1Alli ñanllapi purijcunaca cushichishcacunami.
Mandaj Diospaj mandashcallapi purijcunaca cushichishcacunami.
2Ima shina causanata pai yachachishcata
huaquichijcunaca cushijllacunami.
Tucui shunguhuan chaita
mashcajcunaca cushijllacunami.
3Pai yachachishca ñanpi purijcunaca
ima millaita mana rurancunachu.
4Quiquin mandashcacunataca tucuita chaitataj pajtachichunmi cushcangui.
5Quiquin chaitataj pajtachichun nishcacunata pajtachingapaj ñuca ñanca mana cuyuchipaj cangapishchari.
6Quiquin imalla mandashcaca tucui quiquin mandashcataj cashcata entendishpaca ñucaca mana pingachishca cashachu.
7Quiquin mandashcacunaca ima panda mana cashcata yachashpaca, ñuca tucui shunguhuanmi quiquintaca alabasha.
8Quiquin chaitataj pajtachichun nishcacunatami pajtachisha.
Ñucataca amataj saquihuanguichu.
Bet9Q'uipa huiñaica, ¿imahuantaj paipaj ñantaca chuyayachingari?
Quiquinpaj shimita huaquichishpallami chuyayachi tucunga.
10Ñuca tucui shunguhuanmi quiquintaca mashcarcani.
Quiquin mandashcacunamanta anchurichunca,
amataj saquihuanguichu.
11Ama juchallishpa quiquinta p'iñachingapajca
quiquin imalla nishcacunataca ñuca shungupimi
huaquichircani.
12Mandaj Dioslla, quiquinca allimi cangui.
Quiquin chaitataj pajtachichun nishcacunata yachachihuayari.
13Quiquinpaj shimihuan tucui imallata mandashcataca,
ñuca shimihuanmi huillarcani.
14Ima shina causanata quiquin
yachachishca ñanpi purishpami, achca
charinacunamantapish yalli cushicuni.
15Quiquin mandashcacunata, cutin cutin alli yachashpaca,
quiquinpaj ñan cashcatami entendisha.
16Chashna cashpaca quiquin chaitataj pajtachichun nishcacunapimi yallitaj cushicusha.
Quiquinpaj shimicunataca manataj
cungarishachu.
Guímel17Quiquinpajta ruraj causachun, quiquinpaj shimita huaquichichun quiquinpajta rurajpaj allita rurapayari.
18Quiquin mandashcacunapi mancharinacuna tiyacujta ricungapaj ñuca ñahuita pascahuai.
19Ñucaca cai pachapica shujtaj llajtamanta pasacuj runa shinallami cani.
Quiquin mandashcacunata
ama ñucamanta pacahuaichu.
20Ñuca almaca quiquin imallata mandashcacunata punllanta yachanaihuan huañucunmari.
21Quiquin mandashcacunamanta anchurij
jatun tucushca, millaicunataca
sinchitami rimarcangui.
22Mana alli nishca canatapish, yanganchishca canatapish
ñucamanta caruyachiyari.
Ñucaca ima shina causanata quiquin
yachachishcatamari huaquichircani.
23Mandajcunapish paicunapura tiyarishpami, ñucata rimarcacuna.
Ashtahuanpish quiquinpajta rurajca quiquin chaitataj pajtachichun nishcacunata pajtachina yuyaillami carcani.
24Ima shina causanata quiquin yachachishcacunaca,
ñucapajca mishquimari.
Ñucata cunajcunamari.
Dálet25Ñucaca ña allpa tucushca shinamari cani.
Quiquinpaj
shimihuan nishca shina ñucaman
cutin fuerzata cuhuayari.
26Ñuca causaipi ima shina cashcatami quiquinman huillarcani.
Quiquinca cutichircanguimi. Quiquin chaitataj pajtachichun nishcacunata yachachihuayari.
27Quiquin mandashcacunapi imalla nicushcacunata
entendichihuayari.
Quiquinpaj mancharinacunata cutin cutin alli yachangapaj entendichihuayari.
28Ñuca almaca llaquihuan yacuyashpa
tucuricunca.
Quiquinpaj shimihuan nishca shina jatarichihuayari.
29Llulla ñanmanta ñucata
anchuchihuayari.
Quiquin llaquij cashcamanta quiquinpaj mandashcata cuhuayari.
30Ñucaca mana llulla ñantami
agllarcani.
Quiquin mandashcacuna yuyaillami cani.
