EZEQUIEL 40 - Quichua Chimborazo Bible

Diospaj huasita muscuipi shina ricuchishcamanta

1Ñucanchijca ñami ishqui chunga pichca huatacunata prezu causacurcanchij. Chai huata callari quillapaj chunga punllapimi, Mandaj Diosca paipaj maquita ñuca jahuapi churashpa israelcunapaj llajtaman pusharca. Jerusalén pueblota quichushcapish, ñami chunga chuscu huata tucurca.

2Taita Diosmi ñucataca muscuipi shina Israel llajtaman pushashpa, chai llajtapi tiyaj jatun urcu jahuapi churarca. Chai urcu ura ladomanca, jatun pueblo vali shuj huasimi tiyashca carca.

3Chaimanmi ñucataca pushashpa rirca. Chaipica bronceman rijchaj achij nicuj runatami ricurcani. Paica lino cordeltapish, medina caspitapish maquipi aisashcami pungupi shayacurca.

4Chaimantaca chai runaca ñucataca cashnami nirca: “Huañujlla aichayuj runalla, cambaj ñahuicunahuantaj ricui, cambaj rinrincunahuantaj uyai, ñuca imata ricuchishcatapish cambaj shungupi huaquichi. Cantaca ñucami caiman pushamurcani. Can imalla ricushcataca, tucuita israelcunaman huillai” nircami.

5Shina nijpica chai huasi muyundijtaca, shuj pirca ricurircallami. Chai runa charicun medina caspica, quimsa metro chunga pichca centimetrohuanmi carca. Chai medina caspihuanmi pircataca medirca. Chai pircaca anchomanpish, altomanpish quimsa metro chunga pichca centimetrotami charirca.

6Chai q'uipaca, inti llujshin lado pungutami gradacunata huichiyashpa, pungu patacunata medirca. Chai patacunaca caishuj ladopish, chaishuj ladopish quimsa metro chunga pichca centimetrotami charirca.

7Chai punguta yaicunapica, corredormi tiyarca. Chai corredorpica, cada ladomanmi uchilla ucucuna tiyarca. Chai ucucunaca largomanpish, anchomanpish quimsa metro chunga pichca centimetrotami charirca. Cada ucumi ishqui metro, sujta chunga ishqui chaupi centímetro carupi rurashca carca. Shinallataj chai corredorta rishpami, shujtaj uchilla corredor tiyarca. Chai corredor pungu patacunaca caishuj ladomanpish, chaishuj ladomanpish quimsa metro chunga pichca centimetrotami charirca.

8Shinallataj chai pungu anchopish, quimsa metro chunga pichca centimetrollatajmi carca.

9Chai pungumanta huasi canllaman yaicunapica, shujtaj uchilla corredormi tiyarca. Chai corredor pungu anchoca, chuscu metro ishqui chunga centimetrohuanmi carca. Chai pungu pataca caishuj ladopish, chaishuj ladopish shuj metro pichca centimetrohuanmi carca.

10Inti llujshin ladoman caj pungu corredor ucupipish, cada ladomanmi quimsa uchilla ucucuna tiyarca. Chai ucucunapish, tucuicunami chai valillataj carca. Shinallataj cada lado pungu patacunapish, chai shinallatajmi medirca.

11Chai q'uipaca, yaicuna pungu anchotami medirca. Chaica pichca metro ishqui chunga pichca centimetrotami charirca. Shinallataj huasi canllaman llujshina corredortapishmi medirca. Chaica sujta metro, pusaj chunga ishqui chaupi centímetro largomi carca.

12Chai q'uipaca, chai uchilla ucu ñaupajpi tiyaj jarcata rurashca pircacunatami medirca. Chai jarcacunaca pichca chunga ishqui chaupi centímetro anchotami charirca. Shinallataj chai uchilla ucucunapish tucuicunallatajmi anchomanpish, largomanpish quimsa metro, chunga pichca centimetrohuan carca.

13Cada ladoman quimsa uchilla ucucuna tiyan ucutapishmi medirca. Shuj pata esquinamanta caishuj pata esquinacama medijpica, chunga quimsa metro, chunga ishqui chaupi centimetrohuan anchotami charirca. Chashnami shuj ladoman tiyacuj uchilla ucuman yaicuna pungumantaca caishuj ladoman tiyacuj uchilla ucumanta llujshina pungucamaca medirca.

14Shinallataj pungu patacunatapishmi medirca. Chai huasi canllapi tiyaj pungu patacunapish, corredorpi tiyaj patacunapish quimsa chunga shuj metro, pichca chunga centimetrotami muyujta charirca.

15Shinallataj huasi canllaman yaicuna pungumantaca, huasi canllaman llujshina pungucamami medirca. Chaica ishqui chunga sujta metro, ishqui chunga pichca centimetrotami charirca.

16Canlla ladomanta ricujpica, chai uchilla ucucunapipish, huasi canllaman llujshina corredorcuna muyundij patacunapipish, shuj uchilla ucumanta caishuj uchilla ucucama ch'canchishca patacunapipish canlla ladomanca, quichqui ucu ladomanca ancho ventanacunami tiyarca. Shinallataj pungu patacunapipish, palmeracunata rurashcami tiyacurca.

