JEREMÍAS 22 - Quichua Chimborazo Bible

Judá llajtata jatun mandajta Dios rimashcamanta

1Mandaj Diosca ñucataca cashnami nirca: “Judá llajtata jatun mandajpaj huasiman uriyashpa,

2cashna huillagri: Davidpaj jatun tiyanapi tiyarishpa Judá llajtata mandacuj jatun mandajpish, can churashca mandajcunapish, cai punguta yaicuj tucui Judá runacunapish, Mandaj Dios rimashcata uyaichij.

3Mandaj Diosca cashnami nin: Cashcata rurashpa, alli mandaichigari. Huajchacunataca llaquichicujcunapaj maquimanta mitsaichigari. Ama pita umaichijchu. Shujtaj llajtamanta shamushcacunatapish, yaya mana illaj huahuacunatapish, viudacunatapish ama imata quichuichijchu. Cai llajtapica, ama manapish ima millaita rurajcunata huañuchishpa yahuarta jichaichijchu.

4Ñuca cashna mandashcata cazujpitajca, Davidpaj jatun tiyanapi paipaj randi tiyarij jatun mandajcunaca cai huasiman yaicuna punguta carretacunapi, caballocunapi tiyarishca yaicunga llujshingacunami. Shinallataj paicuna churashca mandajcunahuan, pai mandacun cai pueblopi causajcunahuanmi puringacuna.

5Ashtahuanpish cunan ñuca mandashcata mana uyajpica, cai huasica shitashcami saquiringa. Ñucatajmi chashna nini ninmi ningui” nircami.

6Mandaj Diosca Judá llajtata jatun mandajpaj huasitaca cashnami nin: “Canca ñucapajca Galaad urcu shinami cangui. Líbano jatun urcu punta shinapishmi cangui. Shina cajpipish shitashcatami saquigrini, shuj runallapish illaj pueblotami saquigrini.

7Canta urmachichunca, alli macanacunayuj runacunatami apamusha. Paicunami cambaj ashtahuan sumaj cedro caspicunataca, p'itishpa tucui rupachingacuna.

8Achcacunami cai pueblo c'uchuta puringacuna. Paicunaca caishuj chaishujmi: Cai puebloca sumaj, jatun pueblomari carca. ¿Imamantashi Mandaj Diosca cashna llaquichirca? ninacungacuna.

9Shina nijpica shujcunaca: Caipi causajcunami paicunata Mandaj Dioshuan ari ninacushcata p'aquircacuna. Chaimantaca shujtajcunapaj dioscunatamari adorashpa, chaicunata servircacuna ningacunami” ninmi.

Jatun mandaj Salumca Babiloniapimi huañunga nishcamanta

10Huañushca mandajmantaca ama huacaichijchu, ama llaquirichijllapishchu. Ashtahuanpish shujtaj llajtaman prezu rijmanta caparirishpa huacaichij. Paica ña mana tigramungachu. Pai huacharishca cai llajtataca, ña manataj cutinca ricungachu.

11Mandaj Diosca, Josías huañujpi Judá llajtata paipaj q'uipa mandacujpi prezu apashca paipaj churi Salum shuti jatun mandajmantaca cashnami nin: “Salumca caimanca ña mana tigrangachu.

12Pai prezu tiyacun llajtapimi huañunga. Cai llajtataca cutinca ña mana ricungachu” ninmi.

Joacim shuti jatun mandajta rimashcamanta

13“Canca shujtajcunata llaquichishpa shuhuashpallami sumaj jatun ucucunayuj huasita shayachingui. ¡Aij, imachari tucungui! Can trabajachishcamantaca, pimanpish manamari paganguichu. Yanga trabajachishpamari huasichingui.

14Ñucapajca jatun ucucunayuj sumaj huasita shayachisha nirishpami, jatun ventanacunayuj huasita rurangui. Ucucunatapish, cedro tablacunahuan churashpami, tucui pata quinricunata pucajllata rurangui.

15Cedro caspicunahuan sumaj huasicunata rurachishpaca mandacushallami ¿yuyanguichu imatagari? Cambaj yayapish alli micushpa, alli ubyashpami causarca. Shina cashpapish cashcata rurashpami alli mandarca. Chaimantami tucui imapish alli llujshirca. ¿Chaitaca manachu yuyaringui?