31Ima shina causanata quiquin yachachishcapi llutarishca shinami cani.
Mandaj Dioslla ñucataca ama pingachihuaichu.
32Quiquin mandashcacunapimi callpashpa purisha.
Ñuca shunguta quiquin cushichijpimi chashna purisha.
He33Mandaj Dioslla, chaitataj pajtachichij ñanta yachachihuayari. Tucuringacamami catirasha.
34Quiquin mandashcata huaquichingapaj yuyaita
pascahuayari.
Tucui shunguhuanmari chaitaca pajtachisha.
35Quiquin mandashcacunapaj ñanpi pushahuayari.
Chaicunata pajtachina munaillami cani.
36Ñuca shungutaca ima shina causanata quiquin yachachishcata cazujta rurapayari.
Quiquinpajlla charina munaiyujtaca ama rurahuaichu.
37Yangacunallapi ñuca ñahuita
churanamanta anchuchihuayari.
Quiquinpaj ñanpi puringapaj causaita cuhuayari.
38Quiquinta manchaj, quiquinpajta rurajman quiquin cusha nishcataca pajtachiyari.
39Yanganchishca canatamari manchacuni. Chaita ñucamanta
anchuchipaiyari.
Quiquinca cashcata rurashpa ricuchijmi cangui.
40Ñucaca quiquin cushca mandashcacunata pajtachina
munaillamari cani.
Cashcata ruraj cashca shinallataj cutin fuerzata cuhuayari.
Vau41Mandaj Dioslla, quiquinpaj nishcapi nishca shinallataj quiquinpaj llaquij cana ñucapajman shamuchun. Mandaj Dioslla, quiquinpaj nishcapi nishca shinallataj quiquinpaj quishpichinaca ñucapajman shamuchun.
42Ñucata
pingachijcunamanca quiquinpaj shimipi
shunguta churashcatami cutichisha.
43Imatapish cashcata rimaj canataca,
amataj ñuca shimimanta anchuchihuaichu.
Ñucaca quiquin mandashcacunatami shuyani.
44Quiquin mandashcataca huiñaicama huaquichicushallami.
Huiñai huiñaita pajtachicushallami.
45Quiquin mandashcacunatami mashcani.
Pi mana
imata nishcami purisha.
46Ima shina causachun quiquin yachachishcataca, jatun mandajcunapaj ñaupajpimi huillasha.
Ñucaca manataj pingarishachu.
47Quiquin mandashcacunapimi yallitaj cushicusha.
Chaicunatamari c'uyarcani.
48Quiquin mandashcacunata
c'uyaj cashcamantaca, ñuca maquitami huichi alzasha.
Quiquin chaitataj pajtachichun nishcacunataca cutin cutin
yuyaricushallami.
Zain49Quiquinpajta ruraj ñucaman quiquinpaj shimita cushcapi nishcata yuyaripayari.
Chaipimari ñucataca shunguta churachircangui.
50Ñuca llaquihuan cajpica, quiquinpaj shimimi cushichin.
Quiquin cusha nishcacunamari ñucamanca fuerzata cun.
51Jatun tucushcacunaca ñucataca
yallitajmari chanzata rurarcacuna.
Shina cajpipish, quiquin mandashcamantaca
manataj anchurircanichu.
52Mandaj Dioslla, ñaupaman can ima shina cashcata ricushpa mitsaj cashcatami yuyarircani.
Chaimantami cushicurcani.
53Millaita rurajcunata ricushpamari yallitaj p'iñarini.
Paicunaca quiquin mandashcamanta anchurishpami chashna tucuncuna.
54Ñucaca ajeno huasillapi cashpapish cantocunata cantashcami ñucapajca quiquin mandashcaca carca.
55Mandaj Dioslla, tutaca quiquinpaj shutitami yuyarircani. Quiquin mandashcatami
pajtachircani.
56Quiquinpaj mandashcacunata pajtachishcamantami,
cai tucui allicunataca charini.
Chet57Ñuca charinaca Mandaj Diosmari.
Quiquinpaj shimicunataca pajtachishatajmi
nircanimi.
58Ñuca tucui shunguhuanmi quiquin ñucaman ricurichun mañarcani.
Quiquin nishca shinallataj ñucata llaquihuayari.
59Ñuca ima shina causacushcatami alli alli yuyarircani.
Mai ñanpi puricushcata yuyarishpami, quiquin yachachishcapi puringapaj tigrarcani.
