ZACARÍAS 9 - Quichua Chimborazo Bible

Israel c'uchulla llajtacunata llaquichinamanta

1Mandaj Diosca, Hadrac llajtatapish, Damasco pueblotapish llaquichinatami huillacun. Tucui cai pachapi causajcunapish, tucui Israel aillucunapish Mandaj Diostami chaparana.

2Damasco pueblo c'uchullapi caj Hamat pueblotapish llaquichishcami canga. Yachaisapa Tiro pueblopish, Sidón pueblopish llaquichishcami canga.

3Tiro puebloca muyundijtami jatun pircata rurarca. Cullquitapish allpata shina, curitapish ñanpi sirij lodota shinami montonarca.

4Achcata charij cajpipish, Jatun Diosmi imata mana charij huajchacunata ruranga. Pai mandanatapish mama cuchapimi chingachinga. Chai pueblotaca, ninahuanmi rupachishpa tucuchinga.

5Chaita ricushpami, Ascalón pueblopi causajcunaca mancharingacuna. Gaza pueblopi causajcunapish shungupi nanarishpami llaquiringacuna. Ecrón pueblopi causajcuna shuyacushcapish chingaringami. Shinallataj Gaza pueblota jatun mandajpish huañungami. Ascalón pueblopica, pi mana causangachu.

6Asdod pueblopica, caru llajtamanta shamuj shuj runami causanga. Chashnami filisteocuna jatun tucunataca tucuchisha.

7Paicunapaj shimimantaca yahuartami anchuchisha. Shinallataj ama micunguichij nishca micunata micucushcatapish quichushami. Paicuna puramantaca, ashacunallami ñucanchij Diospajca saquiringa. Paicunami Judá llajtapica, mandajcuna shina cangacuna. Ecrón pueblopi causajcunapish, jebuseocuna shinami cangacuna.

8“Ñuca agllashcacunata ama ashtahuan llaquichinaman shamuchunmi macanacungapaj chapaj runa shina ñuca huasi muyundijta cuidaracusha. Cunanca ñuca ñahuihuanmi ricusha.”

Siónpi causajcunapaj jatun mandaj shamunamanta

9Siónpi causajcunalla, achcata cushicuichigari. Jerusalenpi causajcunalla, cushicushpa caparichigari. Cancunapajmanmi jatun mandajca shamunga. Paica cashcata rurajpish, quishpichijpishmi canga. Jatun mandajca, alli shungumi. Burropi tiyarishcami shamunga, aparij burropaj huahua, malta burropimi paica tiyarishpa shamunga.

10Efrainpaj huahua huahuacunapaj carretacunatapish, Jerusalenpi causajcunapaj caballocunatapish chingachishami. Macanacuna arcocunapish p'aquiringami. Llajtacunapipish macanacuicunaca mana tiyangachu nishpami huillanga. Paimi cai pachataca shuj lado mama cuchamantaca, caishuj lado mama cuchacama mandanga. Jatun yacumanta callarishpaca, cai pacha maipi tucuringacamami mandanga.

11“Cancunaca ari nishcamanta, cushca yahuarhuanmi quishpiringuichij. Ñucami cancunapaj prezucunatapish, chaquishca pugyupi shitashcamanta llujshichircani.

12Prezumanta tigranata shuyacujcunalla, paca tucuna pircaman tigraichigari. Cunanpish, cutinllatajmi cancunataca ñaupamanta yallita mirachisha nishpami huillani.

13Judá llajtapi causajcunataca, arcota shinami ñucapajca allichircani. Efrainpaj huahua huahuacunataca, chai arcopi churashpa shitana puntajlla caspitami rurarcani. Siónpi causajcunalla, cancunataca espadatami rurarcani. Cancunapaj churicunataca, Grecia llajtapi causajcunahuan c'ari c'ari macanacujcunatami rurarcani” ninmi.

14Mandaj Diosmi, paicunataca ñaupashpa ringa. Paipaj puntajlla caspipish, relámpago shinami llujshinga. Mandaj Jatun Diosmi trompetapi tocanga. Paica, jatun acapana chaupitami puringa.

15Paicunataca, tucuita Mandaj Diosmi huaquichinga. Paicunata p'iñajcunataca huañuchingacunami. Huaracahuan shitana rumicunatapish sarungacunami. Yahuartapish vinota shinami ubyangacuna. Chaimantaca machashcacuna shinami caparirishpa puringacuna. Jatun tazapi, altarpi tiyaj gachucunapi shinami jundachingacuna.

16Chai punllacunapica paicunata Mandaj Diosmi, pai agllashcacunataca canlla ovejata shina quishpichinga. Paipaj llajtapica diademapi churashca achij nicuj rumicuna shina sumajyachishcami cangacuna.

17Paicunapaj c'uyaica achcami canga, paicunaca sumaj ñahui runacunami canga. Trigoca mosocunata, vinoca solteracunatami cushichinga.