1 PEDRO 2 - Quichua Chimborazo Bible

1Chaimanta tucui millaita saquichij. Tucui shina umaj canata, mishqui shimi jayaj shungu canata, envidiaj canata, tucui laya millaita parlanatapish saquichij.

2Ashtahuanpish cunanlla huacharishca huahuacuna shina, imahuan mana chagrushca Diospajlla lecheta munaichij. Chashna cashpami quishpichishcapica huiñanguichij.

3Mandaj Jesús cushca allita chasquishcataj cashpaca, chashnami cana canguichij.

Cristoca causaj rumimi

4Jesucristoman c'uchuyaichij. Paica causaj rumimi. Runacuna mana munashpa shitashcami. Ashtahuanpish Diospajca agllashca achca valijmari.

5Cancunapish causaj rumicunallatajmi canguichij. Chashna cashpami Diospajlla huasita huasichicuncuna canguichij. Jucha illaj curacunapishmi canguichij. Jesucristomantaca Dios chasquinalla causaita causaichij.

6Quillcachishcapica:

“Riquichij, huasichi callaringapaj esquinapi churana agllashca valij rumitaca Sionpimi churani.

Maijanpish paipi crijca, mana pingachishca cangachu” ninmi.

7Cristota crij cancunapajca paica achca valijmari. Ashtahuanpish mana crijcunapajca Quillcachishcapi nishca shinaca:

“Huasichijcuna shitashca rumica, huasichi callaringapaj esquinapi churana rumimi tucushca”.

8Shinallataj:

“Ñitcana rumimi, urmachij jatun rumipishmi” nishcami pajtashca.

Paicunaca Diospaj shimita mana cazushcamantami ñitcancuna. ¡Paicuna mana cazushcamantami ñaupaman chashna tucuchun nishca!

Cancunaca Dios agllashcacunami canguichij

9Ashtahuanpish cancunaca Dios agllashcacunapura, jatun mandajpajta ruraj curacuna, jucha illaj llajta, Diospajlla cachun randishca pueblomi canguichij. Cancunataca amsamanta paipaj sumaj achijman cayashpa, mancharina allicunata huillachun agllashcacunami canguichij.

10Cancunaca ñaupaca mana Diospaj pueblochu carcanguichij. Cunanca Diospaj pueblomi canguichij. Ñaupaca Dios mana llaquishcacunami carcanguichij. Cunanca Dios llaquishcacunami tucushcanguichij.

Diospajta rurajcuna shinataj causaichij

11C'uyashcacuna cancunataca shujtaj llajtamanta pasacujllacuna shina causachunmi cai pachapica ñucaca rogani. Cancunapaj almahuan macanacucuj aicha munaicunataca ama ruraichijchu.

12Diosta mana rijsijcunapaj ñaupajpi alli causaichij. Chashna cajpimi, millaita rurajcunata shina cunan rimacujcunaca cancuna allita rurashcamantaca, imalla rurashcata Dios ricuchi punllapi paicunaca Diostaca allimari cangui ningacuna.

13Mandaj Jesuspaj cashcamantaca tucui tandanacushcacunapaj mandajcunata, mama llajtacunata jatun mandajcunatapish cazuichij.

14Shinallataj jatun mandaj churashca mandajcunatapish cazuichij. Paicunaca millaita rurajcunata llaquichijmi, allita rurajcunataca allimari cangui nijmi.

15Yuyai illaj mana yachaj runacunataca allita rurashpa upallachichunmi Diosca munan.

16Huatashca shinamantaca cacharichishcami canguichij. Cacharichishcami canchij nij tucushpa, ñataj millaita ruranguichijman. Ashtahuanpish Diospajta rurajcuna shinataj causaichij.

17Tucuicunahuan alli caichij. Huauquicunata c'uyaichij. Diosta manchaichij. Jatun mandajtapish cazuichij.

18Amopajta rurajcuna, cancunapaj amocunataca shungumanta cumurijcuna caichij. Llaquij alli amocunallataca ama chashnaichijchu. Ashtahuanpish millai amocunatapish shungumanta cumurichij.

19Diospaj ñaupajpi alli ricuringapaj, pai yuyailla cajpi yangamanta llaquichijpi llaquicunata apajca, alli crijmi nishcami.

20Juchata rurashcamanta llaquichijpi llaquita apacushpaca ¿ima allitataj ruracunguiyari? Ashtahuanpish allita ruracujpi llaquichijpi llaquita apashpami, Diospaj ñaupajpica alli crijmi nishca cangui.

21Chashna llaquita apachun cayashcacunami carcanguichij. Cristopish ñucanchijmantaca llaquita aparcami. Pai apashca shinallataj ñucanchijpish llaquita apachunmi chashna tucurca.

22Cristoca ima juchata mana rurarcachu, paipica umaj canaca manataj tiyarcachu.

23Llaqui tucushca alli canman nijpipish, mana chashnallataj cutichircachu. Llaquichicujpipish, ñucapish llaquichishami nishpa mana manchachircachu. Chaipaj randica tucui imatapish cashcata ricuchij Diospaj maquipimi mingarca.

24Cristollatajmi ñucanchij juchacunataca paipaj aichapi apashpa caspipi chacatashca huañurca. Ñucanchijca juchata ama rurangapajca huañushca shina cashpa, Dios munashca shina causachunmi chashnaca huañurca. Paita chugrichishcamantami cancunaca jambishca canguichij.

25Cancunaca chingarishca ovejacuna shinami carcanguichij. Ashtahuanpish cunanca cancunapaj almacunata Michijpajman Obispopajmanmi tigrashcanguichij.