2 CRÓNICAS 13 - Quichua Chimborazo Bible

Judá llajtata Abías mandashcami(1 R 15.1-8)

1Jatun mandaj Jeroboam, chunga pusaj huatata israelcunata ña mandacujpimi, Abíasca Judá llajtata mandai callarirca.

2Abiasca Jerusalenpimi quimsa huatata mandarca. Paipaj mamaca, Gabaa pueblomanta caj Urielpaj ushushi Micaiasmi carca.

Abiaspishmi Jeroboamhuan macanacurca.

3Abiasca, 400.000 ashtahuan alli runacunahuanmi Jeroboamca macanacui callarirca. Shinallataj Jeroboamca Abiashuan macanacungapajmi, 800.000 ashtahuan alli soldadocunahuan shayarirca.

4Chaita ricushpami Abiasca, Efraín urcucunapi caj Zemaraim urcupi ch'imbapura shayarishpa cashna nirca: “Jeroboampish, tucui israelcunapish uyaichij.

5Mandaj Taita Diosca Davidmanpish, paipaj huahua huahuacunamanpishmi israelcunata mandanataca mana shujtajyachipajta ari ninacushca carca. Chaitaca tucui cancunallataj allimi yachanguichij.

6Chaita yachashca jahuami, Davidpaj churi Salomonpajta ruraj Jeroboamca, paipaj amota c'ariyarca. Chashna c'ariyajpica Nabatpaj churi Jeroboamhuanca,

7puricujlla q'uilla, millai runacunami tandanacurcacuna. Paicunahuan tucushpami, Salomonpaj churi Roboamta c'ariyashpa mana cazurcacuna. Huambraraj cashcamanta mana c'ari c'ari cashpami, paicunataca mana cazuchi tucurca.

8¿Cunanhuanpishchu Davidpaj huahua huahuapura mandajtaca, mana cazushpa c'ariyashun nicunguichij? Paicunataca Mandaj Diosllatajmari mandachun churarca. ¿Cancunaca yallitaj achcacunapura cashcamanta, shinallataj cancunapaj dioscuna shina cachun Jeroboam rurashca bizicunata charishcallamantachu Mandaj Diostaca mana cazushun ninguichij?

9Cancunaca Aaronpaj huahua huahuapura curacunatapish, levitacunatapishmi cancunapaj llajtamanta llujshichishpa cacharcanguichij. Mandaj Diospajta ruraj curacunata, levitacunata chashna llujshichishpa cachashpaca, shujtaj llajta runacuna shinallatajmari chai dioscunapaj curacuna cachun pitapish churashcanguichij. Maijanpish shuj bizita, canchis carnerocunata cushpa, chai manapish dios cajcunapaj curacuna tucunaman shamuchunmari chashna ruranguichij.

10Ashtahuanpish ñucanchijpajca, Mandaj Diosmari ñucanchij Dios. Ñucanchijca paimantaca manataj anchurinchijchu. Shinallataj Aaronpaj huahua huahuapura curacunallatajmari, Mandaj Diospajta ruracuncuna. Paicunata ayudajcunapish levitacunallatajmari.

11Paicunami tucui tutamantacunapish, chishicunapish Mandaj Diosman cushpa tucui rupachincuna. Inciensotapishmi paiman cushpa rupachincuna. Shinallataj Diospajllata rurangapaj ch'icanchishca, ima mapa illaj mezapimi tandacunata pai Diosman cushpa churancuna. Curimanta rurashca candeleropi caj lamparacunapipish, tucui chishicunami ninata japichincuna. Chashnami ñucanchijca, ñucanchijta Mandaj Taita Dios imallata mandashcataca pajtachinchij. Ashtahuanpish cancunaca paimanta anchurishcanguichijmari.

12Jalachij israelcuna, ñucanchijtaca Taita Diosmari mandacun. Shinallataj cancunahuan ñucanchij macanacugrichunca, pai Diospajta ruraj curacunamari trompetacunapi sinchita tocangapaj ñucanchijhuan shayacun. Chashna cashcamantaca, ama cancunapaj yayacunata Mandaj Taita Dioshuanca macanacunaman shamuichijchu. Paitaca mana mishai tucunguichijchu” nircami.

13Chashna nijpipish Jeroboamca, shuj mirga soldadocunatami huashamanta rishpa, paicunahuan macanacuchun cacharca. Ashtahuan achca soldadocunahuanmi, Judá soldadocunahuan macanacungapaj ñaupaj ladota shamurca. Huashatapishmi shamurcacuna.

14Judá soldadocuna tigrarishpa ricushpaca huashatapish, ñaupajtapish soldadocuna shamucujtami ricurcacuna. Chaimantami Judá llajta soldadocunaca Mandaj Diosta mañarcacuna, curacunapish trompetacunapi tocarcacuna.

15Judá soldadocuna macanacungapaj shayaringapaj caparijpica, Mandaj Diosca Jeroboamta israelcunataca, Abiasta Judá soldadocunatami mishachirca.

16Israelcunaca, Mandaj Dios paicunata Judá soldadocunapaj maquipi churashpa mishachijpimi callparcacuna.

17Chai macanacuipica, Abiashuan paipaj soldadocunahuanca, 500.000 ashtahuan alli soldadocunatami israelcunataca huañuchircacuna.

18Chashna rurajpimi israelcunataca, chai huatacunaca cumurichircacuna. Ashtahuanpish Judapi causajcunaca, paicunapaj ñaupa yayacunata Mandaj Taita Diospi shunguta churashcamantami, c'ari c'ari tucurcacuna.

19Abiasca Jeroboamhuan ashtahuan macanacushpami, Bet-el pueblotapish chai muyundij llajtacunandij, Jesana pueblotapish chai muyundij llajtacunandij Efraín pueblotapish chai muyundij llajtacunandij quichurca.

20Jeroboamca, Judá llajtata jatun mandaj Abías causacujpica, maillata ñaupaman pai mandacushcataca, mana cutin mandai tucurcachu. Chashna causacujpica Jeroboamtaca, Mandaj Diosllatajmi huañuchirca.

21Ashtahuanpish Abiasca tucuita alli mandashpami, mandanapica pi mana cuyuchipaj tiyarca. Paica chunga chuscu huarmicunata, ishqui chunga ishqui churicunata, chunga sujta ushushicunatami charirca.

22Abías ashtahuan imallata rurashcata imallata nishcapish profeta Iddo quillcashcapimi tiyacun.