1Huauquicuna, cancunaman Dios huillachishcata huillagrishpaca, manamari yalli sumaj shimicunahuan, yachaisapa tucushpa rircanichu.
2Cancunapurapi cashpaca, ima shujtajta mana yuyashpami, ashtahuanca Jesucristota, paita chacatashcata huillana yuyailla carcani.
3Cancunapurapi cashpaca irqui shina, achca manchaihuan chujchucujmi carcani.
4Ñuca rimashpapish, ñuca huillashpapish mana gentecunapaj yachashca uyananqui shimicunahuanchu huillarcani. Ashtahuanpish Espíritu ricuchishcahuan, poderhuanmi huillarcani.
5Cancunapaj crishcaca, ama gentecuna yachaj cashcahuan callarichishca cachun, ashtahuanpish Diospaj poderhuan callarichishca cachunmi chashna huillarcani.
Diospajtaca paipaj Espiritumi yachachin6Shina cajpipish sinchi crij canaman chayashcacunamanmi Diospaj yachaitaca rimacunchij. Cai pachapaj yachanacunamanta, cai pachata mandajcunapaj yachanacunamantaca mana rimacunchijchu. Chaicunaca chingarijllacunami.
7Ashtahuanpish Diospaj pacallapi tiyacuj yachaimantami huillacunchij. Paipaj pacallapi caj yachaitaca, ñucanchijta sumajyachingapajmi cai pacha manaraj tiyajpi ña charicushca.
8Diospaj yachaitaca, cai pachata maijan mandajpish mana rijsircachu. Rijsishca cashpaca, sumaj achij nicujmanta Mandajtaca manataj chacatanmanchu carcacuna.
9Shina cajpipish cashnami quillcashca tiyacun:
“Ñahui mana ricushcata, rinrin mana uyashcata, pi mana shungupi yuyashcatapishmi,
Diosca, paita c'uyajcunapajca allichishca” ninmi.
10Ashtahuanpish Diosca, paipaj Espirituhuanmi chaicunataca ñucanchijmanca ricuchishca. Espirituca, Diospaj tucui imalla yachaitaca tucuitami alli yachan.
11Pi cashpapish shujtaj imata yuyacushcataca mana yachanchu. Paipaj espiritullami yachan. Shinallataj Diospaj yuyaitapish pi mana yachanchu. Paipaj Espiritullami yachan.
12Ñucanchijca mana cai pachapaj espiritutachu chasquircanchij, ashtahuanpish Diosmanta shamuj Espiritutamari, Dios cushcacunata yachangapaj chasquircanchij.
13Caicunataca mana gentecunapaj yachaita yachachishca shimicunahuanchu rimanchij. Ashtahuanpish Espíritu yachachishca shina, allichishpami Diospajllata rimanchij.
14Ashtahuanpish aichallamanta huacharishca cajca, Diospaj Espiritupajtaca mana yachasha ninchu. Chaicunaca paipajca musparishca shina cajpimi, mana entendi tucun. Espíritu yuyachijllapimi agllai tucun.
15Ashtahuanpish Espiritupajlla cajca, alli cashcata mana alli cashcatapish tucuitami yachan. Paitaca pi mana imata ni tucunchu.
16Jatun Diospaj yuyaitaca ¿pitaj yacharcari? Paitaca ¿Pitaj yachachingari? Ñucanchijca, Cristopaj yuyaitami charinchij.
Who We AreWhat We EelieveWhat We Do
2025 by iamachristian.org,Inc All rights reserved.
