PROVERBIOS 14 - Quichua Chimborazo Bible

1Yachaisapa huarmica paipaj

huasitaca, allimi shayachin.

Ashtahuanpish rumi shungu huarmica,

shayachishca huasitapish paipaj

maquihuanmi urmachin.

2Ima juchachina illajlla causaj runaca,

Mandaj Diosta c'uyajmi.

Ashtahuanpish huishtu ñanpi purij

runaca p'iñanmi.

3Rumi shungu runapaj shimimantaca,

jatun tucushcamanta llaquipi churaj

shimicunami llujshin.

Ashtahuanpish yachajcunapaj shimimantaca,

ima llaquimantapish huaquichij

shimicunami llujshin.

4Yapungapaj huagracuna illajpica,

huaquichinacunapish grano illajllami tiyan.

Huagracuna tiyajpimi, granocunataca

llashaj llashajta tandarin.

5Cashcata huillaj runaca ima cajpipish,

mana llullashpa huillanchu.

Ashtahuanpish llulla runaca, imata

huillashpapish llullantajmi.

6Mana cazushpa asijcunaca alli yachaita

yachasha nishpapish, manataj yachai tucunchu.

Ashtahuanpish yuyaisapa runapajca, alli yachaita yachanaca jahuallamari.

7Rumi shungu runahuanca, ama

ashtahuan purichu.

Paimantaca alli yachanata mana japinguichu.

8Alli yuyaiyujpaj yachanaca,

alli yuyaihuan causanami.

Ashtahuanpish rumi shungu runacunaca,

yachai illaj cashcamantami umarishpa causancuna.

9Rumi shungucunaca millaita rurashpapish,

mana manchashpami asincuna.

Ashtahuanpish alli runacunaca,

quiquinllataj nanarishpami, alli

tucunata mashcancuna.

10Llaquilla cajpipish, cushijlla

cajpipish, quiquin shungullami yachan.

Chaitaca shujtajcunaca mana yachai tucunchu.

11Mana manchajcunapaj huasitaca,

jatun llaquicunami tucuchinga.

Ashtahuanpish alli runacunapaj huasipica,

sisashca shinami ricuringa.

12Cai pachapi causajcunapaj ñanca,

quiquin yuyaipi alli ricurishpapish,

huañuiman chayachigrij ñancunallami.

13Asicujpipish shunguca llaquillatajmi,

cushicushpa asishca q'uipaca,

llaquillatajmi saquirin.

14Rumi shungu runaca, paipaj millai

causaimantaca, jatun llaquicunatami

japingacuna.

Ashtahuanpish alli runaca, paipaj

causaimantaca cushicungami.

15Yachai illaj runaca imata nijpipish, crishpa catinllami.

Ashtahuanpish yachajcunaca imata

rurangapajpish, alli yuyarinrajmi.

16Yachaisapa runaca millaita ruranataca,

manchashpa jarcarinmi.

Ashtahuanpish ch'ahuanyashca runaca millaita rurashpapish, mana manchashpa

jatun tucushpami purin.

17Jahualla p'iñarij runaca, imatapish

maipish cachun ruranllami.

Chashna millai runataca, tucuicunami

p'iñancuna.

18Yachai illajcunaca, rumi shungu

canata japinllami.

Ashtahuanpish alli yuyaiyujcunaca, alli

yachaihuanmi coronata churarishca

shina tucungacuna.

19Millai runacunaca, alli shungu cajcunapaj

ñaupajpimi cunguringacuna.

Mana manchajcunapish cashcata rurajpaj huasi

pungupimi cunguringacuna.

20Huajchaca, paihuan apanacuj runapipish

p'iñai tucunmi.

Charijllatami achcacuna c'uyan.

21Maijanpish shujtajcunata p'iñashpaca,

juchatami ruran.

Ashtahuanpish huajchacunata llaquijca,

cushicuitami japin.

22Millaita ruranata yuyajcunaca,

¿manachu pandarincuna?

Allita ruranapi yuyaita churajcunaca,

pipish c'uyashpa, allita cushcami

causancuna.

23Tucui yuyaihuan imatapish rurajpica,

japinapish tiyanmi.

Ashtahuanpish yanga rimarijllacunaca,

huajchallatajmi causancuna.

24Yachaisapacunapajca, charijyashcami

coronata churarishcata ricuchin.

Ashtahuanpish ch'ahuancunaca, rumi

shungu cashcahuanmi cushicuncuna.

25Imata ricushpapish mana llullashpa

huillajca, huañunapi tiyacujtapish

quishpichinmi.

Ashtahuanpish llullajca, llullashpallami huillan.

26Mandaj Diosta manchajcunapajca,

ima manchai mana tiyanchu.

Paicunapaj huahuacunapish, Diospimi

shunguta churancuna.

27Mandaj Diosta manchanaca, causaita cuj yacu shinamari.

Paita cazujcunaca, huañuchij linchipi

urmanamanta quishpichijmi.

28Jatun mandajca achcacunata mandaj

cashpami, jatun cashca ricurin.

Ashtahuanpish mana achcacunata

mandajca urmanllami.

29Utca p'iñarij runaca, rumi shungu canatami jatunyachin.

Ashtahuanpish mana utca p'iñarijca,

yuyaita japishca, alli runamari.

30Cushijlla shunguca, aichamanpish

causaita cunmi.

Ashtahuanpish shujtajcuna shina canata

munanaca tullu ungüitapishmi apamun.

31Huajchata llaquijca, paita Ruraj

Diostamari cushichin.

Ashtahuanpish p'iñashpa llaquichijca,

paita ruraj Diostamari llaquichin.

32Mana manchaj runataca pai millai

cashcallatajmi, jatun llaquipi churan.

Ashtahuanpish cashcata ruraj runaca,

huañucushpapish shunguta churanmi.

33Alli yachaica, alli yuyaiyujcunapaj

shungullapimi tiyan.

Ashtahuanpish rumi shungucunataca,

pi mana rijsinchu.

34Cashcata rurashpa causashcami

llajtatapish jatunyachin.

Ashtahuanpish juchaca llajtacunataca,

jatun llaquipimi churan.

35Jatun mandajca, paipaj runa alli

yuyaiyuj cajpica c'uyanmari.

Ashtahuanpish paita pingachij runataca p'iñanmi.