60Quiquin mandashcacunataca utcami pajtachircani, mana uniyarcanichu.
61Millaicunaca
huaicashpami ñucataca muyunchircacuna.
Ashtahuanpish quiquin mandashcataca,
manataj cungarircanichu.
62Cashcata rurashpamari, ñucataca mitsahuarcangui.
Chaimantami chaupi tutapi quiquinta alabangapaj jatarircani.
63Quiquinta tucui manchajcunahuanmi chaipurallataj cani.
Quiquin mandashcacunata
huaquichijcunahuanmi chaipurallataj cani.
64Mandaj Dioslla, quiquin llaquij cashcaca
tucui cai pachapi jundamari.
Quiquin mandashcacunata pajtachinata yachachihuayari.
Tet65Mandaj Dioslla, quiquinpajta rurajpajca, allitamari rurashcangui.
Quiquinpaj shimipi nishca shinatajmi rurashcangui.
66Quiquin mandashcacunapimi shunguta churarcani.
Alli yuyaita, alli yachaita cuhuayari.
67Manaraj cumurichishca cashpaca maipish cachunmi causarcani.
Ashtahuanpish cunanca quiquinpaj
mandashcatamari pajtachicuni.
68Quiquinca allimari cangui,
allicunata rurajmari cangui.
Quiquin chaitataj pajtachichun nishcacunata yachachihuayari.
69Jatun tucushcacunaca
llullashpallamari ñucataca juchachircacuna.
Ashtahuanpish ñucaca tucui shunguhuanmi
quiquin mandashcacunata huaquichisha.
70Paicunapaj shunguca sebo shinami rumiyarca.
Ashtahuanpish ñucaca quiquin
mandashcapimi yallitaj cushicurcani.
71Ñucata cumurichishcaca allimari cashca.
Quiquin chaitataj pajtachichun nishcata yachachunmari chashna rurarcangui.
72Ñucapajca quiquinpaj shimimanta llujshishca mandashcaca
huaranga huaranga curitapish, cullquitapish yallimari.
Yod73Ñucataca quiquinpaj maquihuan rurashpami callarichircangui.
Quiquinpaj mandashcacunata yachangapaj entendichihuayari.
74Quiquinta manchajcuna ñucata ricushpaca cushicungacunami. Ñucaca quiquin mandashcapimi shunguta churarcani.
75Mandaj Dioslla, quiquin mandashcacunaca cashcata ruraj cashcataca yachanimi.
Quiquinca chaitataj pajtachij cashca shinallatajmi llaquichircangui.
76Quiquin llaquij canaca cunanca ñuca cushicuna cachun.
Quiquinpajta ruraj ñucaman cusha nishca shinallataj chaica cachun.
77Quiquin llaquij canaca ñucaman fuerzata cunaman shamushca cachun.
Quiquin mandashcacunaca ñuca cushicunamari.
78Jatun tucushcacunaca pingachishca cachun.
Paicunaca ñucataca yangamantamari juchachircacuna.
Ashtahuanpish ñucaca quiquin mandashcacunatami cutin cutin yachacushalla.
79Quiquinta manchajcunaca ñucapajman cutimushca cachun.
Ima shina causanata quiquin yachachishcata rijsijcunaca ñucapajman cutimushca cachun.
80Ñuca ama pingachishca cangapajca, quiquin chaitataj pajtachichun nishcacunapi ñuca
shunguca imata mana pandaj cashca cachun.
Caf81Quiquin quishpichichun nishpa,
ñuca almaca huañucunca.
Quiquin mandashcapimari ñuca shunguta churani.
82Can rurasha nishcata pajtachiman shamujtaca ñahui
amsayajtamari chapacunilla.
¿Ima horastaj ñucataca cushichinguiyari?
83Cushni llujshinapi
capachuta huarcushca shina cashpapish, quiquin
chaitataj pajtachichun nishcataca manataj
cungarishcanichu.
84Quiquinpajta rurajca ¿maicamataj llaquita apashpa causacushallari?
Catirashpa ñucata llaquichijcunataca ¿ima horastaj cashcata rurashpa ricuchinguiyari?
85Jatun tucushcacunaca ñuca urmachunmari jutcucunata allashcacuna. Quiquin mandashca shina mana rurajcunamari chashna rurashcacuna.
86Quiquin tucui mandashcacunaca mana llullamari.
Ñucataca yangallamari catirashpa llaquichincuna.
Ayudahuayari.
