PROVERBIOS 10 - Quichua Chimborazo Bible

Yallitaj millaita rurajcunamantapish cashcata rurajcunamantapish

1Yuyachij cai sumaj shimicunaca,

Salomonllataj quillcashcami.

Yachaisapa churica, yaya mamata cushichinmi.

Ashtahuanpish rumi shungu churica,

llaquichishpallami causan.

2Millaita rurashpa charijyashcacunaca,

ima allita mana cunchu.

Ashtahuanpish cashcata ruranaca

huañuimantapish quishpichinmi.

3Mandaj Diosca cashcata rurajtaca,

yaricaillahuanpish mana charinchu.

Ashtahuanpish paita mana manchajcunataca,

paicuna millaita rurashcallatajmi

llaquipi urmachinga.

4Q'uillacunapaj maquica huajchayachinmi.

Ashtahuanpish mana q'uillacunapaj maquica

charijyanmi.

5Yuyaisapacunaca, usya punllacunapimi

chagrataca tandancuna.

Ashtahuanpish chagra tandai punllacunapish

dormicujlla churica, paipaj yayatami

pingaipi churan.

6Cashcata rurajpajca, ima allicunapish

jahuanpi jahuanpimi shamun.

Ashtahuanpish mana manchajcunataca,

millaita rurashcallatajmi shimita tapanga.

7Cashcata rurajtaca allicuna cashcamantami,

yuyarishcapi alli nincuna.

Ashtahuanpish mana manchajcunataca,

mana yuyarincunallapishchu.

8Yachaisapacunallami mandashcacunataca,

shungupi chasquin.

Ashtahuanpish millaita rimaj rumi shungu

runaca urmangatajmi.

9Ima pandata mana ruraj runaca,

imamanta mana manchanchu.

Ashtahuanpish mana allita rurashpa

purijcunaca, jatun llaquimi tucun.

10Millaita rurangapaj ñahuita quimllajca,

llaquitami apamun.

Millaita rimaj rumi shungu runaca,

llaquichishca cangatajmi.

11Cashcata ruraj runa yachachishca

shimicunaca, causaita cuj yacu shinami.

Ashtahuanpish mana manchajcunataca,

paicuna rimashcallatajmi shimita tapanga.

12P'iña yuyaica, p'iñanacuipi

churanllami.

Ashtahuanpish c'uyaica, ima shina

llaquichijpipish cungachinllami.

13Alli yuyaiyujpaj shimimantaca,

alli yachanacunami llujshin.

Ashtahuanpish ima alli yuyai illajca,

varahuan huashapi azotishcami purin.

14Yachaisapacunaca alli yachashcataca,

shungupimi huaquichincuna.

Ashtahuanpish rumi shungu runapaj shimica,

ñapish ima llaquipi churanllami.

15Charij runapajca, achcata charishcaca,

jatun pircayuj pueblo shinami.

Huajchacunaca imata mana charishcamantaca

urmarinllami.

16Cashcata ruraj runaca, causaipajmi

imatapish ruran.

Ashtahuanpish mana manchaj runaca,

juchapajllami imatapish charin.

17Yachachishcata cazunaca causaiman

chayachij ñanmi.

Ashtahuanpish jarcashcata mana

cazujca pandarinmi.

18Shungupi p'iñacuj runaca, mishqui

shimi tucushca llulla runami.

Pita yanga juchachishpa uraman,

janajman parlarijca rumi shungu runami.

19Imatapish yalli rimarijpica,

juchapish tiyantajmi.

Ashtahuanpish shimita jarcarijca,

alli yuyaiyujmi.

20Cashcata ruraj runapaj shimicunaca,

ashtahuan alli cullquimari.

Ashtahuanpish Diosta mana manchajcunapaj

shunguca mana allichu.

21Cashcata ruraj runaca paipaj shimihuanca,

achcacunatami michin.

Ashtahuanpish rumi shungucunaca, yuyaita

mana japishcamantami huañuncuna.

22Mandaj Diostaj cushca allicunaca

charijyachinmi.

Chaica ima llaquipipish mana churanchu.

23Ch'ahuanyashca runapajca millaita

ruranaca, cushicuna pugllai shinami.

Ashtahuanpish yuyaisapacunataca, alli

yachaimi cushichin.

24Diosta mana manchaj runaca imata

manchashpapish, chaitajmi tucunga.

Ashtahuanpish cashcata rurajcunamanca,

paicuna munashcatatajmi cunga.

25Millai runaca jatun acapana

jatarishcahuan, chingarij shina

utca chingarinllami.

Ashtahuanpish cashcata ruraj runaca,

unita causacunllami.

26Q'uilla runata imata ruranaman cachanaca,

vinagreta amullishca shinapish,

ñahuita cushni japishca shinapishmi.

27Mandaj Diosta tucui shunguhuan

manchajpica, uni causaitami cunga.

Ashtahuanpish paita mana manchajcunataca,

utcami causaita quichunga.

28Cashcata rurajcunallami shuyacushca

cushicuitaca japincuna.

Ashtahuanpish mana manchajcunaca,

paicuna shuyacushcataca mana japincunachu.

29Mandaj Diospaj ñanca ima pandata

mana rurashpa causajtaca, torre shinami

huaquichin.

Ashtahuanpish millaita rurajcunataca

chingachinllami.

30Cashcata rurajtaca, pi mana cuyuchingachu.

Ashtahuanpish mana manchajcunaca, cai llajtapica mana causacungallachu.

31Cashcata rurajpaj shimica, alli yachaitami mirachin.

Ashtahuanpish millaita rimajtaca,

c'allutami p'itinga.

32Cashcata rurajca cushicunatami riman.

Ashtahuanpish mana manchajcunaca,

tucui laya millaitami rimancuna.