SALMOS 18 - Quichua Chimborazo Bible

SALMO 18Macanacuita mishashcamanta Diosta David pagui nishcami(2 S 22.1-51)Tonota alli yachaj cantachichun, Mandaj Diospajta ruraj David rurashca Salmomi. Paita p'iñajcunapaj maquimantapish Saulpaj maquimantapish, Mandaj Dios quishpichi punllami, Paitaca cashna nishpa cantarca:

1Mandaj Dioslla, cantaca c'uyanimi, canca ñucaman fuerzata cujmi cangui.

2Mandaj Dioslla, ñuca jatun rumilla.

Ñuca miticuna sinchi huasilla, ñucata quishpichijlla.

Ñuca Dioslla, ñucaman fuerzata cujlla, paillapimi shunguta churani.

Ñuca paca tucuna escudolla, ñucata quishpichij, ñuca fuerzalla.

Jahuajman ñuca paca tucunalla.

3Mandaj Diostami mañasha.

Paica alabashca cana Diosmari.

Paimantami ñucata p'iñajcunamantapish quishpirisha.

4Huañuica huascahuan sipicuj shinami pillurca.

Millaicunaca yacu jundai shamuj shina shamushpami ñucataca manchachirca.

5Huañuica ñucataca huascahuan sipicuj shinami charicurca.

Pambana jutcupi ña pambacushca shinami carcani.

6Chashna llaquihuan cashpami, Mandaj Diosta mañarcani.

Ñuca Diosta caparircani.

Paica ñuca caparishcataca paipaj huasimantami uyahuarca.

Ñuca caparishcaca paipaj rinrinmanmi uyarirca.

7Allpaca cuyurishpami chujchurca.

Urcucunapish cuyurijpica, urcuta charicuj rumicamami cuyurirca.

Pai p'iñarijpimi, chashna chujchurca.

8Paipaj singamantaca cushnimi llujshirca.

Paipaj shimimantaca tucuchij ninami llujshirca.

Paica lunyacuj nina brazustami shitarca.

9Jahua pachata pascashpami uriyamurca.

Sangu amsa p'uyupi sarushcami uriyamurca.

10Paica shuj querubinpi tiyarishpami volarca.

Huairapaj alaspi tiyarishpami volarca.

11Paita pacachunca amsatami churarca.

Jahuata purij amsa p'uyutami yacu aparishcata paipaj muyundijpi churarca.

Cortina shina cachunmi paipaj muyundijta churarca.

12Paica achij nicujmi ricurirca.

Paipaj ñaupajpi caj p'uyumantaca rundu, lunyacuj nina brazusmi llujshirca.

13Mandaj Diosca jahua pachapimi c'ulun nirca.

Jahua pacha Dios rimashcami chashna uyarirca.

Chaica rundumi, lunyacuj nina brazusmi carca.

14P'iñajcunataca paipaj puntajlla caspita shitashpami caita chaita cacharca.

Paipaj relampacunata cachashpami chingachirca.

15Mandaj Dios, can yallitaj p'iñarishpa p'ucujpica, mama cucha yacu ucujpish ricunallami saquirirca.

Cai pacha allpapaj shungupish ricunallami tucurca.

16Diosmi ñucataca jahuamanta maquita chutashpa japihuarca.

Millpucuj jatun yacumantami llujshichihuarca.

17C'ari c'ari ñucata p'iñajmantami quishpichirca.

Ñucata p'iñajca ñucata yalli c'ari c'aricunami carca.

18Paicunaca ñuca llaquihuan cai punllapimari japishpa llaquichircacuna.

Chashna cajpipish, Mandaj Diosmi ñucataca ayudahuarca.

19Ñucataca canmi jatun pambaman llujshichij shina quishpichircangui.

Can munashca cajpimi quishpichircangui.

20Ima shinami cashcata rurarcani, chai shinallatajmi Mandaj Diosca curca.

Ñuca chuya maqui cashca shinallatajmi paipish ñucaman cuna cashcataca curca.

21Ñucaca Mandaj Diospaj ñanpimi purircani.

Paita mana manchajcuna shinaca, Diosmantaca mana caruyashcanichu.

22Can yachachishcacunataca, manataj cungarircanichu.

Can mandashcacunamantaca, manataj caruyarcanichu.

23Mana allita ruranamantaca huaquichirircanimi.

Paipaj ñaupajpica ima pandata mana rurarcanichu.

24Ñuca ima shinami cashcata rurarcani, chai shinallatajmi

Mandaj Diosca ñucaman cuna cashcataca curca.