87Ñucataca ashallamantamari cai
pachamantaca mana anchuchincuna.
Shina cajpipish, quiquin mandashcacunataca
manataj saquishcanichu.
88Quiquin llaquij cashca shinallataj ñucaman cutin fuerzata cuhuayari. Ñucapish ima shina causanata quiquinpaj shimihuan
yachachishcataca pajtachishami.
Lámed89Mandaj Dioslla, quiquinca huiñaipajmi cangui.
Quiquinpaj shimicunaca
jahua pachapimi huiñaipaj tiyacun.
90Quiquin pajtachij cashcaca huahua
huahuacunata caticungallami.
Cai pachaca quiquin maipi churashcallapitajmi sinchita tiyacun.
91Tucui imalla tiyajcunapish, quiquin
mandashcapimi cunancama tiyacun.
Tucui chaicunami quiquinpajta ruracuncuna.
92Quiquin mandashca ñucata mana
cushichishca cajpica, ñuca llaquihuan cashpamari ña chingariman carcani.
93Quiquin mandashcacunataca manataj
cungarishachu.
Chaicunahuanmi ñucamanca cutin fuerzata
cuhuashcangui.
94Ñucaca quiquinpajmari cani quishpichihuayari.
Quiquin mandashcacunata mashcajmari cani.
95Millaicunaca ñucata
chingachingapaj chapacuncunamari.
Ashtahuanpish ñucaca ima shina
causanata quiquin yachachishcatami alli nini.
96Tucui imalla cai pachapi tiyaj sumajcunaca tucurijllami. Ashtahuanpish quiquin mandashca shimicunaca
manataj chingaringachu.
Mem97¡Quiquin mandashcataca ñucaca mashnatamari c'uyani!
Chai mandashcaca punllanta ñuca cutin cutin yuyaricunallami.
98Quiquin mandashcacunahuanca ñucata p'iñajcunata yalli yachajtamari ñucataca rurashcangui.
Chaicunaca ñucamantaca manataj anchunchu.
99Ima shina causanata
quiquin yachachishcacunatamari cutin cutin yuyaricujlla cani.
Chaimi ñucata yachachijcunatapish
yalli entendini.
100Quiquin mandashcacunata huaquichishcamantaca
yuyajcunata yallimari entendishcani.
101Quiquin mandashcata pajtachingapajca, tucui millai ñanmantami anchurircani.
102Quiquinpaj mandashcacunamantaca ñucaca manataj anchurinichu. Chaitaca quiquinmari yachachircangui.
103¡Quiquinpaj shimicunaca ñuca shimipica
tucuimanta yalli mishquimari!
¡Ñuca shimipica sacha chuspipaj mishquitapish mai yallimari!
104Quiquin mandashcacunapimi alli
yuyaita japircani.
Chaimantami tucui llulla ñantaca p'iñarcani.
Nun105Quiquinpaj shimica ñuca chaqui
sarunata achijyachijmi.
Ñuca ñanta achijyachijmi.
106Cashcata rurachun quiquin mandashcacunataca
pajtachishatajmi nircanimi, chaitaca
rurashatajmi.
107Yallitaj llaquipimari cani.
Mandaj Dioslla, quiquinpaj shimipi nishca shinallataj cutin fuerzata cuhuayari.
108Mandaj Dioslla, ñuca shimihuan cantashcata quiquinman cushcaca quiquin munashca shina cachunmi rogani. Quiquin mandashcacunatapish yachachichunmari rogani.
109Ñuca causaica cunanpish, cayapish
huañunallapimari cani.
Shina cashpapish, quiquin mandashcataca
manataj cungarircanichu.
110Millaicunaca ñuca tsagnarinatami churarcacuna. Shina cajpipish, quiquinpaj
mandashcacunamantaca manataj anchurircanichu.
111Ima shina causanata quiquin
yachachishcaca ñuca shunguta cushichij cashcamanta, ñuca japina cashcatami huiñaipaj japircani.
112Ñuca shungutaca quiquin chaitataj pajtachichun nishcata
pajtachijtamari rurarcani.
Chaica ñuca tucui causaipi cana cashcamantami chashna pajtachina tucurcani.
Sámec113Mishqui shimi jayaj
shungu runacunataca p'iñanimi.
Ashtahuanpish quiquin mandashcataca
c'uyanimi.
114Quiquinca ñuca miticuna, ñuca escudomi cangui.
Quiquinpaj shimi nishcatami shuyacunilla.
