1Ñuca Taita Dioslla, ñucata p'iñajcunamanta quishpichihuai.
Ñucata llaquichinapaj p'iñashpa jatarijcunamanta quishpichihuai.
2Millaita rurajcunamanta quishpichihuai.
Huañuchij runacunamanta quishpichihuai.
3Mandaj Dios, ima mana allita mana rurashca cajpipish, ima juchata mana rurashca cajpipish, ñucata huañuchingapajmari chaparacuncuna.
C'ari c'aricunamari ñucata p'iñashpa tandanacushcacuna.
4Ima mana allita ñuca mana rurashca cajpipish llaquichingapajmi callpacuncuna, allichiricuncunamari.
Ñucata tupanaman shamungapaj rijchariyari, ricuyari.
5Quiquinca Mandaj Diosmi cangui.
Tucuita Mandaj Diosmi cangui.
Israelcunapaj Taita Diosmi cangui.
Tucui llajtacunata llaquichingapaj rijchariyari.
Yallitaj millaita rurashpa c'ariyajcunataca ama llaquishpa tucuicunata llaquichiyari. Selah
6Chishita tigramungacunami.
Allcucuna shinamari ladrangacuna.
Pueblo muyundijtamari shayaringacuna.
7Paicunapaj shimicunapica espadacunami tiyan.
Chaitaca paicunapaj shimillahuantaj huillashpami: “Pi mana uyangachu” nincuna.
8Mandaj Dios, quiquinmi paicunataca asingui.
Quiquinmi tucui llajtacunataca chanzata rurangui.
9Ñucata p'iñaj llaquichisha nicujpipish quiquintami shuyasha.
Taita Diosmari ñucata mitsajca.
10Ñucata llaquij Taita Diosmi ñucapaj ñaupajtaca ringa.
Taita Diosca ñucata p'iñajcunataca llaquichingami.
Chashna rurashpaca ñuca munashca shinami ñucaman ricuchinga.
11Paicunataca ama huañuchichu.
Ashtahuanpish quiquinpaj poderhuan urata janajta cachashpa cumurichi.
Chaimi ñucahuan cajcunaca quiquinta yuyaringacuna.
Mandaj Dios quiquinca ñucanchij escudomi cangui.
12Paicunapaj shimihuan rimashpa juchallishcamantaca paicunapaj jatun tucushcapi prezu cachun.
Llaqui tucushca canman nij cashcamanta, llullanallata munashcamanta chashna tucuchun.
13¡Nina sindirij shina p'iñarishpa tucuchiyari, tucuchiyari.
Ama ashtahuan causachun tucuchiyari!
Jacobpica Taita Dios mandacushcata yachachun, tucui cai pacha llajtacunacama Taita Dios mandacushcata yachachun chashna rurayari. Selah
14Ñucata p'iñajcunaca chishita tigrashca cachun.
Allcucuna shina ladrachuncuna.
Pueblota muyuchuncuna.
15Micunata mashcashpa maitapish puricushcalla cachun.
Sajsangapaj mana japishpaca, tucui tuta huacarishpa pacarichuncuna.
16Ashtahuanpish ñucaca, quiquin tucuita rurai tucuj cashcatami
cantasha.
Tutamantapi cantashami.
Quiquin llaquij cashcata cantashami.
Ñucamanta shayarijmi cangui.
Ñuca miticunami cangui.
Llaqui punllapi ñuca miticunami cangui.
17Ñuca muyundij pircalla quiquintamari cantasha.
Ñuca miticuna Taita Diosmari cangui.
Ñucata llaquij Taita Diosmari cangui.
Who We AreWhat We EelieveWhat We Do
2025 by iamachristian.org,Inc All rights reserved.