17Chai q'uipaca, huasi canllamanmi llujshichirca. Chai huasi canllapica, muyundijta pircashca jatun pata c'uchupimi, ucucunata rurashcata ricurcani. Chai muyundijta pircashca jatun pata c'uchupi rurashca ucucunaca, quimsa chungami carca. Chai ucucuna tiyacun ñaupaj pambapish, rumihuan sumajta churashcami carca.

18Shinallataj chai huasi canllaman yaicuna pungu c'uchutapish, cada ladotami rumicunahuan sumajta churashca carca. Rumicunahuan churashca pambaca, ashtahuan ucumanmi carca.

19Chai q'uipaca, huasi canllaman llujshina pungu ñaupajmantaca, huasi canllapi tiyaj caishuj pungu ñaupajcamami medirca. Chaita medijpica, pichca chunga ishqui metro, pichca chunga centímetro anchomi carca. Inti llujshin ladota medijpipish, janaj ladota medijpipish, chashnallatajmi medirca.

20Shinallataj huasi canllaman yaicuna janaj ladoman tiyaj pungutapishmi medirca. Chai punguta yaicunapipish jatun corredor shinami carca. Chaitapish mashna largo cashcata, mashna ancho cashcatami medirca.

21Chai punguta yaicuna jatun corredor ucupipish, cada ladomanmi quimsa uchilla ucucunapish, chaipi tiyaj pungu pata anchopish, pungu pata largopish, inti llujshin ladopi tiyaj punguta yaicuna jatun corredor ucupi tiyajcuna shinallataj medirca. Chai punguta yaicuna jatun corredorca, largomanpish ishqui chunga sujta metro, ishqui chunga pichca centimetrohuanmi carca. Anchomanca chunga quimsa metro, chunga ishqui chaupi centimetrohuanmi carca. Inti llujshin ladopi tiyaj pungu shinallatajmi medirca.

22Inti llujshin ladoman caj corredorpi tiyaj uchilla ucu ventanacunapaj arcocuna shinallatajmi medirca. Palmeracunapishmi tiyarca.

23Janaj ladoman caj punguca, caishuj punguhuan ch'imbapurami carca. Inti llujshin ladoman caj pungupish, huasi canllapi tiyaj punguhuan ch'imbapurami carca. Huasi canllaman yaicuna pungumanta huasi canllapi tiyaj pungucama medijpica, pichca chunga ishqui metro, pichca chunga centimetrohuanmi charirca.

24Chai q'uipami ura lado zaguanman pusharca. Chai zaguán ucupi tiyaj corredorpish, arcocunapish, inti llujshinman caj zaguán ucupi tiyaj corredor shinallatajmi medirca.

25Chai corredor ucupipish, ventanacunapish, arcocunapish muyundijtami tiyarca. Caishuj pungu corredorpi tiyaj ventanacuna shinallatajmi carca. Chai corredorca largomanca, ishqui chunga sujta metro, ishqui chunga pichca centimetrohuanmi carca. Anchomanca chunga quimsa metro, chunga ishqui chaupi centimetrohuanmi carca.

26Chai pungu ñaupajpica, canchis gradacunami tiyarca. Chai pungucunapica, arcocunata rurashcami carca. Shinallataj pungu patacunapipish, cada ladomanmi palmeracunata rurashca carca.

27Huasi canllaman yaicuna pungumantaca, huasi canllapi tiyaj pungucamami medirca. Chaica pichca chunga ishqui metro, pichca chunga centimetrohuanmi medirca.

28Chai q'uipami, huasi canllapi tiyaj ura lado pungullamantaj pusharca. Chai pungupish, caishuj pungucuna shinallatajmi medirca.

29Chai pungu corredor ucupipish uchilla ucucuna, pungu patacuna, arcocuna, ventanacunami tiyarca. Chaicunapish caishuj pungucunapi tiyajcuna shinallatajmi medirca. Chai corredorca largomanca ishqui chunga sujta metro, ishqui chunga pichca centimetrohuanmi carca, anchomanca chunga quimsa metro, chunga ishqui chaupi centimetrohuanmi carca.

30Pungucunapi rurashca arcocunaca, chunga quimsa metro, chunga ishqui chaupi centimetrohuanmi carca. Tucui pungucunallatajmi ishqui metro, sujta chunga ishqui chaupi centimetrohuan carca.

31Chai pungucunapi rurashca arcocunaca, huasi canllamanmi carca. Shinallataj pungu patacunapipish, palmeracunata rurashcami carca. Chai pungu corredor ucuman yaicunapajca, pusaj gradacunami tiyarca.

32Chai q'uipaca, inti llujshin ladoman caj huasi canllapi tiyaj pungumanmi pusharca. Chai pungupish, caishuj pungucuna shinallatajmi carca.

