1Quiquinta p'iñajcuna caita chaita richun, quiquinta mana ricunachijcuna quiquinpaj ñaupajmanta callpachuncuna, Taita Dios jatariyari.
2Paicunaca huairapi cushni rij shinami chingaringacuna.
Chashna chingachiyari.
Ninapi huira yacuyaj shinami yacuyangacuna.
Diosta mana rijsijcunaca Taita Diospaj ñaupajpica chashnami chingaringacuna.
3Ashtahuanpish cashcata rurajcunaca cushicungami.
Taita Diospaj ñaupajpimi cushicungacuna.
Cushicuihuan cashcamantami saltangacuna.
4Taita Diosta cantaichij.
Paipaj shutipi salmocunata cantaichij.
Caballopi tiyarishca jahua pachata puricujta jatunyachichij.
Paipaj shutica Jahmi: Paipaj ñaupajpi cushicuichij.
5Paica yaya mama illajcunapaj yayami, viudacunapaj randi shayarijmi.
Taita Diosca paipajlla huasipi causajmi.
6Taita Diosca sapalla cajcunatapish familiapi causachunmi churan.
Prezu apashcacunatapish llujshichishpa alli causaipimi churan.
Ashtahuanpish c'ariyajcunaca tullu allpacunapimi causan.
7Taita Dios, quiquin agllashcacunata ñaupashpa llujshijpica, shitashca pambata quiquin ñaupashpa purijpica, Selah
8allpaca chujchurcami.
Jahua pachamantapish tamyami urmarca.
Chai Sinaí urcuca Taita Diospaj ñaupajpica chujchurcami.
Taita Diospaj, israelcunapaj Taita Diospaj ñaupajpimi chashna tucurca.
9Taita Dios, achcatami tamyachircangui.
Chaquishca quiquinpaj allpatapish nuyuchircanguimi.
10Quiquinpaj caj canllami chaipica causarca.
Taita Dios, quiquin c'uyaj cashcamantami huajchacunaman cushcangui.
11Jatun Diosca huillanatamari curca.
Yallitaj achca huarmicunamari alli huillaitaca huillarcacuna.
12Jatun mandajcunaca soldadocunandijmi callpashpa miticugrincuna, callpashpa miticugrincuna.
Huasipi saquirij huarmicunaca quichumushcacunatami chaupinacuncuna.
13Allitajchari callana jahuacunapi chutajllata sirina tucurcanguichij.
Cancunaca cullquihuan llihuishca palomapaj alascuna shinami canguichij.
Cancunapaj plumacunaca curi shina quillujllami.
14Pailla Tucuita Rurai Tucuj, jatun mandajcunata urata janajta tsirapajpica, Salmón urcupica rasu urmashca shinami chai jatun mandajcunaca carca.
15Basán urcucunaca, yallitaj jatuncunamari.
Chai urcupaj puntacunaca yallitaj shayacuj puntamari.
16Jatun urcucuna, ¿ima nishpataj Taita Dios pai causanapaj munashca urcutaca p'iña chaparacunguichigari?
Mandaj Diosmari chai urcupica huiñaita causanga.
17Taita Diospaj carrocunaca huaranga, huarangacunamari.
Jatun Diosca Sinaí urcumantami paipajlla huasimanca shamun.
18Taita Dios, jahuamanmi huichiyarcangui.
Prezu cajcunataca quiquinhuanmi pusharcangui.
Runacunamantami aichayuj tucurcangui.
C'ariyajcunamantami aichayuj tucurcangui.
Mandaj Dioslla paicunapurapi causangapajmi chashna rurarcangui.
19¡Jatun Diosca alli nishca cachun!
¡Ñucanchijta quishpichij Taita Diosca punllantamari tucui imatapish ñucanchijpaj allipaj cun! Selah
20Dios, ñucanchij Dioslla, paimi quishpichinga.
Huañuimanta quishpichinapish Mandaj Jatun Diospajmi.
21Taita Diosca paita p'iñajcunapaj umataca chugrichingami.
Juchacunallapi purijpaj ajcha sapa umatapish chugrichingami.
22Jatun Diosca: “Basanmantami cantaca tigrachisha.
Mama cucha yacu
ucujmantami cantaca tigrachisha.
23Cambaj chaquicunaca pucajllami tucunga.
Canta p'iñajcunapaj yahuarhuanmi chashna tucunga.
Cambaj allcucunapaj c'allucunapish chashnallatajmi tucunga” nircami.
24¡Taita Dioslla, quiquinpaj ñancunataca ricurcacunami.
Diospajlla huasipimi Taita Diospaj, ñucata Mandajpaj ñancunataca ricurcacuna!
25Cantajcunaca ñaupashpami rincuna.
Tocajcunaca huashatami catincuna.
Chaupipica solteracunami panderocunahuan rincuna.
26¡Taita Diosta alli nichigari.
Tandanacushcacunapi alli nichigari.
Jatun Diostaca alli nichigari.
Israelpaj huahua huahuacuna alli nichigari!
27Q'uipa huiñai Benjaminmi chaipi carca.
Paica paicunata mandajmi carca.
Judata mandajcunaca paicunapaj tandanacuipimi carca.
Zabulonta mandajcunapish paicunapaj tandanacuipimi carca.
Neftalita mandajcunapish paicunapaj tandanacuipimi carca.
28Quiquinpaj Taita Diosmari canmanca fuerzata curca.
Taita Dios, ñucanchijpaj imata rurashcataca cutin ricuchiyari.
29Quiquin Taita Diospaj huasi Jerusalenpi cashcamantami, jatun mandajcunaca convidanacunata quiquinman cungacuna.
30Macanacunalla tucushpa tandanacushcacunataca sinchita rimayari.
Achca torocunata, llajtapi caj achca bizicunatapish rimayari.
Tucuicuna paicunapaj cullquindij quiquinpaj ucupi tucungacama rimayari.
Macanacushpa cushicujcunataca caita chaita cachayari.
31Egipto mandajcunami shamungacuna. Etiopiacunaca Taita Diosmanmi paicunapaj maquicunata utca chutangacuna.
32¡Cai pachapi mandajcuna, Taita Diosta cantaichij.
Jatun Diosta cantaichij! Selah
33Jahua pachamanta ashtahuan jahua pachapi, caballopi tiyarishca puricujta cantaichigari.
Jahua pachaca ñaupamanta tiyajmi.
Chaipi tiyajmi pai rimashcata uyachinga.
Tucuita rurai tucuj rimashcatami uyachinga.
34Taita Diosca tucuita rurai tucuj cashcata ricuichigari.
Pai tucuita rurai tucuj cashcaca israelcunapaj jahuapimi.
Pai tucuita rurai tucuj cashcaca jahua pachacamami.
35Taita Dios quiquinpaj huasimantaca mancharina Diosmi ricuringui.
Israelcunapaj Taita Diosca, pai agllashcamanca fuerzata cujmi.
C'ari c'ari fuerzasapa canata cujmi.
Taita Diosca alli nishca cachun.
Who We AreWhat We EelieveWhat We Do
2025 by iamachristian.org,Inc All rights reserved.