Paipaj ñaupajpi ima shinami ñuca maqui chuya carcani, chai shinallatajmi cun.

25Llaquij runamanca, canpish llaquij cashcallatatajmi ricuchingui.

Tucuita alli rurajpajca, canpish allita ruranguimi.

26Chuya cajmanca, canpish chuya cashcallatatajmi ricuchingui.

Llaquichijcunapajca canpish llaquichij cashcallatatajmi ricuchingui.

27Llaquihuan cajcunataca canmi quishpichingui.

Jatun tucushcacunataca cumurichinguimi.

28Mandaj Dioslla, canmi ñuca lamparataca japichingui.

Ñuca Dioslla, amsapi cajpipish canmi achijyachingui.

29Canhuanca achca soldadocunatapish urata janajta cachashallami.

Ñuca Dioshuanca jatun pircacunatapish urmachishpa llaquichingapaj yaicushallami.

30Mandaj Diospaj ñanpica, ima panda mana tiyanchu.

Mandaj Diospaj shimica rupachishpa tucui mapata anchuchishca cullqui shinami.

Paipi shunguta churashpa shuyajcunapajca escudo shina pacajmi.

31Mandaj Diosmanta shujtaj Diosca ¿pitaj tiyangari? Mandaj Diosllamari Diosca.

¿Pitaj rumica cangari?

Ñucanchij Diosmari chai rumica.

32Diosmi paipaj poderhuan chumbillichin.

Ñuca ñanta allichijca paimari.

33Paimi ñuca chaquicunataca taruga chaqui shina callpajta ruran.

Jahua urcucunapi cajpipish ima manchai illajllatami charihuan.

34Macanacungapaj ñuca maquicunata yachachijpish paimari.

Bronce arcota ñuca rigrahuan chutanata yachachijpish paillatajmari.

35Ñucata quishpichij escudotapish canmi cungui.

Cambaj alli ladopimi charihuangui.

Cambaj c'uyaihuanmi jatunyachishcangui.

36Ñuca purichunpish ñantaca purinajllatami rurashcangui.

Chaimi ñuca chaquicunapish mana lluchcarishca.

37Ñucata p'iñajcunata catishpaca, japingacamami catircani.

Tucuita tucuchishpatajmi tigraj carcani.

38Tucuicunami ñuca chaqui ucupi urmarcacuna.

Ñutuchircanimi manataj jatari tucungacunachu.

39Jatun macanacuipi macanacuchunpish fuerzatami chumbillichishcangui.

Ñucata p'iñajcunataca cumurichishpami ñuca maquipi churashcangui.

40Ñucata p'iñajcunataca tigrachishpami cacharcangui.

Ñucata p'iñajcunata ñuca tucuchichunmi chashna rurarcangui.

41Paicuna caparicujpipish pi quishpichij mana tiyarcachu.

Mandaj Diosta caparijpipish mana uyarcachu.

42Tucuita cutashpami huaira apana ñutu allpata shina rurarcani.

Ñancunapi sirij lodota shinami llujshichishpa shitarcani.

43Ñuca llajtapi causajcuna p'iñacunmantapish quishpichircanguimi.

Llajtacunata jatun mandajtami rurarcangui.

Mana rijsishca runacunami ñucapajtaca rurarcacuna.

44Mana rijsishcacunamari ñucata cazungapaj curincuna.

Ñuca rimajta uyashpaca cazunllacunami.

45Mana rijsishcacunaca fuerza illajmi tucurcacuna.

Paicuna paca tucushca cashcamantapish chujchushpami llujshircacuna.

46Mandaj Diosca huiñaita causacuchunlla.

Ñuca jatun Rumica alli nishca cachun.

Ñucata quishpichij Diosca, jatunyachishca cachun.

47Paica ñucata llaquichijcunata llaquichij Diosmi.

Gentecunata ñuca ucupi churaj Diosmi.

48Paica ñucata p'iñajcunapaj maquimanta quishpichijmi.

Ñucata llaquichingapaj huaicashpa jataricujpipish ñucata paicunapaj jahuapi churajmi.

Huañuchij runapaj maquimantami quishpichihuarcangui.

49Mandaj Dioslla, chaimantami tucui llajtacunapi canmanta huillasha.

Cambaj shutitaca cantacushallami.

50Pai churashca jatun mandajtaca c'uyanmi.

Paitaca jatun macanacuipipish mishachinmi.

Davidtapish, paipaj huahua huahuacunatapish huiñaitami chashna pushanga.