33Chai pungu corredor ucupipish, uchilla huasicunami tiyarca. Shinallataj pungu patacunapish, pungupi rurashca arcocunapish caishuj pungupi tiyajcuna shinallatajmi medirca. Chai corredor ucupica, muyundijtami ventanacunatapish, arcocunatapish rurashca carca. Chai corredorca largomanca, ishqui chunga sujta metro, ishqui chunga pichca centimetrohuanmi carca. Anchomanca chunga quimsa metro, chunga ishqui chaupi centimetrohuanmi carca.

34Chai corredor pungucunapi rurashca arcocunaca, huasi canllamanmi carca. Pungu patacunapipish, cada ladomanmi palmeracunata rurashca carca. Chai pungucunaman yaicunapajpish, pusaj gradacunami tiyarca.

35Chai q'uipaca, huasi canllapi tiyaj janaj lado pungumanmi pusharca. Chai pungupish, caishuj pungucuna shinallatajmi medirca.

36Chai pungu ucupipish, uchilla ucucuna, pungu patacuna, pungucunapi rurashca arcocuna, ventanacunatapish muyundijtami rurashca carca. Chai punguca largomanca, ishqui chunga sujta metro, ishqui chunga pichca centimetrohuanmi carca. Anchomanca chunga quimsa metro, chunga ishqui chaupi centimetrohuanmi carca.

37Chai pungu patacunaca, huasi canllamanmi carca. Chai patacunapipish, cada ladomanmi palmeracunata rurashca carca. Chai pungupipish, pusaj gradacunami tiyarca.

38Chai corredor ucupica, jatun ucumi tiyarca. Chai ucuman yaicuna punguca, jatun patacunatami charirca. Chai ucupimi, Diosman cushpa tucui rupachina animal aichataca maillangacuna.

39Chai ucuman yaicuna pungullapimi, cada ladoman ishqui mezacuna tiyarca. Chai mezacuna jahuapimi, Diosman cushpa tucuita rupachina animaltapish, juchamanta cushca animaltapish, Diosman cushca animaltapish, juchata rurashcamanta huañuchina carca.

40Janaj ladoman caj huasi canllapi tiyaj punguman yaicuna grada c'uchupipish, cada ladomanmi ishqui mezacuna tiyarca.

41Chai ucuman yaicuna pungupica, cada ladomanmi chuscu mezacuna tiyarca. Tucuita tandachishpa yupajpica, pusaj mezacunami carca. Chai mezacuna jahuapimi, Diosman cushca animaltaca huañuchingacuna.

42Shinallataj Diosman cushpa tucui rupachina animalta huañuchingapajpish, Diosman animalta cushpa huañuchingapajpishmi, cuchillocunata churana chuscu mezacuna tiyarca. Chai mezacunaca, rumita labrashpa rurashcami carca. Largomanpish, anchomanpish canchis chunga iscun centimetrotami charirca. Altomanca, pichca chunga ishqui chaupi centimetrotami charirca.

43Chai ucupica, muyundijtami huarcuna ipicuna tiyarca. Chai ipicunaca, canchis centímetro chaupihuanmi carca. Mezacuna jahuapica animalpaj aichatami churashca carca.

44Diospaj huasi ñaupaj huasi canllaman yaicuna janaj lado pungu c'uchupipish, inti llujshin ladoman caj pungu c'uchupipish cantajcunapaj ucucunami tiyarca. Janaj lado pungu c'uchupi rurashca ucuca, ura ladoman pungumi carca. Ura lado pungu c'uchupi rurashca ucuca, janaj ladoman pungumi carca.

45Ñucataca cashnami nirca: “Ura ladoman punguyuj huasica, Diospaj huasita cuidaj curacunapajmi canga.

46Janaj ladoman punguyuj huasica, altarpi Diosman cushpa rupachij curacunapajmi canga. Chai curacunaca, Sadocpaj churi curacunami canga. Chai levita curacunallami Mandaj Diosta servingacuna” nircami.

47Chai q'uipaca, Diospaj huasi ñaupajpi tiyaj huasi canllatami medirca. Chai huasi canllaca chuscundij ladomi igual carca, largomanpish anchomanpish pichca chunga ishqui metro, pichca chunga centimetrotami charirca. Diospaj huasi ñaupajllapimi altarpish tiyacurca.

48Chai q'uipami ñucataca, Diospaj huasi ñaupajpi tiyaj corredorman pusharca. Chaimantaca chai corredorpi tiyaj patacunata pilarcunatami medirca. Cada lado pilarmi ishqui metro, sujta chunga ishqui chaupi centímetro racu carca. Cada lado pungu patacunapish shuj metro, pichca chunga canchis chaupi centímetro anchomi carca.

49Chai corredorca largomanca chunga metro, pichca chunga centimetrotami charirca. Anchomanca pichca metro, canchis chunga canchis chaupi centimetrotami charirca. Chai corredorman huichiyangapajca, gradacunami tiyarca. Chai corredorpi tiyaj pungu c'uchupica, cada ladomanmi pilarta rurashca carca.