1Nínive pueblolla, canta llaquichishpa chingachijmi huichiyamucun. Pata jahuaman huichiyashpa cuidaiyari. Ñanta shamujcunata chapaiyari, sinchita chumbilliriyari. C'ari c'ari shayariyari.
2Mandaj Diosca Jacobopaj huahua huahua israelcuna sumaj cashcataca, cutinmi alliyachinga. Shuhuacunaca paicuna imalla charishcacunatami quichushpa aparcacuna. Paicunataca uva yuracunata saruj shinami sarurcacuna.
3Paicunapaj soldadocunapaj escudocunapish pucajllami canga. Chai soldadocunapaj churanapish pucajllami canga, macanacuna carretacunaca nina sindi shinami canga. Chai tucuita allichi punllaca, haya yuracunapish chujchungami.
4Macanacuna carretacunahuanmi plazacunaman yaicungacuna. Callecunataca c'ulun nishpami puringacuna. Chai carretacunaca nina sindi shinami ricuringa, relampa shinami callpanga.
5Paipaj soldadocunatami cayanga. Paicuna shamucushpaca sarurinacungami. Pirca jahuaman callpashpa huichiyashpami, macanacungapaj allichiringacuna.
6Jatun yacucunapaj pungucunapish pascaringami. Chai yacucunami mandana huasitapish urmachinga.
7Jatun mandaj huarmitaca prezumi apangacuna. Paita huichiyachimuchun nishpa mandajpimi, paita servij huarmicunaca pechopi huajtarishpa palomacuna shina huacanacushpa apashpa ringacuna.
8Ñaupa punllacunaca Nínive puebloca, tanquepi yacuta jundachishca shinami carca. Chashna cashpapish, paicunaca miticunaman callpancunami. Paicunataca: “¡Ama richijchu, ama richijchu!” nishpa caparijpipish, mana tigrashpa ricuncunachu.
9Cullquitapish, curitapish quichuichijlla. Chai tucui laya sumaj, munanajlla charinacunaca mashnata apajpipish mana tucuripajchu.
10Chushajlla, huañucuj, llaquinayajmari saquirishca. Shungupish huañushcamari. Cunguri mucucunapish chujchucunmari, huijsatapish nanachicunmari. Ñahuicunapish quillu quillumari tucushca.
11Jatun leoncuna malta leoncuna causana jutcucunapish, yaya leonpish, mama leonpish, huahua leoncunapish tandalla causana jutcucunapish ¿maitagari? Paicunataca pipish manamari manchachi tucurcacunachu.
12Leonca paipaj huarmimanpish, paipaj huahuacunamanpish carangapajmi, pai causanamanca achca aichata apamuj carca. Paicuna causana jutcucunapica, aichacunatapish shuhuashcacunatapishmi jundachij carca.
Nínive pueblota chingachinamanta13Tucuita Mandaj Diosca cashnami nin: “Riqui Nínive, cantaca llaquichigrinimi. Cambaj carretacunataca rupachishpami, ushpallata rurasha. Malta leoncunataca espadami tucuchinga. Cai llajtaman shuhuashpa apamushcacunatapish chingachishami. Cambaj huillajcuna huillashcapish, ña mana ashtahuan uyaringachu” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
