1Filisteocunaca israelcunahuan macanacungapajmi, Judapi caj Socopi paicunapaj tucui soldadocunata tandachishpa, Soco pueblohuan, Azeca pueblohuan chaupipi caj Efes-damim pambapi carpa huasicunata shayachishpa tiyarircacuna.
2Saulpish israelcunapish tandanacushpami, Ela pugru pambapi carpa huasicunata shayachishpa, filisteocunahuan macanacungapaj macanacunalla tucushpa shayarircacuna.
3Filisteocunaca caishuj ladoman caj shuj urcupimi carca. Israelcunaca chaishuj lado urcupimi carca. Paicunapaj chaupipica shuj pugru pambami carca.
4Paicuna chaipi shayacujpica filisteocunapaj chaupimantaca macanacuicunapi mishaj shuj runami llujshirca. Paica Gatmanta caj Goliat shuti quimsa metro shina jatun runami carca.
5Paipaj umapi churana cascopish broncemanta rurashcami carca. Pechota taparina churanapish broncellamantataj rurashcami carca. Chaica 5.000 siclotami pezarca.
6Paipaj sanpi uritapish broncemanta rurashcahuanmi pilluchirishca carca. Broncemanta rurashca lanzata aparishcami carca.
7Chai lanzaca ahuana telarpaj pilluna caspi shina racumi carca. Lanza puntapi caj fierroca 600 siclotami pezarca. Paipaj escudota apajca paita ñaupashpami rij carca.
8Goliat chaipi shayarishpaca, Israel soldadocunataca:
–Cancunaca ¿ima nishpataj macanacungapaj macanacunalla tucushpa shayacunguichij? ¿Manachu ñucaca filisteo cani? ¿Manachu cancunaca Saulpajta rurajcunalla canguichij? Ñucahuan macanacuchun cancunapuramanta shuj runata agllashpa cachaichij.
9Pai ñucahuan macanacushpa mishajpica, ñucanchijca cancunapajta rurajcunami tucushun. Ashtahuanpish ñuca paita mishajpica, cancunami ñucanchijpajta rurajcuna tucushpa ñucanchijpajta ruranguichij nishpaca,
10chai filisteoca:
–Israelcunapaj soldadocunataca, cunantaj ñucahuan macanacushpa ricunacungapaj shuj runata cachaichij– nircapishmi.
11Saulpish, tucui israelcunapish filisteo chashna rimajta uyashpaca, musparishpa achca manchaihuanmi carcacuna.
12Davidca efrateo Isaipaj churimi carca. Chai Isaica Judapi caj Belenpi huacharishca pusaj churicunayujmi carca. Saúl mandacui punllacunapica, paica achca huatacunayuj yallitaj yuyajmi carca.
13Isaipaj quimsa punta churicunaca, Saulhuanmi macanacuiman rircacuna. Macanacunaman rij chai quimsa churicunapaj shuticunaca caicunami: Punta churica Eliab, cati churica Abinadab, chaipaj cati churica Sama shutimi carca.
14Davidca tucuicunapaj q'uipa churimi carca. Quimsa paipaj ñaupa huauquicunaca Saulta catishpami rircacuna.
15Davidca Saulhuan cashpapish paipaj yayapaj ovejacunata michingapaj Belenman shamushpa tigrashpa purijllami carca.
16Goliat filisteoca tutamantapish chishipish israelcunata c'amingapajmi llujshij carca. Chuscu chunga punllacamami chashna c'amicurcalla.
17Isaica paipaj churi Davidtaca:
–Cunanca cambaj huauquicunapaj shuj efa grano camchata, cai chunga tandata apashpa cambaj huauquicuna tiyacun carpa huasicunaman utca ri.
18Cai chunga quezocunataca huaranga soldadocunata mandajpaj apai. Cambaj huauquicuna allilla cashcata alli ricushpa paicuna ima shina cashcata ñuca yachangapaj, paicunapajta imallatapish apamungui– nircami.
19Saulpish, Davidpaj huauquicunapish, tucui israelcunapish Ela pugru pambapimi filisteocunahuan macanacunalla c'aminacucurcacuna.
20Davidca cayandij tutamanta utca jatarishpami, ovejacunataca shujtaj cuidajman cuidacuchun saquishpa, paipaj yaya Isaí imallata apai nishcacunata apashpa rirca. Pai chayanapajca tucui soldadocuna macanacungapaj macanacunalla tucushpa shayarishpami, macanacuipaj caparita caparicurcacuna.
21Israelcunapish, filisteocunapish macanacungapaj macanacunalla tucushpami caishujpaj, chaishujpaj soldadocunahuan ch'imbapura shayarircacuna.
