2 REYES 9 - Quichua Chimborazo Bible

Israelcunata mandaj cachun Jehuta churashcami

1Profeta Eliseoca, profeta canata yachacujcunapuramanta shujta cayashpaca:

–Chumbillirishpa, cai botella aceiteta apashpa Galaadpi caj Ramotman ri.

2Chaiman chayashpaca, Nimsipaj nieto Josafatpaj churi Jehuta mashcangui. Paipajman yaicushpaca paitaca huauquicunamanta ch'icanchishpa shujtaj ucuman pushashpa,

3aceite botellata japishpa paipaj umapi tallishpaca: “Mandaj Diosca: Ñucami cantaca israelcunata jatun mandaj cachun aceiteta umapi churachini ninmi” ningui. Chashna nishpaca punguta pascashcahuan callpamunguilla– nircami.

4Shina nijpimi profeta mosoca, Galaadpi caj Ramotman rirca.

5Pai chayanapajca, soldadocunata mandajcuna tandanacushcami, tiyacushca carca. Chaimi paica:

–Soldadocunata mandaj, canmanca shuj huillanatami huillanaman shamuni– nijpi Jehuca:

–¿Maijan ñucanchijmanta huillasha ningui?– nijpi paica:

–Can mandajmanmi huillasha nini– nirca.

6Shina nijpi Jehuca jatarishcahuan rishpami, shuj ucuman paihuan yaicurca. Chai ucupimi chai huillaj runaca, aceiteta paipaj umapi tallishpaca:

–Israelcunata Mandaj Diosca cashnami nin: Ñuca agllashca israelcunata jatun mandaj cachunmi, aceitehuan umapi churachini.

7Canmi canta mandaj Acabpaj familiacunataca huañuchingui. Ñucapajta ruraj tucui profetacunatapish, Mandaj Diospajta rurajcunatapish paipaj huarmi Jezabel huañuchishpa yahuarta jichashcamantami chashna huañuchichisha ninmi.

8Acabpaj huasi familiaca tucuimi chingaringa. Israelpica Acabpaj churicunapajta ruraj cachunpish, mana ruraj cachunpish tucuimi chingachisha.

9Acabpaj huasi familiataca, Nabatpaj churi Jeroboampaj huasi familiata shina, Ahiaspaj churi Baasapaj huasi familiata shinallatajmi chingachigrini.

10Jezabeltaca Jezreel pambapimi allcucuna micunga, paita pambajca pi mana tiyangachu ninmi– nishpaca, profetaca punguta pascashcahuanmi callparca.

11Jehú chaimanta llujshishpa paipaj amopajta rurajcunapajman tigrajpica paicunaca:

–¿Sumaj causaichu tiyanga nin? Chai lococa ¿cambajmanca imapajtaj shamushcari?– nijpimi Jehuca:

–Chai runataca cancunallataj rijsinguichijmi, pai imata huillashpa purij cashcatapish yachanguichijmi– nirca.

12Shina nijpimi paicunaca:

–Manapish imata yachanchijchu. Imata nishca cajpipish tucuita parlaillari– nijpi, paica Mandaj Diosca:

–Cantaca israelcunata jatun mandaj cachun, ñucami aceitehuan churani ninmi nishpami rin– nirca.

13Chaimi tucuicuna paicunapaj churanacunata llujshichishcahuan, Jehupaj jatun tiyanapi mantarcacuna. Chashna rurashpaca cornetacunapi tocashpami: “¡Jehuca jatun mandajmi!” nircacuna.

Israel llajtata jatun mandaj Joramta Jehú huañuchishcami

14Nimsipaj nieto Josafatpaj churi Jehuca, Joramta huañuchingapajmi israelcunahuan tandanacushpa parlanacurca. (Jatun mandaj Joramca tucui soldadocunahuanmi, Galaadpi caj Ramotpi causajcunata mitsashpa, Siria llajtata jatun mandaj Hazaelhuan macanacucurca.

15Siriocunata jatun mandaj Hazaelhuan macanacucujpi siriocuna chugrichishcata jambiringapajmi, jatun mandaj Joramca Jezreel puebloman tigrashca carca). Joram chaipi cajpimi Jehuca paihuan cajcunataca: “Cancuna ñucata jatun mandaj cachun munashpaca, cai pueblomanta maijan rishpa Jezreelpi Joramman huillagrichunca ama saquinguichijchu” nircami.

16Joramca ungushca cashcamanta Jezreelpi cajpimi, Jehuca paipaj carropi tiyarishcahuan Jezreelman rirca. Judá llajtata jatun mandaj Ocoziaspish, Joramta ricunaman uriyashcamantami chaipi carca.

17Achca soldadocunahuan Jehú shamucujta ricushpami, Jezreel pueblo torrepi chapaj soldadoca:

–Achca soldadocunami chaita shamucun– nishpa huillajpi Joramca:

–Ima allipajchu shamucungui nishpa tapunaman shuj soldadota caballopi cachaichij– nirca.

18Caballopi tiyarishca soldado rishpa Jehuhuan tupashpaca:

–Jatun mandajmi canca ima allipajchu shamucungui nishpa tapuchun cachan– nijpi Jehuca:

–Canca imapajtaj allipaj cashcata mana allipaj cashcata yachasha ningui, ñucata catishpa tigrai– nirca.

Chaita ricushpami torrepi chapaj soldadoca:

–Tupanaman cachashca soldadoca chaita shamucujcunahuan tupashpaca, mana tigrashpa ricurinchu– nishpa huillarca.