16-17Paica llaquita apacujcunamantapish, huajchacunamantapish shayarishpa allita rurarcami. Chaimantami alli causarca. Ñucata rijsishpaca chashna rurana cashcataca ¿manachu yachangui imatagari? Ashtahuanpish canca canlla jahuanpi, jahuanpi charinatami munangui. Manapish ima millaita rurajcunata huañuchinata, pitapish imata quichushpa llaquichinallatami chaparangui ninmi” Mandaj Diosca.

18Chaimantami Josiaspaj churi, Judá llajtata jatun mandaj Joacimtaca Mandaj Diosca cashna nin: “Pai huañujpica pi mana: ¡Aij ñucanchij huauquilla, aij ñucanchij panilla! nishpa huacangacunachu. ¡Aij ñucanchij mandajlla, jatun mandajmari carca! nishpallapish mana llaquiringacunachu.

19Sirijta aisashpami, Jerusalenmanta canllaman llujshichishpa shitangacuna. Huañushca burrocunata shitana jutcupimi shitangacuna” ninmi.

Ñucataca manataj uyarcanguichijchu nishcamanta

20“Cambaj tucui c'uyashcacunamari tucurishca. Cunanca Líbano urcuman huichiyashpa, Basán urcuman llujshishpa tucui ladota ricushpa caparirishpa huacajpipish, pi mana uyaringachu.

21Ñucaca cancuna manaraj ima llaqui tucujpimi rimarcani. Ashtahuanpish huambramantapachami ñuca imata nijpipish: Manataj uyashachu nishpa manataj uyaj carcanguichij.

22Cancunata michijcunatapish, cancunapaj c'uyashcacunatapish tucuicunatami huaira apaj shina caru llajtaman prezu apangacuna. Chashna tucujpica cancuna millaita rurashpa causashcamantaca jatunta pingai tucushpami, ñahuita pambapi churanguichij.

23Cunanca Líbano urcu caspicunahuan shayachishca huasipimi sumajta causacunguichij. Jatun llaqui shamujpica, capariringapaj cambaj cungapish mana pajtangachu. Huachana nanaihuan caj huarmi shinami nanachingui” ninmi.

24Mandaj Diosca cashnapishmi nin: “Ñuca, causaj Diostajmi cashna nini: Joacimpaj churi, Judá llajtata jatun mandaj Conías, cantaca ñuca alli maqui dedopi sortijas shina tiyacujpipish, chaimantapish llujshichishpa shitaimantajmi.

25Cantaca huañuchingapaj shamujcunapaj maquipimi churagrini. Babilonia llajtata jatun mandaj Nabucodonosorpaj ñahuipi, paipaj caldeo soldadocunapaj ñahuipi ricurinataca manchaihuan huañucunguimi. Ashtahuanpish chaicunapaj maquipitajmi cantaca churagrini.

26Chaicunahuanmi cantapish, canta huachaj mamatapish cancuna mana huacharishca shujtaj llajtaman prezu apachisha. Chai llajtapimi huañunguichij.

27Cancunapaj llajtamanca tucui munaihuan tigranaihuan huañucushpapish, manataj tigranguichijchu” ninmi.

Jeconiaspaj churicunaca Davidpaj jatun tiyanapica mana tiyaringachu nishcamanta

28Cai Conías runaca ¿pi mana nishca, p'aqui allpa manga shinachu imatagari? ¿Pi mana nishpa shitashca paya mangachu imatagari? ¿Imamantataj paitapish, paipaj huahuacunatapish mana rijsishca llajtaman llujshichishpa cachashca rincunachu imamí?

29¡Allpa, allpa, allpa, Mandaj Dios rimashcata uyayari!

30Mandaj Diosca cashnami nin: “Cai runa ima tucunata quillcaichij. Paica shuj churillatapish mana charishca shinami saquiringa. Tucui causaipi imata mana charishca shinami saquiringa. Paipaj churicunaca Davidpaj jatun tiyarinapica, pi mana tiyaringachu. Pi mana Judá llajtata mandangapaj tiyaringachu” ninmi.