1Acabca, Samariapica canchis chunga churicunatami charirca. Chaimi Jehuca, Jezreelpi mandajcunapajpish, cunaj yuyajcunapajpish, Acabpaj churicunata cuidajcunapajpish quillcacunata rurashpa Samariaman cacharca. Chai quillcacunapica:
2“Cancunaca cancunapaj amopaj churicunata, macanacuna carrocunata, caballocunapi tiyarij soldadocunata, macanacunacunatapishmi charicunguichij. Cancuna causacun pueblopish muyundijta alli jatun pircayujmari. Cai quillcacunata japishpa rezashcahuan,
3cashna ruraichij: Cancunapaj amopaj churicunapuramanta alli yuyaiyuj, alli yachajta agllashpa paipaj yayapaj randi mandashpa tiyanapi tiyachichij. Chashna rurashpa cancunapaj amopaj huasi ucu familiata mitsangapaj shayarichij” nircami.
4Chashna nishcata rezashpaca, achcata mancharishpami: “Ishquindij jatun mandajcunapish, Jehuhuanca mana ch'imbapurai tucurcacunachu. Ñucanchijllacarin maitataj Jehuhuanca ch'imbapurai tucushunri” ninacurcacuna.
5Chaimi Acabpaj mayordomopish, chai pueblota mandajpish, cunaj yuyajcunapish, Acabpaj churicunata cuidajcunapish Jehuman cashna nichun cacharcacuna: “Ñucanchijca cambajta rurajcunami canchij. Tucui can imata mandashcata rurashunllami. Ñucanchijca jatun mandaj cachunca pita mana agllashunchu. Canpi ima shinami alli chaita rurailla” nichunmi cacharcacuna.
6Chaimi Jehuca cutinllataj quillcashpaca: “Cancuna ñucapaj casha nishpa tucui ñuca mandashcata cazushun nishpatajca, cancunapaj amopaj churicunapaj umacunata apashpa caya cai horas shinallatataj cai Jezreelman ñucapajman shamunguichij” nishpami cacharca.
Jatun mandajpaj canchis chunga churicunaca, paicunata huiñachij chai pueblota mandajcunahuanmi carcacuna.
7Jehú cachashca quillcacuna paicunapajman chayajpica, jatun mandajpaj canchis chunga churicunata japishpa cungata p'itishpami, paicunapaj umacunataca canastacunapi churashpa Jezreelman cacharcacuna.
8Huillashpa purij shuj runa Jehupajman shamushpaca:
–Jatun mandajpaj churicunapaj umacunataca ñami apamuncuna– nijpimi Jehuca:
–Pueblo pungupi ishqui montonta rurashpa, chaipi caya tutamantacama saquichij– nirca.
9Cayandij tutamanta Jehú llujshishpa tucuicunapaj ñaupajpi shayarishpaca:
–Cancunaca ima mana allita mana rurarcanguichijchu. Ñuca amotaca ñucami shujtajcunahuan huashalla yuyarinacushpa huañuchircani. Cunan caicunataca ¿pitaj huañuchircari?
10Acabpaj huasi familiacuna cashna chingarina cashcata Mandaj Diosca paipajta ruraj Eliasman huillachishcaca shujllapish pambaman mana urmashpa tucui pajtacushcataca yachanami canguichij– nirca.
11Jehuca Jezreelpi saquirishcacunataca: Acabpaj tucui huasi ucu familiacunatapish, Acab churashca mandajcunatapish, paipaj tucui familiacunatapish, paipaj curacunatapish tucuicunatami shujllatapish mana saquishpa huañuchirca.
12Chai q'uipami Jehuca Samariaman ringapaj jatarishpa ñanta rishpaca, michijcuna ovejacunata rutuna huasiman chayarca.
13Chaipimi Jehuca, Judá llajtata jatun mandaj Ocoziaspaj huauquicunahuan tupashpa paicunataca:
–Cancunaca ¿pitaj canguichij?– nijpi paicunaca:
–Ocoziaspaj huauquicunami canchij. Ñucanchijca jatun mandaj Acabpaj churicunata, paipaj huarmi Jezabelpaj churicunatapishmi ricunaman shamurcanchij– nircacuna.
14Chaimi Jehuca:
–Caicunata causajta japichij– nijpi, paicunataca causajta japishpa, michijcuna ovejacunata rutuna huasi c'uchupi caj pugyu pambapi cungata p'itishpa huañuchircacuna. Chuscu chunga ishqui runacunatami, shujllatapish mana saquishpa huañuchircacuna.
15Chaimanta rishpaca Jehuca, Recabpaj churi Jonadab paita mashcanaman shamucujpimi paihuan tuparca. Chaipi paita allillachu cangui nishpaca: –Ñuca ima shinami canhuan tucui shunguhuan alli cani. ¿Canpish chashnallatajchu ñucahuan cangui?– nijpi Jonadabca:
–Ñucapish canhuanca chashnallatajmi cani– nirca.
Chaimi Jehuca:
–Shinashpaca, chashnataj cashpaca maquita cui– nijpi paica maquita curca. Chai q'uipaca paipaj carroman huichiyachishpami,
16cashna nirca:
–Jacu ñucahuan, ñucahuan rishpami Mandaj Diosta c'uyashcamanta paita mana cazujcunata yallitaj p'iñashpa ñuca imata rurajta cunan ricungui– nishpami, Jehuca Jonadabtaca paipaj carropi pushashpa rirca.
