1 SAMUEL 8 - Quichua Chimborazo Bible

Israelcunaca jatun mandaj tiyachun nishpa mañashcami

1Samuelca ña yuyaj cashpaca, israelcunapaj juez cachunca paipaj churicunatami churarca.

2Paipaj punta churica Joelmi carca. Q'uipa churica Abiasmi carca. Paicunaca ishquindijmi Beerseba pueblopi juezcuna carca.

3Samuelpaj churicunaca, paicunapaj yaya purishca ñancunapica mana purircacunachu. Ashtahuanpish quiquinpajlla charij canata munashcamantami camaricunata japishpa, cashcata ruraj canata saquircacuna.

4Chaimi israelcunata cunaj yuyajcunaca tucuicuna tandanacushpa, Ramá pueblopi Samuelta ricunaman shamushpaca,

5cashna nircacuna: “Canca ñamari yuyajyangui. Cambaj churicunaca can purishca ñancunapica mana purincunachu. Cunanca shujtaj llajtacuna ima shinami jatun mandajta charincuna, chai shinallataj ñucanchijtapish jatun mandaj mandachun jatun mandajta churai” nircacuna.

6Ñucanchijta mandachun jatun mandajta churai nishcaca Samuelpica mana alli cajpimi Mandaj Diosta mañarca.

7Chaimi Mandaj Diosca Samueltaca: “Tucui paicuna ima nishcataca uyailla. Mana cantachu yanganchin. Ashtahuanpish ñuca paicunata ama mandachunmari ñucata yanganchin.

8Paicunaca Egiptomanta llujshichimushca punllamanta cunan punllacama paicuna munashcata rurashpami, ñucata saquishpa shujtajcunapaj dioscunapajta rurancuna. Chashnallatajmi cantapish ruracuncuna.

9Cunanca paicuna mañashcata uyailla. Jatun mandaj paicunata mandacushpaca ima shina mandana cashcata ricuchishpa tucuicunaman alli huillangui” nircami.

10Jatun mandaj tiyachun mañajcunamanca Samuelca Mandaj Dios imallata nishcata tucuita huillashpami,

11cashna nirca:

–Cancunata mandagrij jatun mandajca: Cancunapaj churicunata apashpami, macanacuna carrocunapi purijcuna cachun churashpa, caballocunapi purijcuna cachun churashpa jatun mandajpaj carrota ñaupashpa rijcuna cachun churanga.

12Maijancunataca, huaranga soldadocunata mandajcuna cachun, pichca chunga soldadocunata mandajcuna cachun, paipaj allpacunapi yapujcuna cachun, paipaj chagrapi cozichajcuna cachunmi churanga. Maijancunataca macanacunacunata rurajcuna cachun, macanacunapaj carropaj imalla minishtirishcacunata rurajcuna cachunmi churanga.

13Cancunapaj ushushicunataca, mishquijllata ashnajcunata rurajcuna cachun, yanujcuna cachun, tandapaj masajcuna cachunmi churanga.

14Cancunapajtapish alli allpacunata, uva chagracunata, olivos chagracunata quichushpami paipajta rurajcunaman cunga.

15Cancunapaj granocunatapish, cancunapaj uvacunatapish, pai churashca mandajcunaman, paipajta rurajcunaman cungapajmi chungamanta shujta japinga.

16Cancunapajta ruraj c'aricunatapish, huarmicunatapish, cancunapaj c'ari c'ari q'uipa huiñaicunatapish, cancunapaj burrocunatapish, paipaj imalla ruranacunapajmi apanga.

17Cancunapaj ovejacunamantapish, chungamanta shujtami apanga. Cancunapish paipajta rurajcunami canguichij.

18Cancuna agllashca jatun mandaj cancunata chashna llaquichijpimi chai punllaca caparishpa huacanguichij. Mandaj Diosca cancunataca manataj uyangachu– nircami.

19Ashtahuanpish Samuel nishcataca israelcunaca mana uyashpami: –Ñucanchijta jatun mandajca tiyanatajmi can nishpa,

20ñucanchijpish shujtaj llajtacuna shinallatajmari cana canchij. Ñucanchij quiquin jatun mandajtajmi ñucanchijtaca mandana can. Macanacuicunapipish paimi ñucanchijta pushanga. Paimi ñucanchijta ñaupashpa ringa– nircacuna.

21Tucui israelcuna imallata nishcata uyashpaca, Samuelca Mandaj Diosman paicuna ima shina nishca shinallataj huillajpimi,

22Mandaj Diosca Samueltaca:

–Paicuna mañashcata uyashpa, paicunata mandaj cachun shuj jatun mandajta churailla– nijpi, Samuelca tucui israelcunataca:

–Cancuna causacun pueblocunallamantaj tigraichijlla– nirca.