19Chashna nijta uyashcahuanmi, jatun mandajca shujtaj soldadota caballopi cacharca. Chai soldadopish shamucujcunahuan tupashpaca:

–Jatun mandajmi canca ima allipajchu shamungui nishpa tapunaman cachan– nijpi Jehuca:

–Canca imapajtaj allipaj cashcata, mana allipaj cashcata yachasha ningui, ñucata catishpa tigrailla– nirca.

20Chaita ricushpaca cutinllatajmi, torrepi chapaj soldadoca:

–Tupanaman cachashca soldadoca, paicunahuan tupashpaca mana tigranchu. Carropi shamucujca, Nimsipaj nieto Jehumari yuyachin. Carrotaca pai purichij shinallatajmi, yallitaj callpachimucun– nishpami huillarca.

21Chaimi israelcunata jatun mandaj Joramca:

–Ñuca carrota caballota aisachichij– nijpi ña aisachijpica paica chai carropi, Judá llajtata jatun mandaj Ocoziaspish paipaj carropi huichiyashpa, Jehuta tupanaman llujshircacuna. Paicunaca Jezreelmanta caj Nabotpaj allpapimi Jehuhuan tuparcacuna.

22Joramca Jehuta ricushpaca:

–¿Jehú sumaj causai tiyachunchu shamungui?– nijpi Jehuca:

–Cambaj mama Jezabel rurashcalla dioscunahuan huainayashpa, brujianacunata rurashpa causacujpica, ima sumaj causaitaj tiyangari– nircami.

23Shina nijpimi Joramca, carrota aisaj caballocunata muyuchishcahuan callpashpa:

–¡Ocozías, Jehuca ñucanchijta huañuchingapajmari shamushca!– nirca.

24Chashna callpacujpipish, Jehuca paipaj arcahuan puntajlla caspita shitajpimi, chai caspica Jorampaj huashapi yaicushpa corazonta pasashpa ñaupajman llujshijpi Joramca, paipaj carropi urmashpa huañurca.

25Chaimi Jehuca, paipaj soldadocunata mandaj Bidcartaca:

–Caita japishpa Jezreelmanta caj Nabotpaj allpapi shitagri. Mandaj Dios huillashcataca canllataj yuyaringuimi. Jorampaj yaya Acabpaj runacunahuan paipaj carropi ricujpimi, Mandaj Diosca pai huañuna cashcataca cashna nishpa huillarca:

26Nabottapish paipaj churicunatapish yahuarta jichashpa huañuchijtami caina punllaca ricurcani. Chaimanta paitapish cai pamballapitajmi huañuchisha nircami Mandaj Diosca. Mandaj Dios nishca shinallataj Joramtaca, Nabotpaj allpapi shitai– nircami.

Ocoziasta Jehú huañuchishcami(2 Cr 22.7-9)

27Judá llajtata jatun mandaj Ocoziasca chaita ricushpami, huertapi caj huasiman rina ñanta miticushpa callparca. Chaimi Jehuca:

–¡Paitapish catishpa rishpa, carrollapitaj chugrichichij!– nirca.

Shina nijpica Ibleam c'uchupi caj Gurman rina huichipimi chugrichirca. Ocoziasca Meguidocama miticushpa callpashpa rishpami chaipi huañurca.

28Chaimi paipajta rurajcunaca, shuj carropi churashpa Jerusalenman aparcacuna. Chaipica Davidpaj pueblopimi paipaj ñaupa yayacunata pambashca c'uchullapitaj pai rurachishca jutcupi churarcacuna.

29Acabpaj churi Joram israelcunata ña chunga shuj huatata mandacujpimi, Ocoziasca Judá llajtata mandai callarirca.

Jezabel huarmita huañuchishcami

30Chai q'uipaca Jehuca Jezreelmanmi shamurca. Chaita uyashpami Jezabelca ñahuita pintarishpa, umata sumajta allichirishpa ventanaman llujshirca.

31Puebloman yaicuna punguta Jehú yaicucujpimi Jezabelca:

–¿Imanallataj cangui Zimri shina quiquin amota huañuchij?– nirca.

32Shina nijpi Jehú huichilla ricushpaca:

–¿Maijanllataj ñucapura canguichij?– nijpica, eunucocunamanta ishqui runacunachu, quimsa runacunachu imatajshimi, ventanata asomarishpa Jehuta urilla ricurcacuna.

33Paicunatami Jehuca:

–¡Chai huarmita cai pambaman shitaichij!– nijpi, paicuna Jezabelta pambaman shitajpica, paipaj yahuarca pata quinripipish, caballocunapipish tsiraparirca. Jehuca, chai huarmitaca caballocunahuanmi saruchirca.

34Chai q'uipa Jehú chai puebloman yaicushpa micushca, ubyashca q'uipaca:

–Dios p'iñashca chai huarmita japishpa pambagrichij. Ima shina cashca cashpapish, jatun mandajpaj ushushimari carca– nircami.

35Paicuna pambangapaj rishpaca uma tulluhuan, chaqui, maquicunallahuanmi japircacuna.

36Chaicunallata japishpa huillanaman tigrajpimi, Jehuca:

–Mandaj Diosca paipajta ruraj tisbita Eliastaca: Jezabel huarmipaj aichataca Jezreelpaj allpapimi allcucuna micunga.

37Paipaj aichaca Jezreelpaj allpapica jatun mapa shinami canga. Chashna cajpi paipaj aichataca pi mana rijsipajmi canga nishpami huillachirca– nircami.