ISAÍAS 65 - Quichua Chimborazo Bible

Mana cazujcunata llaquichinami

1Manapish ñucata tapujcunatami mashcachun saquircani.

Manapish ñucata mashcajcunamanmi ricurircani.

Manapish ñucata mañajcunamanmi:

Caipimi cani, caipimi cani nircani.

2Cacharishca paicuna munashcallata rurana yuyailla millai ñanllata purijcunatami punllanta ñuca maquita chutashpa cayani.

3Chai gentecunaca ñuca ñaupajpi punllanta millaita rurashpa p'iñachijcunami.

Huertacunapi sacrificiota cujcunami.

Inciensotapish ladrillo jahuacunapi rupachijcunami.

4Huañushcacunata pambashcacunapi tiyarijcunami.

Pacallacunapi pacarijcunami.

C'uchi aichata micujcunami.

Paicunapaj mangacunapi mapa animalcunapaj caldota charijcunami.

5Paicunaca: Ñucapajmanca ama c'uchuyamuichu.

Can maipi cashcapi saquiri.

Ñucaca canta yalli jucha illajmari cani nijcunami.

Chashna nijcunaca, nina rupashpa tucui punlla cushnij shinami, ñucataca p'iñachincuna.

6Riqui chaicunataca quillcashcatami ñuca ñaupajpi charicuni.

Manataj upalla cashachu.

Ashtahuanpish pai rurashca shinallatajmi cusha.

Pai japina cashcataca paipaj quiquin chuchupimi cusha.

7Cancuna millaita rurashcamantami llaquichigrini ninmi Mandaj Diosca.

Cancunapish cancunapaj ñaupa yayacunapish urcucunapi, lomacunapi inciensota cushpa rupachishpami ñucataca yallitaj p'iñachircanguichij.

Chaimantaca ñaupamantapacha imalla rurashcamantandijmi paipaj quiquin chuchupi llaquichigrini ninmi Mandaj Diosca.

8Mandaj Diosca cashnapishmi nin: “Maijanpish alli uva huayungata japishpaca: Caitaca ama yanga shitanguichu, paimantaca achca allicunata japinami tiyan.

Ñucapish ñucapajta rurajcunamantaca, chashnallatajmi rurasha.

Mana tucuita chingachishachu.

9Jacobpaj huahua huahuacuna tiyachun saquishami.

Ñuca urcucunata japichunpish, Judapaj huahua huahuacunatami saquisha.

Ñuca agllashcacunamari ñuca cushca allpacunataca japingacuna, ñucapajta rurajcunamari chaipica causangacuna.

10Ñuca agllashca ñucata mashcajcunapajca, Sarón pambaca ovejacunapaj corralmi canga.

Acor pugru pambaca vacacunapaj corralmi canga.

11Ashtahuanpish Mandaj Diosta saquij cancunata, ñucapajlla caj urcuta cungarijcunata, suerteta cujcunaman micunata carajcunata, causaipi alli pushaj nishca diosman vinota tallishpa cujcunataca,

12ñucapish paicunamanca espadapi huañunata cujpica tucui cancunami cungata p'itishpa huañuchijcunapaj ñaupajpi cunguringuichij.

Cayajpipish, mana cutichircanguichijchu.

Rimajpipish mana uyarcanguichijchu.

Ashtahuanpish ñuca ñaupajpi millaita rurashpami ñuca mana munashcata agllarcanguichij” ninmi.

13Chaimantami Mandaj Jatun Diosca cashna nin: “Riqui, ñucapajta rurajcunaca micungacunami.

Ashtahuanpish cancunaca yaricaihuanmi canguichij.

Ñucapajta rurajcunaca yacuta ubyangacunami.

Ashtahuanpish cancunaca yacunaihuanmi canguichij.

Ñucapajta rurajcunaca cushicungacunami, ashtahuanpish cancunaca pingachishcami canguichij.

14Ñucapajta rurajcunaca, tucui shunguhuan cushicushpami cantangacuna, ashtahuanpish cancunaca shungu nanaihuanmi caparinguichij.

Shungu p'aquirishpami jatunta caparishpa huacanguichij.

15Ñuca agllashcacunaca cancunapaj shutitaca shujtajcunata llaqui tucushca alli canman ningapajllami yuyaringacuna.

Mandaj Jatun Diosmi cantaca huañuchinga.

Paipajta rurajcunataca shujtaj shutitami shutichinga.

16Cai pachapi maijanpish allicunata cuchun nishpaca, imatapish pajtachij Diospaj shutipimi chaitaca ninga.

Cai pachapi maijanpish imatapish chashnataj cashcatami huillani nishpapish, imatapish pajtachij Diospaj shutipimi chashnatajmi ninga.

Ñaupaman llaquita apashcacunataca cungarishcami canga.

Tucui llaquimi ñuca ñaupajmantaca ña illanga.

Mushuj jahua pachapish mushuj cai pachapish

17Riquichij, ñucaca mushuj jahua pachata, mushuj cai pachatami ruragrini.

Ñaupaman imapish tucushcataca mana yuyaringacunachu.

Pipaj yuyaimanpish chaicunaca ña mana shamungachu.

18Cancunaca ñuca mushujta rurashcapimi cushicunguichij huiñaita cushicunguichij.

Riqui, ñucaca Jerusalenmanca cushicuitami apamuni.

Chaipi causajcunapajca yallitaj cushicuitami apamuni.

19Ñucaca Jerusalenhuanca cushicushami.

Ñuca agllashcacunahuanca cushicushami.

Chaipica huacashcapish caparishcapish ña manataj uyaringachu.

20Chaipica huahuacunapish, mana asha huatacunallata causashpa huañungachu.

Yuyajcunapish, mana chaupillata causashpa huañungachu.

Patsaj huatayujlla huañushpaca, huahuarajmi huañunga.

Patsaj huatallapi huañushpaca, juchayuj cajpi Dios mana alli nishca cashcamantami huañunga.

21Huasicunatami shayachingacuna.

Chaipimi causangacuna.

Uvacunatami tarpungacuna.

Chaipi p'ucushcacunatami micungacuna.

22Shujtajcuna causachunllaca mana huasichingachu.

Shujtajcuna micuchunllaca mana tarpungacunachu.

Ñuca agllashcacunaca yuracuna shina unitamari causangacuna.

Ñuca agllashcacunaca paicuna trabajashcahuanca paicunallatajmi cushicungacuna.

23Paicunapish, paicunapaj huahua huahuacunapish Mandaj Dios alli nishca cashcamanta mana yanga trabajangacunachu.

Llaquita apangapajllaca mana huacharingacunachu.

24Paicuna manaraj caparijpimi, ñucaca cutichisha.

Paicuna manaraj tucui rimajpimi, ñucaca uyasha.

25Atujtaca, malta ovejahuan tandallatami michinga.

Leonpish, huagra shinami ujshata micunga.

Culebrapaj micunaca ñutu allpami canga.

Ñucapajlla ch'icanchishca urcupica, pi mana ima llaquita ruraj tiyangachu” ninmi Mandaj Diosca.