ESTER 5 - Quichua Chimborazo Bible

Esterca jatun mandajtapish Amantapish jatun micuiman cayashcamanta

1Ña quimsa punlla tucujpimi, Esterca jatun mandaj huarmi churarina churanata churarishpaca, mandana huasi ñaupaj ucuman yaicurca. Chaiman yaicushpami jatun mandaj tiyacun mandana ucu ñaupajpi shayarirca. Jatun mandajca, chai ucupimi pungu ch'imbapurapi pai tiyanapi tiyacurca.

2Jatun mandajca, paipaj huarmi Ester canllaman shayacujta ricushcahuanmi c'uyaihuan ricurca. Chaimantami paipaj maquipi charicushca curi varataca ñaupajman chutarca. Chashna rurajpimi Ester c'uchuyashpaca, chai vara puntapi maquihuan tuparca.

3Chashna tupajpimi jatun mandajca:

–Jatun mandaj Ester, ¿imataj tucurcangui? ¿Imatataj ningui? Can mañajpica, ñuca mandacun chaupi llajtatapish cushallami– nirca.

4Shina nijpimi Esterca:

–Can jatun mandajhuan cunan micungapajmi, jatun micuita allichircani. Can jatun mandajpaj yuyaipi alli cajpica shamupangui, Amantapish pushamungui– nirca.

5Chashna nijpimi jatun mandajca:

–Ester cayashcaman ringapaj Amanta utca pushamugrichij– nirca.

Ña pushamujpimi jatun mandajca, Ester cayashca jatun micuimanca paita pushashpa rirca.

6Chai jatun micuipi vinota ubyacushpami, jatun mandajca Estertaca:

–¿Imatataj ningui? Can mañajpica, ñuca mandacun chaupi llajtatapish cushallami– nirca.

7Shina nijpimi, Esterca cashna nirca:

–Ñucaca caillatami mañapani.

8Cayapish can jatun mandajhuan micungapajmi, jatun micuita ruragrini. Can jatun mandaj ñucata c'uyashpaca, cambaj yuyaipi alli cajpica cayapish shamupangui. Can jatun mandajhuan micungapaj ñuca cayashcamanca, Amantapish pushamungui. Can jatun mandaj caya shamujpimi, can nishca shina ñuca mañana cashcataca mañasha– nircami.

Amanca Mardoqueota sipina caspita shayachishcamanta

9Amanca, punta punlla jatun micuimantaca, cushijlla shunguhuanmi llujshirca. Shina cashpapish, mandashpa tiyana huasi pungupi Mardoqueo tiyacujta ricushpaca, yallitajmi p'iñarirca. Amán chaita pasacujpica, Mardoqueoca mana jatarircachu, pai tiyacushcamantaca mana cuyurircallapishchu.

10Shina cajpipish Amanca, p'iñacushcata ama ricuchingapajca, imata mana nishpa rircallami. Paipaj huasiman ña chayashpaca, paihuan apanacujcunatapish, Zeres shuti paipaj huarmitapishmi cayaj cacharca.

11Paicunahuanmi Amanca, pai yallitaj charij cashcatapish, achca churicunata charishcatapish parlacurca. Shinallataj jatun mandajca, pai churashca tucui mandajcunamanta ashtahuan alli nishca canapica paillata churashcatapishmi parlacurca.

12Chashna parlashpaca, Amanca cashnapishmi nirca:

–Jatun mandaj Ester huarmica, jatun mandajhuan micungapaj rurashca jatun micuimanca ñucallatamari cayarca, pi shujtajta mana cayarcachu. Caya punlla jatun micuipajpish, ñucallatamari jatun mandajhuan shamuchun nin.

13Chashna cajpipish, mandana huasiman yaicuna pungupi chai Judá llajtamanta caj Mardoqueo runa tiyacujta ricushpaca, mashnata cushicushpapish ima mana canchu– nircami.

14Chashna nijpimi Zeres shuti paipaj huarmipish, tucui paihuan apanacujcunapish cashna nircacuna:

–Ishqui chunga ishqui metro alto caspita shayachishpa, Mardoqueotaca chaipi sipichiyari. Jatun mandajman caya tutamanta huillashpa paitaca chaipi sipichinguilla. Chai q'uipami, chai jatun micuimanca jatun mandajhuan cushicushpa ringui– nircacunami.

Chashna yuyaita cushcaca, Amanpaj yuyaipica alli cajpimi, sipichina jatun caspita shayachichirca.