ZACARÍAS 14 - Quichua Chimborazo Bible

Jerusalenca shujtaj llajtacunata mishana cashcamanta

1Riquichij, Mandaj Dios shamuna punllaca ñallamari chayamucun. Cancuna imalla charishcacunata quichushcataca, cancuna ricucujllapitajmi chaupingacuna.

2Jerusalenpi causajcunahuan macanacushpa mishangapajca, ñucami tucui llajtacunamanta tandachisha. Paicunami cai pueblotaca quichungacuna. Cancunapaj huasicunamantapish ima tiyajtami apangacuna. Cancunapaj huarmicunatapish llaquichingacunami. Cai pueblopi causajcunamanta chaupica, prezumi ringacuna. Chaupica, cai pueblollapitajmi saquiringacuna.

3Chai q'uipami Mandaj Diosca, chai llaquichij llajtacunahuan macanacunaman llujshinga. Jatun macanacuipi shinami macanacunga.

4Chai punllapica paica, Olivos urcu jahuapimi shayaringa. Chai Olivos urcuca, Jerusalén ch'imbapuramantaca, inti llujshin ladomanmi tiyacun. Chai Olivos urcuca, inti llujshin ladomanpish, inti huashicun ladomanpishmi chaupiringa. Chai urcucuna chaupipica, jatun pugru pambami saquiringa. Chaupi urcuca ura ladomanmi tiyaringa, chaupi urcuca janaj ladomanmi tiyaringa.

5Cancunaca, chai urcucuna chaupi pugru pambapimi miticugringuichij. Chai pugru pambaca, Azal llajtacamami canga. Judá llajtata jatun mandaj Uzías mandacui punllacunapi, allpa chujchui tiyajpi manchashpa miticugricuj shinami miticugringuichij. Ñucata Mandaj Diosca, paipajlla causajcunandijmi shamunga.

6Chai punllapica intipish, lunapish, luzerocunapish mana achijyachingachu.

7Chai punlla ima shina canataca, Mandaj Diosllami yachan. Chaipica tutapish punllapish mana tiyangachu. Ashtahuanpish chishiyacujpipish, punllami tucunga.

8Chai punllapica, cashnapishmi tucunga: Jerusalenmantaca, causaita cuj yacucunami llujshinga. Chai yacucunaca tamya punllacunapipish, usya punllacunapipish chaupica inti llujshin lado mama cuchaman, chaupica inti huashicun lado mama cuchamanmi ringa.

9Mandaj Diosmi, tucui cai pachata jatun mandajca canga. Chai punllapica, shujlla Mandaj Diosmi tiyanga. Diospaj shutillami tiyanga.

10Geba pueblomantaca, Jerusalén pueblo uranijman caj Rimón pueblocamami tucui llajta pambajlla tucunga. Jerusalenca jahuamanmi saquiringa. Chaipica Benjaminpaj pungumantaca, punta pungucama, esquinapi tiyaj pungucamami causangacuna. Shinallataj Hananeelpaj jatun torremantaca, jatun mandajpaj uvata capinacamami causangacuna.

11Jerusalenpi causajcunapajca, ima llaquipish ña mana ashtahuan tiyangachu. Ashtahuanpish Jerusalenpica, imata mana manchashpami causangacuna.

12Jerusalenpi causajcunahuan macanacucuj llajtacunataca, Mandaj Diosca cashnami jatunta llaquichinga: Paicunapaj aichataca, causaipirajmi ismuchinga. Ñahui luluncunatapish, chaillapitajmi chaquichinga. C'allutapish, shimillapitajmi tucui yacuyachinga.

13Chai punllapica, Mandaj Dios jatunta manchachijpimi mancharingacuna. Alli apanacujcunapurallatajmi maquipi lutsarinacushpa macanacungacuna.

14Shinallataj Judá llajtapi causajcunaca, Jerusalenpimi macanacungacuna. Paicunapaj c'uchulla llajtacunapi tiyaj curitapish, cullquitapish, churanacunatapishmi achcata tandachingacuna.

15Runacunaman cachashca ungüicunallatajmi, caballocunatapish, mulacunatapish, camellocunatapish, burrocunatapish, macanacuna pambacunapi tiyaj tucui shujtaj animalcunatapish japinga.

16Chai q'uipami, Jerusalenpi causajcunahuan macanacunaman shamuj llajtacunamanta mana huañujcunaca tucuita Mandaj Jatun Diostaca huatan, huatanta adoranaman huichiyangacuna. Diospajlla carpa huasicunata rurashcamantapishmi fiestata rurangacuna.

17Ashtahuanpish cai pachapi causaj maijan familiacuna tucuita Mandaj Jatun Diosta Jerusalenpi adoranaman mana huichiyajpica, paicunapajca tamyapish mana shamungachu.

18Shinallataj Egipto llajtapi causajcunapuramanta maijan familia mana Jerusalenman huichiyajpica, paicunapajpish tamyaca mana tiyangachu. Diospaj carpa huasicunata rurashcamanta fiestata ruranaman mana huichiyaj llajtacunataca, Mandaj Diosllatajmi jatun ungüicunahuan llaquichinga.

19Chashnami Egipto llajtapi causajcunaca millaita rurashcamantaca, llaquita apangacuna. Shinallataj tucui llajtapi causajcunapish Diospaj carpa huasicunata rurashcamanta fiestata ruranaman mana huichiyashcamantami, llaquita apangacuna.

20Chai punllapica, caballocunaca: “Jucha illaj Diospajmi” nishpa quillcashca campanacunatami aparishca cangacuna. Shinallataj Diospaj huasipi caj mangacunapish, altar c'uchupi tiyacuj tasacuna shinallatajmi canga.

21Shinallataj Jerusalén pueblopi tiyaj, Judá llajtapi tiyaj mangacunapish Mandaj Diospajlla ch'icanchishcami cangacuna. Diosman animalcunata cushpa huañuchinaman shamujcunami, chai mangacunapica yanungacuna. Chai punllapica, tucuita Mandaj Diospaj huasipica c'atujcunapish, randijcunapish ña mana tiyangachu.