2 CRÓNICAS 31 - Quichua Chimborazo Bible

1Chai jatun micui punllacuna tucurijpica, chaipi caj tucui israelcunami Judá llajtallapitaj paicuna causana pueblocunaman tigrarcacuna. Chashna tigrashpaca, dioscunata rurashca jatun rumicunatapish, Asera huarmi diosman rijchajcunatapishmi tucui p'aquircacuna. Shinallataj lomacunapi tiyaj altarcunatapishmi tucui urmachircacuna. Judá llajtapipish Benjamín llajtapipish, Efraín llajtapipish, Manasés llajtapipish chashna tucui chai altarcunata urmachishca q'uipami israelcunaca tucuicuna paicunapaj pueblocunaman, quiquin allpacunaman tigrarcacuna.

Curacunatapish levitacunatapish cutintaj Diospajta ruranapi churashcami

2Q'uipatami Ezequiasca curacunata, levitacunataca paicuna imata ruranata yachashca shinallataj Diospajta rurachun churarca. Paicunataca animalcunata Diosman cushpa tucui rupachichunpish, Dioshuan alli cangapaj animalcunata cushpa huañuchichunpish, Mandaj Diosta pagui nishpa alabachunpishmi mandarca. Diospaj huasiman huashan huashan shamushpa, chashna rurachunmi churarca.

3Mandaj Dios mandashcapi quillcashca tiyacuj shina rurangapajmi punllanta tutamantapish, chishipish animalcunata Diosman cushpa tucui rupachijcuna carca. Shinallataj samana punlla, mushuj luna punllacunapish, huatanta yuyarina jatun punllacunapishmi Diosman animalcunata cushpa tucui rupachijcuna carca. Tucui chai rupachinacunapajca, jatun mandajllatajmi paipaj quiquin animalcunata cuj carca.

4Shinallataj curacuna, levitacuna Mandaj Dios mandashcata pajtachinamanta ama saquichunca, Judá llajtapi causajcunatami paicunaman cuna cashcata cuchun mandarca.

5Pai mandashcata huillajpica, tucui israelcunami paicunapaj chagracunapi punta p'ucushca trigotapish, vinotapish, aceitetapish, sacha chuspi huachashca mishquitapish, chagracunapi p'ucuj shujtaj granocunatapish mana mitsashpa ashtahuan allita curcacuna. Chagracunamanta tandashca tucui granocunatami chungamanta shujta apamushpa achcata tandachijcuna carca.

6Shinallataj Israel llajtapi causajcunapish, Judá llajtallapitaj caj shujtaj pueblocunapi causajcunapishmi huagracunamantapish, uchilla animalcunamantapish chungamanta shujta apamushpa cujcuna carca. Paicunata Mandaj Diosman cushun nishpa, chungamanta shujta ch'icanchishcatapishmi apamushpa montonashpa churajcuna carca.

7Huatapaj quimsa quillapi granocunata montonai callarishpaca, huatapaj canchis quillapimi tucuchijcuna carca.

8Chai q'uipaca Ezequiaspish, pai churashca mandajcunapish chai granocunata ricugrishpaca, Mandaj Diostapish, pai agllashca israelcunatapishmi bendiciarcacuna.

9Chai q'uipami Ezequiasca curacunatapish, levitacunatapish chai montón granocunamanta tapurca.

10Pai tapujpica, Sadocpaj huahua huahuapura curacunata mandaj Azarías curami cashna huillarca: “Mandaj Diospaj huasipica, ñucanchijman cuna cashca granocunata apamui callarishca punllamanta cunancama micunataca pajtatami charinchij. Achca sobranpishmari. Mandaj Dios pai agllashcacunata bendiciashcamantami, paicuna cushcacunaca cai tucui achca sobrashca” nircami.

11Chashna achca granocuna tiyashcamantami, Ezequiasca Mandaj Diospaj huasipica, chai granocunata huaquichina ucucunata rurachirca.

12Chai ucucunapimi, chungamanta shujta cushca granocunatapish, Diospajlla ch'icanchishpa cushcacunatapish imata mana huashanchishpa tucuita huaquichircacuna. Chaipi tucuita ricuchunca, Conanías shuti levitatami churarcacuna. Paipaj q'uipa ricuj cachunca, paipaj huauqui Simeitami churarcacuna.

13Chaipi tucui imatapish cuidachunca, jatun mandaj Ezequiasmi Diospaj huasipi tucuita mandaj Azariashuan tucushpa, caicunata agllashpa churarcacuna: Jehiel, Azazías, Nahat, Asael, Jerimot, Jozabad, Eliel, Ismaquías, Mahat, Benaía shuti runacunatami churarcacuna. Paicunatapish Conaniashuan, paipaj huauqui Simeillahuantaj mandachunmi churarca.

14Diospaj huasipica, inti llujshin lado pungupica, Imna shuti levitapaj churi Coremi cuidaj carca. Paimi quiquin munaihuan Diosman cushcacunata huaquichij carca. Shinallataj Mandaj Diospajlla ch'icanchishpa imata rurangapajpish, paimi chai huaquichishcacunata llujshichishpa raquij carca.

15Chai Coré shuti levitataca Edén, Miniamín, Jesúa, Semaías, Amarías, Secanías shuti levitacunami curacuna causan pueblocunapica paicunaman raquina cashcata alli raquishpa ayudajcuna carca. Mirga mirgapi ch'icanchishca cajcunamanca huambracunamanpish, yuyajcunamanpish, chai shinallatajmi huashan huashan raquijcuna carca.

16Chaicunata japingapajca curacunaca shuticunata quillcachina libropimi maijanpaj huahuacunapura cashcatapish, shuticunatapish quillcachishca cana carca. Huahuacunatapish quimsa huatayujmanta huichimanmi shuticunata quillcachishcacuna carca. Chashna quillcachishca cajpimi, imallata ruranata yachashca shinallataj Diospajta rurangapaj Diospaj huasiman shamuna punllacunapi huashan huashan shamujpica, paicunaman cuna cashcata raquijcuna carca.

17Curacunaca maijan familiapuralla cashcatami quillcachishcacuna carca. Levitacunaca ima ruranapi cashcatapish mirga mirgapi ch'icanchishcacunapuramanta maijan mirgapura cashcatapishmi quillcachishcacuna carca.

18Diospajta rurangapaj tucui shunguhuan allichirishcamantami tucui paicunataca churicunandij, ushushicunandij, huarmicunandijta librocunapi quillcarcacuna.

19Aaronpaj huahua huahua curacunaca pueblocunapipish, chai muyundijcunapipishmi causajcuna carca. Paicunamanpish, tucui levitacunamanpish paicuna japina cashcata cungapajca, tucui chai pueblocunapimi raquijcuna tiyarca.

20Ezequiasca, tucui Judá llajtapimi chashna churarca. Paica Mandaj Diospajca, imatapish tucui shunguhuanmi cashcata, allita rurashpa causarca.

21Mandaj Dios paihuan cachunmi paipaj huasipi paipajta rurachunca, Dios mandashcapi nicushca shinataj allichirca. Tucui shunguhuantaj Diosta mashcashpa chaita rurashcamantami, tucuita alli allichirca.