RUT 1 - Quichua Chimborazo Bible

Rutmantapish Noemimantapish

1Israel llajtata juezcuna mandacui huatacunami, chai llajtapi jatun yaricai tiyajpi, Judapi caj Belenpi causajcunapuramanta shuj runaca paipaj huarmindij, paipaj ishqui churicunandij Moab llajtapi causagrirca.

2Judapi caj Belenmanta Moabman rij runaca efrateopuramanta Elimelecmi carca. Paipaj huarmica Noemí paipaj ishqui churicunaca Mahlón, Quelión shuticunami carca. Paicuna Moabman chayashpaca chaipimi causarcacuna.

3Moabpi causacushpa Elimelec huañujpimi, paipaj huarmi Noemica ishqui churicunandijlla saquirirca.

4Chai ishqui churicunaca, moabitapuramanta caj Orfa, Rut solteracunahuanmi cazararcacuna. Paicunaca chaipica, chunga huatacuna shinatami causarcacuna.

5Mahlonpish, Quelionpish huañujpimi, Noemica, cusapish, churicunapish illajlla sapalla saquirirca.

6Noemica Moabpi causacushpami: “Mandaj Diosca pai agllashcacunataca ñami ricuj shamushca. Granocunaca ñami p'ucucun” nijta uyashpami, Noemica, paipaj llajtallamantaj tigranata yuyarishpa, paipaj ishqui nueracunandij allichirirca.

7Ña allichirishpaca, paicuna causacushcamantaca paipaj ishqui nueracunandijmi Judaman tigrangapaj llujshirca.

8Ñanta ña ricushpami Noemica, paipaj nueracunataca:

–Cancunapaj mamacunapaj huasiman tigraichijlla. Cancunaca ñucatapish ñuca huañuj churicunatapish c'uyajmi carcanguichij. Chaimantaca Mandaj Diosmi cancunamanca allicunata cunga.

9Cancunamanca Mandaj Dios sumaj cusata cuchun. Cancunapaj cusapaj huasipi sumajta causanguichij– nishpa paipaj nueracunata muchajpimi, paicunaca caparishpa huacashpa,

10–Ñucanchijca canhuanmi cambaj llajtaman rishuntaj ninchij– nircacuna.

11Chaimi Noemica:

–Huahuacuna tigraichijlla. Cancunahuan cazarachunca ñucaca chichullapish mana canichu. ¿Imapajtaj ñucahuanca rishun ninguichij?

12Cancunapaj mamapajman tigraichijlla. Cutin cazarashpa cusayuj tucungapajpish yallitaj yuyajmari cani. Shina cajpipish ima shinamanta cunantaj cazarashpa, cunan tutallataj chichushpa huahuacunayuj tucujpipish,

13¿paicuna huiñangacama shuyai tucunguichijmanchu? Paicunata c'uyashcamanta paicunahuan cazarasha nicushpalla mana cazarashpa shuyanaca ñucapajpish cancunapajpish mana allichu huahuacuna. Mandaj Dios llaquichishcamanta ñucaca cancunata yallimi llaquita apacuni– nirca.

14Chaimi paicunaca cutinllataj caparishpa huacarcacuna. Orfaca, paipaj suegrata muchashpa tigrarcallami. Ashtahuanpish Rutca, paipaj suegrahuanmi saquirirca.

15Chaimi Noemica:

–Riqui cambaj c'achunca paipaj llajtaman, paipaj dioscunapajman tigranmi. Canpish paita catishpa rilla– nirca.

16Ashtahuanpish Rutca:

–¿Ima nishpataj ñucataca canmanta ch'icanyashpa tigrachuntaj ningui?

Can maiman rishcamanmi ñucapish risha.

Can maipi causashcapimi ñucapish canhuan causasha.

Cambaj familiapish ñuca familiami canga, cambaj Diospish ñuca Diosmi canga.

17Can maipimi huañungui, ñucapish chaillapitajmi huañusha.

Can maipimi pambashca cangui, ñucapish chaillapitajmi pambashca casha.

Cantapish ñucatapish huañuillami ch'icanyachinga.

Chashna nishca jahua ñuca canmanta ch'icanyajpica, ñucataca Mandaj Diosllataj jatunta llaquichichun– nircami.

18Noemica Rut paihuan rishataj nishcamantami, ña mana imata ashtahuan nirca.

19Paicunaca ishquindij rishpami, Belenman chayarcacuna.

Paicuna chayajpica, chaipi causajcunaca tucuicuna achcata mancharishpami, caishuj chaishuj tapunacushpaca:

–¿Caica manachu Noemí?– nircacuna.

20Chaimi Noemica:

–Ñucataca ama Noemí nihuaichijchu. Ashtahuanpish Mara nihuaichij. Tucuita Rurai Tucuj Diosca, jatun llaquitamari rurahuarca.

21Caimantaca achcata charijmi rircani.

Ashtahuanpish cunanca ñucataca Mandaj Diosca chushaj maquillatamari tigrachimun.

Mandaj Dios ñucahuan p'iñarishcata ricuchishpa, pai Tucuita Rurai Tucuj cashcahuan llaquichijpi llaquihuan cajtaca, maitataj Noemí ninguichigari– nirca.

22Chaimi Noemica Moabmantaca, chai llajtamanta caj paipaj nuera Rutndij Belenman tigramurcacuna. Paicuna chayamui punllacunapimi Belenpica, cebada cozicha callaricurca.