1 REYES 19 - Quichua Chimborazo Bible

Horeb urcupi Elías miticugrishcami

1Acabca paipaj huarmi Jezabelmanca, Elías imallata rurashcatapish, Baalpaj profetacunata espadahuan huañuchishcatapishmi tucuita parlarca.

2Chaimi Jezabelca, Eliasta cashna nichun shuj huillajta cacharca: “Can chai profetacunata huañuchishca shinallataj cantapish ñuca mana caya cai horaspaj huañuchijpica, ñucataca ñuca dioscuna jatunta llaquichichun” ninmi nichunmi cacharca.

3Chaita uyashpami Eliasca jatarishcahuan paipaj causaita quishpichingapaj Judapi caj Beersebapi miticunaman rirca. Chaiman chayashpaca paipajta rurajtaca chaipimi saquirca.

4Paica ña shuj punllata shitashca pambata rishpami, enebro yura ucupi tiyarishpa ña huañunata munashpa: “Mandaj Dioslla, caicamallami causasha nini. Ñucaca ñuca ñaupa yayacunata yallica mana canichu. Ñuca causaita quichuhuailla” nirca.

5Chaipimi enebro yura ucupi siririshpa dormicujpi shuj ángel paita cuyuchishpaca: “Jatari micui” nirca.

6Shina nijpi pai ricunapajca paipaj sauna c'uchupica tullpapi cusashca shuj tandahuan, uchilla puñu yacuhuan tiyacushcatami ricurca. Chaita ricushpa tandata micushpa yacutapish ubyashpaca cutinmi dormirirca.

7Mandaj Diospaj ángel cutinllataj tigrashpa cuyuchishpaca: “Purinaca achcarajmi illan. Jatari micui” nircami.

8Shina nijpi jatarishpaca micurcami, yacutapish ubyarcami. Chai micunata micushpaca fuerzayuj tucushpami, chuscu chunga punllacunata, chuscu chunga tutacunata purishpa Diospajlla caj Horeb urcuman chayarca.

9Chaiman chayashpaca, shuj jutcuman yaicushpami, chai tutaca chaipi pacarirca. Chaipimi Mandaj Diosca: “¿Imatataj caipica ruracungui, Elías?” nirca.

10Shina nijpi Eliasca: “Tucuita Mandaj Taita Dios nishcata pajtachina yuyailla huañuricuj cashcamantami caipi tiyacupani. Israelcunaca pajtachingapaj ari nishcata mana cazushpamari, cambaj altarcunatapish tucui urmachircacuna. Profetacunatapish espadahuanmi huañuchircacuna. Ñucallamari saquirishcani. Cunancarin ñucatapish huañuchingapajmi mashcacuncuna” nircami.

11Chaipimi Mandaj Diosca: “Canllaman llujshishpa, cai urcullapitaj ñuca ñaupajpi shayari” nirca.

Mandaj Dios chashna nishpa pasajpica, yallitaj sinchi huaira shamushpami Mandaj Diospaj ñaupajpi chai urcutaca chaupirca. C'acayashcatapish t'unirca. Mandaj Diosca chai huairapica mana ricurircachu. Chai q'uipaca, allpa chujchuimi tiyarca. Mandaj Diosca allpa chujchuipipish mana ricurircachu.

12Chai q'uipaca ninami ricurirca. Mandaj Diosca chai ninapipish mana ricurircachu. Chai q'uipaca, sumaj huairami allijlla huij huij nishpa uyarirca.

13Chaita uyashpami Eliasca jahua churanahuan ñahuita ch'ungullirishpa, chai jutcumanta llujshishpa pungullapi shayarirca. Elías chaipi shayarijpimi: “¿Imatataj caipica ruracungui, Elías?” nishpa rimashca uyarirca.

14Shina nijpi Eliasca: “Tucuita Mandaj Dios nishcata pajtachina yuyailla huañuricuj cashcamantami caipi cani. Israelcunaca pajtachingapaj ari nishcata mana cazushpamari, cambaj altarcunatapish tucui urmachircacuna. Profetacunatapish espadahuanmi huañuchircacuna. Ñucallamari saquirishcani. Cunancarin ñucatapish huañuchingapajmari mashcacuncuna” nircami.

15Shina nijpi Mandaj Diosca: “Can maita shamushca ñanllatataj tigrashpa, shitashca pambapi caj Damasco puebloman ri. Chaiman chayashpaca Siria llajtata jatun mandaj cachun Hazaeltaca aceitehuan churangui.

16Nimsi runapaj nieto Jehutaca, israelcunata jatun mandaj cachun aceitehuan churangui. Abel-mehola pueblomanta caj Safatpaj churi Eliseotaca, cambaj randi profeta cachun aceitehuan churangui.

17Hazaelpaj espadamanta quishpirijtaca, Jehumi huañuchinga. Jehupaj espadamanta quishpirijtaca, Eliseomi huañuchinga.

18Ñucaca Israelpica Baalta mana cungurij, mana muchaj, 7.000 runacunatami puchuchigrini” nircami.

Profeta cachun Eliseota churashcami

19Elías chaimanta tigrashpaca, Safatpaj churi Eliseo chunga ishqui yuntacunahuan yapucunmanmi chayarca. Caishujcunahuanca paita ñaupashpami yapucurcacuna, shuj yuntahuanca Eliseomi caticurca. Chaipimi Eliasca Eliseo paipaj ñaupajta pasacujpica paipaj jahua churanata Eliseopaj jahuapi churarca.

20Chaimi Eliseoca, yuntata chaipi saquishcahuan Eliasta catishpa callpashpa shamushpaca:

–Ñuca yaya mamata muchashpa caya minchacama nishpa, shamungacamalla shuyai. Chai q'uipaca canta catishallami– nirca.

Shina nijpi Eliasca:

–Shinashpaca rilla, imapaj cayashpa ñuca chashna rurashcataca ama cungaringuichu– nircami.

21Shina nijpi Eliseo tigrashpaca, ishqui huagrata huañuchishpa, yapuna caspicunata yantashpami, aichata cusashpa tucuicunaman cararca. Chai q'uipaca Eliseoca, Eliasta catishpa rishpami, paipajta ruraj tucurca.