1Mandaj Dios Moisesta mandashpaca cashnami nirca:
2“Israelcunata mandajcunataca tucuicunata paicunapaj tauna caspicunata apamuchun mandai. Paicunapaj yayamanta ima shina mirarimushca shinallataj tucuimantaca chunga ishqui tauna caspicunata japingui. Chai tauna caspicunapica cada quiquinpaj shuticunata quillcangui.
3Leví aillupaj tauna caspipica, Aaronpaj shutita quillcangui. Israel aillucunata pushajcunaca tucuicuna paicunapaj quiquin tauna caspita charichuncuna.
4Chaicunataca Dioshuan tupanacuna carpa huasipi caj, Dioshuan ari ninacushca quillcata huaquichina arca ñaupajpi, ñuca maimantami canman ricurini chai ñaupajpi churangui.
5Chaipica maijantami ñucapajta rurachun agllani chaipaj tauna caspipimi sisa huiñanga. Chashna rurashpami, ñuca ñaupajpi israelcuna cancunata p'iñashpa juchachishpa rimajcunataca upallachisha” nircami.
6Israelcunaman Moisés chashna nijpica, israelcunata pushajcunaca tucuicunami paicunapaj quiquin tauna caspicunata curcacuna. Paicunaca cada yayamanta ima shina mirarimushcata ricuchij tauna caspitami curcacuna. Tucuimantaca chunga ishqui tauna caspicunami carca. Aaronpaj tauna caspipish, paicunapaj tauna caspicunahuanmi carca.
7Moisesca chai tauna caspicunataca, Mandaj Diospaj carpa huasipi, Mandaj Diospaj ñaupajpimi churarca.
8Chai cayandij tutamantata Mandaj Diospaj carpa huasiman Moisés rishpaca, Leví aillumanta caj Aaronpaj caspipica, verdijlla ramacuna huiñashcata, sisashcata, retoñashca ramacunapica almendracuna p'ucushcatami ricurca.
9Chaimi Moisesca Mandaj Diospaj ñaupajmanta chai tauna caspicunata llujshichishpa tucui israelcunapaj ñaupajman aparca. Chaipi paicuna chaita ricushpaca, cada quiquinmi paicunapaj tauna caspita japircacuna.
10Mandaj Diosca, Moisestaca cashnami nirca: “Aaronpaj tauna caspitaca Dioshuan ari ninacushca quillcata huaquichina arca ñaupajllapitaj cachun churai. Diosta c'ariyajcunaca chai tauna caspita ricushpa Diostaca mana c'ariyanalla cashcata yuyarinapajmi canga. Chashna rurashpami, ñuca ñaupajpi juchachishpa cancunata rimacujcunataca upallachingui. Chaimi paicunaca mana huañungacuna” nircami.
11Moisesca Mandaj Dios mandashca shinami rurarca. Chashnami rurarca.
12Chaimi israelcunaca Moisestaca cashna nircacuna: “¡Ñucanchijca ña huañugrinchijmi! ¡Ñucanchijca ña chingarigrinchijmi! ¡Tucui ñucanchijmi ña chingarigrinchij!
13Mandaj Diospaj carpa huasiman maijanpish c'uchuyaj, chaiman maijanpish chayajca huañungallami. Chashna tucushpaca tucuicunamari chingarigrinchij” nircacuna.
Who We AreWhat We EelieveWhat We Do
2025 by iamachristian.org,Inc All rights reserved.