22Davidca pai imalla apashcacunataca macanacunatapish, ima shujtajcunatapish huaquichijpaj maquipi saquishpami, soldadocunapajman callpashpa rirca. Ña chayashpaca paipaj huauquicunatami ¿allillachu canguichij? nishpa tapurca.
23David paipaj huauquicunahuan rimacujpirajmi, macanacuicunapi jahualla mishaj runaca filisteocunapaj soldadocuna fila shayacun chaupimanta llujshishpa caishujpaj chaishujpaj soldadocuna shayacun chaupipi shayarishpa, ñaupa punllacunaman c'amishca shinallataj c'amicujtami Davidca uyarca. Chai filisteoca Gatmanta Goliat shutimi carca.
24Tucui israelcunami chai runata ricushpaca, achcata mancharishpa paipaj ñaupajmanta miticugrircacuna.
25Chaipimi israelcunaca caishuj chaishuj: “Chai llujshimuj runataca ¿manachu ricunguichij? Paica israelcunata yanganchishpa rimangapajmari punta llujshimun. Chai runata maijanpish mishajmanca jatun mandajca achca charinacunatami cunga. Paipaj ushushitapish paipaj huarmi cachunmi cunga. Paipaj yayapaj huasi familiatapish tributota mana cobrangachu” nircacuna.
26Davidca, paipaj c'uchupi cajcunataca:
–Chai filisteota huañuchishpa israelcunata c'amijta anchuchijmanca ¿imatashi cunga? Circuncisionta mana rurashca filisteoca ¿paica ima cashpataj causaj Diospaj soldadocunataca c'amicun?– nircami.
27Chaimi israelcunaca ñaupaman nishca shinallataj: “Maijanpish chai runata mishajmanca chashnatajmi ruranga” nircacuna.
28Chaipi cajcunahuan David parlacujta paipaj punta huauqui Eliab uyashpaca, nina sindirij shina p'iñarishpami Davidtaca:
–¿Imapajtaj caiman uriyamurcangui? Ashalla ovejacunatapish chai shitashcapica ¿pimantaj saquimurcangui? Jatun tucushca yuyaihuan, mana alli shunguhuan cashcatapish ñucaca yachanimi. Chaipajllamari macanacuita ricunaman shamushcangui– nircami.
29Chaimi Davidca:
–Cunanca ñucaca ¿imatataj rurashcani? ¿Manachu shuj shimillapish llujshipaj cani?– nirca.
30Davidca, paipaj huauquimanta anchurishpa, caishujcunapajman rishpaca, ñaupaman tapushca shinallatajmi tapurca. Paicunapish caishujcuna ñaupaman nishca shinallatajmi nircacuna.
31David chashna nishca shimicunata uyajcunaca, Saulman huillajpimi, Saulca paipajman cayachirca.
32Chaipimi Davidca Saultaca:
–Chai runata ricushcallamantaca macanacunataca pi ama manchaichijchu. Cambajta ruraj rishpaca chai filisteohuan macanacungallami– nirca.
33Shina nijpimi Saulca Davidtaca:
–Canca huambrarajmari cangui. Chai filisteohuanca, mana macanacunaman ri tucunguichu. Paica huambramantapacha macanacunata alli yachajmari– nirca.
34Davidpish Saultaca:
–Cambajta ruraj ñucaca ñuca yayapaj ovejacunata michijmi carcani. León cashpa, oso cashpa shamushpa chai canlla ovejamanta shujta apajpica,
35catishpa rishpaca, chai animalpaj shimimanta quichujllami cani. Tigrarishpa ñucata canisha nijpica, quejadospi japishpa chugrichishpa huañuchijllami carcani.
36Cambajta rurajca leontapish, osotapish huañuchijllami. Circuncisionta mana rurashca filisteo runa causaj Diospaj soldadocunata c'amishcamantaca chai leonta osota shinallatajmi huañuchisha.
37Davidca cashnapish nircami: Mandaj Diosca ñucataca leonpaj, osopaj maquimantapish quishpichircami. Cai filisteopaj maquimantapish paillatajmi quishpichinga– nijpimi Saulca Davidtaca:
–Shinashpaca rilla, Mandaj Dios canhuan cachun– nirca.
38Saulca Davidmanca paipaj churanacunatami umapica broncemanta rurashca cascota, cuerpopica fierromanta rurashca churanata churachirca.
39Davidca chai churana jahuapi espadata aparinahuan chumbillirishpaca, chashna churarishcaca nunca mana purij cashcamanta purishpa ricurcarajmi. Chaipimi Davidca Saultaca:
–Cashna churarishcaca nunca mana purij cashcamanta mana puri tucunichu– nishpami tucui chai churarishcacunataca llujshichirca.
