ESTER 6 - Quichua Chimborazo Bible

Amanca Mardoqueota alli nishpa caparichishcamanta

1Chai tutallatajmi jatun mandajca, dormita mana japirca. Chaimantami paipaj quillcajcunataca: “Ñuca mandacun llajtacunapi imalla tucushcata quillcashca librota apamushpa ñuca ñaupajpi rezaichij” nirca.

2Chai quillcapimi, jatun mandaj Asuerotaca, paita cuidaj Bigtán, Teres shuti eunucocunallataj huañuchinata yuyarinacucujta Mardoqueo uyashpa huillashcata japircacuna.

3Chaita paipaj ñaupajpi rezajpimi, jatun mandajca:

–¿Mardoqueomanca ima allita curcanguichijchu, mana cashpaca alli nishca canapi churarcanguichijchu?– nishpa tapurca.

Chaita tapujpimi, paipajta ruraj mandajcunaca:

–Imata mana curcanchijchu– nircacuna.

4Chashna nicujpimi Amanca, jatun mandaj tiyacun huasi canllamanca paihuan rimangapaj chayarca. Amanca, sipina jatun caspita shayachishpa charicushca cashpami, chai caspipi Mardoqueota sipichichun ningapaj jatun mandajpajman chayarca. Canllaman puricujta uyashpami, jatun mandajca:

–¿Pitaj canllapi puricun?– nishpa tapurca.

5Shina tapujpica, jatun mandajta servijcunaca:

–Amanmi shamushca– nijpica, jatun mandajca:

–Yaicuchichigari– nirca.

6Amán yaicujpimi jatun mandajca:

–Ñucaca, shuj runatamari alli nishpa jatunyachisha nini. Paita alli ningapajca, ¿ima shinallataj rurana alli canga?– nirca.

Shina nijpica Amanca, paipaj yuyaillapimi cashna yuyarca: “Jatun mandajca, ñucatamari alli nisha nicunga. Pitataj ashtahuanca alli nisha nicungari” yuyarcami.

7-8Chashna yuyashpami cashna nirca:

–Can jatun mandaj alli nisha nishca runataca, can jatun mandajpaj churanata shinallatatajmi churachina. Shinallataj can jatun mandaj tiyarina caballopimi tiyachina. Umapipish, can jatun mandaj churarina coronatami churachina.

9Can jatun mandaj alli nisha nishca runamanca, chai churanacunataca can churashca mandajcunapuramanta ashtahuan allipi caj mandaj churachichun. Caballopipish paillataj tiyachichun. Chashna tiyachishpaca: Jatun mandajca pai jatunyachisha nishca runataca cashnami jatunyachin nishpa caparishpa, pueblo chaupi plaza pambata caballota aisashpa purichun– nircami.

10Shina nijpimi, jatun mandajca Amantaca cashna nirca:

–Utca rishpa churanatapish, caballotapish apamugri. Ña apamushpaca, Judá llajtamanta caj Mardoqueotaca, can imallatami ningui, chai shinallataj ruragri. Ñuca mandana huasiman yaicuna pungullapimi tiyacun– nircami.

11Chashna nijpimi Amanca churanatapish, caballotapish apamurca. Ña apamushpaca, Mardoqueomanmi churanata churachirca. Chaimantaca Mardoqueo tiyarishca caballota aisashpami: “Jatun mandajca pai jatunyachisha nishca runataca cashnami jatunyachin” nishpa caparishpa, pueblo chaupi plaza pambata purirca.

12Chai q'uipaca Mardoqueoca, jatun mandaj mandana huasiman yaicuna pungupi pai tiyacushcallamantaj tigrarcallami. Amanca yallitaj pingai tucushpami, llaquirishpa umata ch'ungullirishpa paipaj huasiman utca rirca.

13Ña chayashpaca, Zeres shuti paipaj huarmimanpish, paihuan apanacujcunamanpish tucuitami parlarca. Chaita parlajpimi, paiman yuyaita cuj jatun yachajcunapish, paipaj huarmi Zerespish:

–Chai Mardoqueo runa, judiocunapaj huahua huahuapura cajpica, mana mishai tucunguichu. Ashtahuanpish urmanguitajmi. Cunancarin ñami paipaj ñaupajpi pingai tucumushcangui– nircacunami.

14Paicuna manaraj tucui parlanacujpimi, jatun mandajpaj eunuco runacunaca chayarcacuna. Paicunaca chayashcahuanmi Amantaca, Ester cayashca jatun micuiman pusharcacuna.