2 SAMUEL 17 - Quichua Chimborazo Bible

Ahitofel yuyaita cushcataca Husai jarcashcami

1Chashna cashpami Ahitofelca Absalontaca:

–Ñucaca, 12.000 runacunata agllashpa, paicunahuan tucushpami cunan tutallataj Davidta catishpa rigrini.

2Paitaca achca shaicushca, imata mana rurai tucuipaj cai hora chayashpami manchachisha. Chaipi paihuan tucui cajcuna miticushpa rijpimi, jatun mandajllata japishpa huañuchisha.

3Chashna rurashpaca tucui israelcunatami cambajman tigrachimusha. Can mashcacushca shuj runa huañujpica, tucuicunami cambajman tigrashpa sumajta causangacuna– nirca.

4Chashna yuyaita cushcaca Absalonpajpish, tucui israelcunata cunaj yuyajcunapaj yuyaipipish allimi yuyachirca.

5Absalonca: –Cunanca arquita Husai runatapish cayachichij, pai ima yuyaita cushcatapish uyangapaj– nircami.

6Husai runa Absalonpajman shamujpica Absalonca:

–Ahitofelca cashna yuyaicunatami cun. Chaitaca rurashunchu manachu rurashun. ¿Canca imatataj ningui?– nircami.

7Shina nijpi, Husaica Absalontaca:

–Ahitofel cushca yuyaica, cunanca mana allichu.

8Husai runaca cashnapishmi nirca:

–Cambaj yayapish paihuan caj runacunapish c'ari c'aricuna cashcataca canllataj yachanguimi. Cunancarin mama osa paipaj huahuata quichushcamanta yallitaj p'iñarishca sachapi puricuj shinami canga. Cambaj yayaca macanacuipi ima shina canata alli yachajmi. Chaimanta cunan tutaca mana paihuan caj runacunahuanchu canga.

9Ashtahuanpish paica cunanca shuj jutcupi cashpa, mana cashpaca mai shujtajpimi pacatucushpa chaparacunga. Chashna cashcamanta cambaj runacunaca punta macanacuipiraj paicunapaj maquipi urmajpica, maijan chaita uyajcunaca: Absalonta catijcunataca ñamari mishashca ningacunami.

10Cambaj yayapish yallitaj fuerzayuj cashcata, paihuan caj runacunapish c'ari c'aricuna cashcataca tucui israelcunami yachancuna. Chaimanta leonpaj shungu shina c'ari c'ari runa cashpapish mancharishpa yuyai illaj tucushpa saquiringallacunami.

11Ñucaca cai yuyaitami cuni: Danmanta callarishpa, Beersebacama tucui israelcunata cambajman tandachi. Mama cucha uripi tiyaj t'iyu allpa shina chai achcacunahuan tucushpami cantaj macanacunaman rina cangui.

12Chashna rishpaca garhua tucui allpata urmaj shina tucuita tapashpaca cambaj yayataca maipi cajpipish japishunllami. Chashnami cambaj yayatapish tucui paihuan cajcunatapish shujllatapish mana saquishun.

13Maijan pueblopi miticujpipish, tucui israelcuna chai puebloman huascacunahuan rishpami, chai pueblotaca yacuman sirijta aisashpa shuj rumillatapish mana saquishun– nircami.

14Chaimi Absalonpish, tucui Israel runacunapish, arquita Husai runa yuyaita cushcamari Ahitofel yuyaita cushcata yalli alli nircacuna. Ahitofel yuyaita cushcaca yanga tucuchunmi Mandaj Diosllataj Husaitaca chashna nina yuyaita curca. Mandaj Diosca Absalonpaj jahuaman llaquicunata cachangapajmi chashna yuyaita cuchirca.

15Chai q'uipami Husaica Sadoc shuti Abiatar shuti curacunataca: “Ahitofelca israelcunata cunaj yuyajcunamanpish, Absalonmanpish cashna chashna yuyaicunatami cun. Ashtahuanpish ñucaca shujtaj yuyaitami curcani.