40Chai q'uipaca paipaj bastonta maquihuan japishpa rishpaca yacu ricunpi pichca llambujlla rumita agllashpa japishpami, michinaman cucayashpa apana muchilapi churashpa, paipaj huaracata apashpa filisteopajman rirca.
41Filisteopish paipaj escudota apajta ñaupachishpami, Davidpajman allimanta c'uchuyamurca.
42Chai filisteoca Davidta ricushpaca, puca ajcha, sumaj huambralla cashcata ricushpami, mana macanacui tucuipaj canata yuyarca.
43Chaimi filisteoca Davidtaca:
–¿Ñucaca allcuchari caniyari. Can ñucapajman caspicunahuan shamunapajca?– nishpami Davidtaca ñuca dioscuna llaquichishca cachun nirca.
44Davidtaca filisteoca cashnapishmi nirca:
–Ñucapajman shamuilla, cambaj aichataca jahuata purij pajarocunaman, pambata purij animalcunamanmari carasha– nircami.
45Chaimi Davidca filisteotaca:
–Canca ñucapajmanca espadallahuan, lanzallahuan, jabalinallahuanmi shamungui. Ashtahuanpish ñucaca Taita Diospaj israelcunapaj soldadocunata can c'amishcamantaca cambajmanca tucuita Mandaj Diospaj shutipimi shamuni.
46Mandaj Diosmi cantaca ñuca maquipi churanga. Chaimi ñuca mishashpa cambaj umata p'itisha. Cunanllatajmi cambaj cuerpota, filisteocunapaj cuerpotapish jahuata purij pajarocunaman, pambata purij animalcunaman carasha. Chaipimi tucui cai pachapi causajcunaca Israelpi Taita Dios tiyashcata yachangacuna.
47Caipi tucui tandanacushcapish Mandaj Diosca mana espadahuan, mana lanzahuan quishpichij cashcatami yachangacuna. Cai macanacuica Mandaj Diospajmi. Paimi cancunataca ñucanchij maquipi churanga– nirca.
48Shina nijpimi filisteoca, Davidhuan tupangapaj cutin puri callarirca. Davidpish callpashpa rishpami, macanacunapi filisteohuan tupagrirca.
49Chaipimi Davidca paipaj muchilapi maquita satishpa shuj rumita llujshichishpa paipaj huaracahuan filisteopaj frentepi shitarca. Rumica filisteopaj frentepi yaicujpimi, filisteoca pambaman urisinga urmarca.
50Davidca filisteotaca, huaracahuan shuj rumillahuanmi misharca. Chashnami Davidca espadata paipaj maquipi mana charishpapish filisteotaca huañuchirca.
51Davidca callpashpa rishpami chai filisteopaj jahuapi shayarishpaca, paipaj espadallatataj huaquichishcamanta llujshichishpa tucui huañuchirca. Chai espadallahuantajmi umata p'itirca.
Filisteocunaca macanacuicunapi paicunapaj mishaj huañujta ricushpaca miticungapajmi callparcacuna.
52Chai q'uipaca israelcunapish, judacunapish tucuicuna macanacuipi caparinata caparishpami, Gat pugru pambacama, Ecrón puebloman yaicuna pungucama catishpa filisteocunata huañuchircacuna. Saaraimman rina ñanmantaca, Gatman rina ñancunapipish Gatmantaca Ecronman rina ñancunacamami filisteocunaca achcacuna huañushca siricurcacuna.
53Filisteocunata caticushcamanta israelcuna tigrashpaca, filisteocunapaj carpa huasicunapi imalla tiyashcacunatami aparcacuna.
54Davidca filisteopaj umataca Jerusalenmanmi apamurca. Filisteopaj macanacunacunataca, Davidca paipaj carpa huasipimi churarca.
55Saulca filisteohuan David tupanaman ña rijpimi, soldadocunata mandaj Abnertaca:
–Abner chai mosoca ¿pipaj churitaj?– nijpi Abnerca:
56–Jatun mandajlla, pipaj churi cashcata manataj rijsinichu– nijpi jatun mandajca:
–Chai moso pipaj churi cashcata tapui– nirca.
57Abnerca, filisteota huañuchishpa David tigramujpica, Davidtaca Saulpaj ñaupajmanmi pusharca. Davidca paipaj maquipi filisteopaj umata apashcami carca.
58Chaipimi Saulca:
–Huambra ¿pipaj churitaj cangui?– nijpi Davidca:
–Ñucaca Belenpi causaj, cambajta ruraj Isaipaj churimi cani– nirca.
Who We AreWhat We EelieveWhat We Do
2025 by iamachristian.org,Inc All rights reserved.
