paicunapaj cunaj yuyajcunandij, soldadocunata mandajcunandij, juezcunandij Mandaj Dioshuan ari ninacushca quillcata huaquichina arcata levita curacuna apashcacunapaj cada ladopi shayacurcacuna. Shuj chaupica Gerizim urcu ladoman, caishuj chaupica Ebal urcu ladomanmi shayacurcacuna. Israelcunapish paicunahuan caj mana israelcunapish chashnami shayacurcacuna. Mandaj Diospajta ruraj Moisés ñaupaman nishca shinallataj israelcunataraj alli cashca cachun nichunmi chashna shayarircacuna.

34Chaipi shayacujpimi Josueca, Dios quillcachishcataca allicunata cuna cashcamantapish, llaquichina cashcamantapish mandashcapi ima shina quillcashcatataj rezashpa uyachirca.

35Josueca Moisés cushca mandashcataca, shuj shimillatapish mana saquishpami, tucuita rezarca. Huarmicunamanpish, uchilla huahuacunamanpish, israelcunapurapi causacuj mana israelcunamanpish tucuicunamanmi rezashpa uyachirca.