16Chashna cashcamanta Davidman cai huillanata cashna huillachun utca cachaichij: Cunan tutaca ashalla yacu ricun shitashca pamballapitajca ama saquirichijchu. Ashtahuanpish jatun mandajtapish, tucui paihuan cajcunatapish ama tucuchichun, Jordán yacuta ch'imbashpa caishuj ladoman tucuichij ninmi nishpa cachaichij” nircami.

17Jonatanpish, Ahimaaspish, Rogel pugyu yacu c'uchupimi carcacuna. Paicunaca ama pi ricuchun nishpami, Jerusalenmanca mana yaicushcacuna carca. Paicunamanca shuj servij huarmi chaiman rishpa Jerusalenpi imalla tucushcata huillajpimi, paicunaca jatun mandaj Davidman huillagrircacuna.

18Ashtahuanpish pacalla huillanaman ricujpipish, shuj huambra paicunata ricushpami Absalonman huillagrirca. Chaimi Jonatanhuan, Ahimaashuanca Bahurim pueblopi caj shuj runapaj huasiman callpashpa rishpa chaiman chayarcacuna. Chai runaca paipaj huasi canllapimi shuj pugyuta charirca. Paicunaca chai pugyu ucumanmi yaicurircacuna.

19Chai q'uipami chai huasiyuj runapaj huarmica chai pugyu jahuapi linsota tendishpa chai jahuapica trillashca granota tendijpi, chaipi ima cashcataca mana yacharcacuna.

20Absalonpajta rurajcuna chai huarmipaj huasiman chayashpaca:

–¿Ahimaashuan, Jonatanhuanca maipitaj?– nishpa tapujpi chai huarmica:

–Ñami ashalla yacu ricunta ch'imbashca canga– nijpi paicuna rishpa mashcashpapish mana japishpaca Jerusalenllamantajmi tigrarcacuna.

21Mashcajcuna tigrashca q'uipa Ahimaaspish, Jonatanpish chai pugyu ucumanta llujshishpa rishpami, jatun mandaj Davidmanca: “Jatarishpa yacuta utca ch'imbaichij. Ahitofelca cancunata ima shinalla llaquichinatami yuyaita cushca” nishpa huillarcacuna.

22Chaimi Davidpish tucui paihuan cajcunapish jatarishcahuan rishpa Jordán yacuta ch'imbarcacuna. Pacarinapajca shujllapish mana saquirishpami tucuicuna Jordán yacuta ch'imbarcacuna.

23Ahitofelca pai yuyaita cushcacunata Absalón mana rurajpimi, paipaj burrota parejashcahuan paipaj causana pueblopi caj paipaj huasiman rirca. Chaiman chayashpaca paipaj huasipi ima shinalla canata allichishca q'uipaca sipi tucushpami huañurca. Paitaca paipaj yayata churashca jutcullapitajmi churarca.

Davidca Mahanaim pueblopi cashcami

24Absalón tucui israelcunandij Jordán yacuta ch'imbacujpica, Davidca ñami Mahanaimman chayarca.

25Absalonca Joabpaj randica, Amasa runatami soldadocunata pushaj cachun churarca. Amasa runaca Itra shuti Israel runapaj churimi carca. Itra runaca, Nahas runapaj ushushi Abigailhuanmi chayarinacurca. Joabpaj mama Sarviaca Abigailpaj ñañami carca.

26Israelcunahuan Absalonhuanca Galaadpimi carpa huasicunata shayachishpa tiyarircacuna.

27Mahanaimman David chayashca q'uipami, Rabá pueblopi causaj amonita Nahaspaj churi Sobipish, Lodebarpi causaj Amielpaj churi Maquirpish, Galaadpi caj Rogelimpi causaj Barzilaipish,

28Davidpajman tucui paihuan cajcunapajmanca: Camacunata, tasacunata, allpa mangacunata, trigota, cebadata, cutata, grano camchata, habasta, lentejata, garbanzo camchata,

29sacha chuspipaj mishquita, huirata, ovejacunata, quezocunatapish paicuna micuchun apamurcacuna. Paicunaca yaricaihuan, yacunaihuanmi shitashca pambapica cashca canga nishpami apamurcacuna.