1Mandaj Diosca ñucataca cashnami nirca:
2“Huañujlla aichayuj runalla, cambaj ñahuita Seir urcuman churashpa, pai imalla tucunata huillai.
3Cashna ningui: Mandaj Jatun Diosca cashnami nin: Seir urculla, canhuanca p'iñami cani, cantaca ñuca maquita chutashpami llaquichisha, llaquinayajta shitashcatami saquisha.
4Cantapish, canpi tiyaj pueblocunatapish llaquinayajtami saquisha. Chashna rurajpimi ñucataca, Mandaj Diostaj cashcataca yachangui.
5Canca huiñaita p'iñanacushpallami causarcangui. Chaimantami israelcuna yallitaj jatun llaquita apacujpipish, espadahuan huañuchicujcunaman japishpa curcangui.
6Chaimantami Mandaj Jatun Diosca cashna nini: Ñucaca causacunimi, cantapish huañuchingacunami. Canllataj huañuchinata mana saquirishcamantaca, cantapish huañuimi japinga.
7Seir urcutaca llaquinayaj shitashcatami saquisha. Shinallataj paipajman rijcunatapish, paipajmanta shamujcunatapish huañuchishami,
8cambaj urcucunapica huañushcacunatami jundachisha. Lomacunapipish, pugru pambacunapipish, tucui yacu huaicucunapipish espadapi huañushcacunami urmangacuna.
9Cantaca huiñaipajmi llaquinayajta saquisha, canpi tiyaj pueblocunapish mana cutin allichishcachu canga. Chashna rurajpimi ñucataca, Mandaj Diostaj cashcataca yachanguichij.
10Canca: Mandaj Diosllataj Israel llajtapi cajpipish, ishquindij llajtacunata ñucapajlla cachun quichushpa japishatajmi nircanguimi.
11Chaimantami Mandaj Jatun Diosca cashna nini: Ñucaca causacunimi. Ima shinami israelcunata p'iñachishpalla, jatunta llaquichishpalla causarcangui, chashnallatajmi ñucapish cantaca jatunta llaquichisha. Canta chashna llaquichijta ricushpami, israelcunaca ñucataca rijsingacuna.
12Canca Israel llajtapi tiyaj urcucunataca, p'iñashcamantami cashna nircangui: Cai urcucunataca tucui chingachinchijtajmari. Chashna chingachichunmari ñucanchijman cushca nishpa rimashcataca, Mandaj Dios ñucatajmi uyarcani. Ñuca llaquichijpimi, chaitaca yachangui.
13Canca yallitaj jatun tucushpami, ñucata c'ariyashpa manchanayajta rimarcangui. Chaitaca ñucatajmi uyarcani.
14Chaimantami Mandaj Jatun Diostaj cashna nini: Tucuicuna ricushpa cushicuchunmi cantaca llaquinayajta saquisha.
15Canca israelcuna causacun ñuca cushca llajta llaquinayaj tucushcata ricushpaca cushicurcanguimi, chashnallatajmi cantapish rurasha. Seir urcuca llaquinayajmi tucunga, tucui Edom llajtami chaipi causajcunandij llaquinayaj saquiringa. Chashna rurajpimi ñucataca, Mandaj Diostaj cashcataca yachangacuna ninmi ni” nircami.
Who We AreWhat We EelieveWhat We Do
2025 by iamachristian.org,Inc All rights reserved.
