1Jobca cutinllataj yuyarishpami cashna nirca:
2Sarun quillacunapi ñuca cashcamanca,
Taita Dios ñucata cuidacushcapi ima shina
cashcamanca ¿pitaj ñucataca tigrachihuangari?
3Paipaj lamparata ñuca uma jahuapi
churashpami achijyachij carca.
Chai luzhuanmi amsapi cashpapish,
purij carcani.
4Ñuca chairaj cajpica, Taita
Diosllatajmi allicunata cushpa,
ñuca huasitapish cuidaraj carca.
5Tucuita Rurai Tucuj Dios ñucahuan cajpica,
ñuca huahuacunapish ñuca c'uchupimi
causacurcacuna.
6Ñuca chaquicunataca lechehuanmi
maillaj carcani.
Yacu rumipish ñucamanca jatun yacuta
shinami aceiteta cuj carca.
7Ima rurashcacunata ricungapaj pueblo
punguman llujshishpapish, plazapimi
ñucapajca jatun tiyarinata
allichij carcani.
8Chairajcuna ñucata ricushpaca
miticurcacunami.
Yuyajcuna ricushpapish shayarijcunami
carca.
9Mandajcunapish mana imata rimai
tucujcunachu carca.
Ashtahuanpish maquihuanmi shimita
taparijcuna carca.
10Tucuicunamanta puntapi caj
mandajcunapish upallarijcunami carca.
Paicunapaj c'allucunaca shimi ucupimi
llutarij carca.
11Ñucata uyajcunaca ñucataca:
Cushicuj runa nijcunami carca.
Ñucata ricujcunapish, ñuca ima shina
cashcatami huillajcuna carca.
12Yaricaihuan capariricujmanca
ñucamari cararcani.
Yaya mama illajtaca ñucamari ayudarcani.
13Chingarigrijta ayudashcamantami, ñucataca bendiciarca.
Viuda huarmi huacacujpipish cushichircanimi.
14Ñucaca cashcata rurashcahuanmi
churarij carcani.
Chaimi ñucamanca pillurinata curca.
Ñucapajca allita ruranaca, jahua
churanata churarina shina, achij nicuj
diademata churarina shinami carca.
15Ñahui mana ricujpajca, ricuj ñahui
shinami carcani.
Chaqui p'aquirishcapajca, alli chaqui
shinami carcani.
16Imata mana charijcunamanca, yaya
shinami cararcani.
Imata mana allichipaj shina cajpipish,
alli ricushpami yachaj chayaj carcani.
17Millai runataca, quirucunatami
p'aquij carcani.
Imata quichushca cajpipish,
quirucunahuan chariracujtami
cacharichij carcani.
18Ñucaca cashnami yuyarcani: Ñuca
quiquin tazinllapitajmi huañusha,
ñuca causai punllacunataca t'iyu allpata
shinami mirachisha yuyarcanimi.
19Ñuca sapica achca yacu c'uchupimi
carca, ñuca ramacunapipish achca
shullami tiyarca.
20Ñucaca ashtahuan ashtahuan
alli nishcami tucurcani.
Ñuca maquihuanca arcotaca,
sinchitami charircani.
21Ñuca rimajpica upallashpami,
ñuca rimachun shuyajcuna carca.
Ñuca cunashcacunatami uyanachircacuna.
22Ñuca rimajpica, mana tigrachircacunachu.
Ñuca yuyachishcaca, paicunapimi yacuyarca.
23Ñucataca tamyata shinami
shuyajcuna carca.
Q'uipa tamyata shimi pascashcahuan
shuyacuj shinami carca.
24Paicunahuan ñuca asijpipish, mana
crircacunachu.
Ñucataca mana pi pingachircacunachu.
25Paicuna imalla rurashcataca,
ñucami ricuj carcani.
Ñucaca paicunapaj chaupipica,
mandaj shinami tiyarij carcani.
Ñucaca soldadocunata jatun mandaj
shinami causarcani.
Ñucaca huacacujcunata cushichijmi carcani.
Who We AreWhat We EelieveWhat We Do
2025 by iamachristian.org,Inc All rights reserved.