17Jehuca Samariaman chayashpaca, Mandaj Dios Eliasta huillachishca shinallatajmi, Acabpaj puchushcaraj familiacunataca tucuicunata huañuchirca.
Baalpajta rurajcunatapish Jehú chingachishcami18Chai q'uipaca, Jehuca chai pueblopi causaj tucuicunata tandachishpami:
–Acabca Baalpajtaca ashallatami rurarca. Ñucaca paita yallimari Baalpajtaca ruragrini.
19Chaimanta Baalpaj tucui profetacunata, paipajta ruraj tucuicunata, Baalpaj tucui curacunata shujllapish ama illachun tucuicunata tandachichij. Baalman sacrificiota cunataca achcatamari charini. Maijanpish chaiman mana shamujca huañungami– nirca.
Chaitaca Jehuca Baalpajta rurajcunata umashpa, tucuicunata huañuchingapajmi chashna ruranata yuyarishca carca.
20Shina nishpaca Jehuca:
–Baalta yuyarishpa jatun fiestata rurangapaj shuj punllata ch'icanchichij– nijpimi, paicunaca pai nishca shina rurashpa tandachircacuna.
21Huillajcunata tucui Israel llajtata cachashpa Jehú cayachijpimi, Baalpajta rurajcunaca shujllapish mana saquirishpa tucuicuna Baalpaj huasiman tandanacurcacuna. Chaimantami chai Baalta adorana huasipica, tucui c'uchucunacama jundarca.
22Chaipimi Jehuca, Baalpajta rurajcunapaj churanacunata huaquichij runataca:
–Baalpajta tucui rurajcunapaj churanacunata surcui– nishpa mandajpi, chai runaca chai churanacunata surcushpa curca.
23Jehupish, Recabpaj churi Jonadabpish Baalpaj huasiman yaicushpami, Baalpajta rurajcunataca:
–Mandaj Diospajta rurajcuna ñataj maijancuna cai ucupi canman chaita ricuichij. Caipica Baalpajta rurajcunallami cana canguichij– nircacuna.
24Paicuna Baalman sacrificiota cungapaj, cushpa tucui rupachingapaj chai ucuman yaicujpimi, Jehuca pusaj chunga runacunata canllaman churashpaca:
–Cai ucupi cajcunata ñuca cancunapaj maquipi churashcata shujllatapish maijan mana huañuchijpica, cancunami paicunapaj randi huañunguichij– nirca.
25Chai runacuna Baalman cushpa tucui rupachijpica, Jehuca cuidaj soldadocunatapish paicunata mandajcunatapish:
–¡Yaicushpa chai runacunata shujllatapish ama saquishpa tucuicunata huañuchichij! nijpimi, chapacuj runacunaca paicunata mandajcunandij tucushpa shujllatapish llujshijta mana saquishpa tucuicunata huañuchishpa canllaman shitarcacuna. Chai q'uipaca, Baalpaj ch'icanchishca ucuman yaicushpami,
26chai Baalpaj huasimantaca paiman rijchajta rurashcacunata llujshichishpa rupachircacuna.
27Baal nishca rurashcalla diostapish ñutushpa, paipaj huasitapish urmachishpami, chaipica mapana huasita rurarcacuna. Cunancama chai shinallatajmi.
28Chashnami Jehuca, Israel llajtamantaca Baalta chingachirca.
29Chashna rurashpapish Jehuca Nabatpaj churi Jeroboam juchallishpa israelcunata juchallichishca shina juchallinataca mana saquircachu. Ashtahuanpish Bet-elpi caj, Danpi caj curi bizitaca mana urmachishpami adorashpa causarca.
30Mandaj Diosca Jehutaca: “Tucui chaicunata chingachishpaca ñuca ñaupajpica allitami rurashcangui. Acabpaj huasi familiatapish ñuca shungu munashca shinami rurashcangui. Chashna rurashcamantaca cambaj churicunataca, chuscu huahua huahuacunacamami israelcunata mandachun saquisha” nircami.
31Chashna nijpipish Jehuca, israelcunata Mandaj Dios mandashcacunataca tucui shunguhuan chaita pajtachina yuyaillaca mana pajtachircachu. Jeroboam juchallishpa israelcunata juchallichishca shina juchallinatapish mana saquircachu.
32Chai huatacunallatajmi, Mandaj Diosca Israel llajtata uchillayachi callarirca. Chaimi Hazaelca, israelcunahuan macanacushpaca Siriahuan Israelhuan tupanacun allpacunataca,
33Jordán yacumanta inti llujshin ladoman caj Galaad llajtata, Gadpaj llajtata, Rubenpaj llajtata, Manasespaj llajtata quichurca. Shinallataj Arnón yacu c'uchupi caj Aroer llajtamanta callarishpaca, Galaad, Basán llajtacamami quichurca.
34Jehú ashtahuan imalla rurashcata tucui pai imallata rurashcata, pai c'ari c'ari cashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.
35Jehú paipaj ñaupa yayacunahuan dormijpica, Samaria pueblopimi pambarcacuna. Paipaj randica paipaj churi Joacazmi mandarca.
36Jehuca ishqui chunga pusaj huatatami israelcunata mandashpa Samariapi causarca.
Who We AreWhat We EelieveWhat We Do
2025 by iamachristian.org,Inc All rights reserved.
