HABACUC 2 - Quichua Chimborazo Bible

Mandaj Diosca Habacucman cutichishcamanta

1Chapachun ñucata churashcapimi shayacusha, torre jahuapica shayacushallami. Ñucata imata rimajta uyaracushallami, ñuca ima mañashcata cutichijta chaparacushami.

2Shinallataj Mandaj Diosmi ñucamanca cashna nishpa cutichirca: “Muscuipi imallata ricushcataca tablacunapi quillcangui. Can quillcashcata maijan rezashpaca, mancharishpa callpachuncuna.

3Muscuipi shina ricushcacunaca asha huatacunata q'uipayashpapish, utcami tucuringa, mana llullangachu. Q'uipayajpipish chaparacuilla, shamungami mana uniyangachu, chaica pajtangami.

4Riqui mana alli shunguta charijca jatun tucunllami. Ashtahuanpish cashcata rurajca, crishcallamantami causanga.

5Shinallataj vinota ubyaj runaca huañuimanmi chayan. Jatun tucushca runaca mana causangachu. Seol shinami mana sajsan. Paica huañui mana saquirij shinami mana shaicun. Ñaupamanca paipajlla cachunmi pueblocunapi causajcunataca tucuicunata tandachirca” nircami.

Cashcata mana rurajcunata llaquichishca canamanta

6¿Manachu paitaca yuyachij shimicunahuan rimangacuna? ¿Manachu paitaca chanzata rurangacuna? Paitaca cashnami ningacuna: “Manapish paipajhuan charijyajca ¡aij imachari tucunga! ¿Maicamataj prendacunata japishpa montonacungallari?” ningacunami.

7Ñataj canman divijcuna jatarishpa llaquichinman. Ñataj canta chujchuchijcuna rijcharinman. Canca, paicuna quichushpa apanallami cangui.

8Ashtahuanpish canca achca llajtacunamantami imalla charishcacunata quichushpa aparcangui. Cantaca runacunapaj yahuarmantapish, allpata shuhuashcamantapish, imalla tiyajcunata shuhuashcamantapishmi chai llajtamanta chai pueblocunallamanta shamushpa, can imalla charishcacunataca quichushpa apangacuna.

9Shujtajcuna charishcacunata munashcamanta shuhuashpa huasipi jundachijca, ¡aij imachari tucunga! Paica jatun llaquimanta miticungapajmi paipaj huasitaca tazinta shina pi mana ricunallapi jahuaman churarca.

10Pinganayajta rimashpa cunashcacunatami chasquircangui. Achca pueblocunatami llaquinayajta saquircangui. Chashna rurashpaca, cambaj quiquin aichallatatajmi llaquichishcangui.

11Rumicunaca pircashca patamantami caparingacuna. Caspicunapish maipi churashcamantami cutichingacuna.

12Pueblota yahuarhuan shayachijcunaca, shujtaj pueblota quichushcacunahuan jundachijcunaca, ¡aij imachari tucungacuna!

13¿Manachu caica tucuita Mandaj Diosmanta canga? Pueblocunapi causajcunaca ninapi rupachichunllami trabajangacuna. Llajtacunapi causajcunaca yangamantami shaicujta trabajangacuna.

14Ima shinami mama cuchaca yacuhuan junda tiyacun, chashnallatajmi cai pachapi causajcunaca Mandaj Dios jatun cashcata rijsina yuyaihuan junda cangacuna.

15Shujtajcunaman ubyachijlla, ¡aij imachari tucunga! Canca lluchulla cashcata ricungapajmi, hielta ubyachircangui. Chashna rurashcamantaca, ¡aij imachari tucungui!

16Canca alli nishca canapaj randica, pingachishcami cana cangui. Canpish machayari, cantapish lluchullatami saquinga. Mandaj Diospaj alli maquipi charicun vasopi tiyajtami canmanca ubyachinga. Can alli nishca canataca shungu tigrangami.

17Libanota llaquichishca llaquicunallatajmi cantapish japinga. Sacha animalcunami cantaca manchachinga. Canllataj runacunata huañuchishcamanta, allpata shuhuashcamanta, pueblocunapi causajcunapajta shuhuashpa apashcamantami cai llaquicunaca cantapish japinga.

18Runa sumajta trabajashpa rurashca diosca ¿imapajtaj valingari? Yacuyachishpalla rurashca diosca llullanallatami yachachin. Chai runaca paillataj rurashca mana rimaj dioscunallapimi shunguta churan.

19Caspi diosta: “Rijchari” nijcunalla, mana rimaj rumi diosta: “Puriyari” nijcunalla, ¡aij imachari tucungacuna! ¿Paicunaca cancunamanca imata yachachi tucungachu? Riquichij, chai dioscunaca curihuan cullquihuan jahuataca sumajta churashcallami. Paicunaca samaitaca mana charincunachu.

20Ashtahuanpish Mandaj Diosca, paipajlla ch'icanyachishca huasipimari causacun. Chashna cashcamantaca tucui cai pachapi causajcuna, upalla caichigari.