115¡Millaicuna, ñucamanta
anchurichij!
Ñucaca ñuca Taita Dios
mandashcacunatami pajtachisha.
116Quiquinpaj shimipi nishca
shinallataj ñucata charirahuayari.
Ñucaca causacushallami.
Chaipitajca ñuca shuyacushcamantaca mana pingai tucushachu.
117Quiquin charirajpica, quishpirishcami casha.
Quiquin
chaitataj pajtachichun nishcapimi punllanta
cushicusha.
118Quiquin chaitataj pajtachichun nishcacunamanta
anchurijcunataca tucuicunatami sarurcangui.
Paicunaca imata yuyarishpapish llullangapajlla cajpimi chashna rurarcangui.
119Quiquinta mana rijsijcunataca, mapa
ñucuta shinami cai pachamanta
chingachircangui.
Chaimantami ñucaca ima shina causanata
quiquin yachachishcacunataca c'uyarcani.
120Ñuca aichaca quiquinta manchashcamanta chujchucunmari.
Quiquin mandashcacunataca manchacunimari.
Ayin121Ñucaca cashcatamari, imapish allitamari rurarcani.
Ñucata p'iñajcunapaj
maquipi ama shitahuaichu.
122Quiquinpajta ruraj ñucapajca pi mana cuyuchipaj mitsaj cayari.
Jatun tucushcacuna ñucata llaquichichunca, ama saquihuaichu.
123Quiquin quishpichiman shamujtaca ñuca ñahui amsayajtami chapani.
Quiquinpaj shimipi nishca shina cashcata
ruranaman shamujtamari chapani.
124Quiquinpajta rurajpajca quiquin llaquij cashca shinataj rurayari.
Quiquin chaitataj pajtachichun nishcacunata yachachihuayari.
125Ñucaca quiquinpajta rurajmari cani.
Ima shina causanata quiquin yachachishcacunata yachangapaj yuyaita cuhuayari.
126Quiquinpaj mandashcacunata mana valichishcamantaca Mandaj Dioslla, ñamari imatapish rurana cangui.
127Ñucaca quiquin mandashcacunataca,
curitapish yalli, ashtahuan alli curitapish yallimi
c'uyarcani.
128Chaimantamari quiquin
mandashcacunaca imapi mana panda cajpi, tucui imamantapish yalli munani.
Tucui llulla ñancunataca p'iñanimi.
Pe129Ashtahuanpish ima shina causachun quiquin
yachachishcaca sumajmari.
Chaimantamari ñucaca tucuita huaquichini.
130Quiquinpaj shimicunata alli, alli yachachijpica, achijyachinmari.
Yachai illajcunatapish entendichinmari.
131Shimita pascashpa samaita millpuj shinami quiquin mandashcacunataca tucui munaihuan yacharcani.
132Ñucata tigra ricuhuayari.
Ñucataca llaquihuayari. Quiquinpaj shutita c'uyajcunata llaquij cashca shinallataj llaquihuayari.
133Ñuca chaqui purinatapish quiquinpaj shimihuan mandahuai.
Ima millai mandashca ama cangapaj ñucata pushahuai.
134Millai runacuna
llaquichicunmanta llujshichihuayari. Ñucaca quiquin mandashcacunatamari huaquichisha.
135Quiquinpajta ruraj ñucataca quiquinpaj c'uyaj ñahuihuan achijyachihuayari.
Quiquin chaitataj pajtachichun nishcacunata yachachihuayari.
136Quiquin mandashcata
mana pajtachishcamantami ñuca ñahuimanta huiquica jatun
yacu shina rirca.
Tsade137Mandaj Dioslla, quiquinca
cashcata rurajmi cangui.
Quiquin mandashcacunapish ima mana pandamari.
138Ima shina causanata
yachachichun quiquin cushcacunaca ima mana pandachu, cashcata
yachachij shimicunami.
139Ñucata p'iñajcunaca quiquinpaj
shimicunatamari cungarishcacuna.
Chaimari ñucaca huañurishpa tucuricuni.
140Quiquinpaj shimicunaca tucuimanta yalli chuyamari.
Chaimantami quiquinpajta ruraj ñucaca c'uyani.
141Ñucaca uchillami cani, shujtajcuna p'iñashcami cani.
Chashna cashpapish quiquin mandashcacunataca manataj cungarircanichu.
142Quiquinpaj cashcata ruranaca huiñaita mana shujtajyangachu.
Quiquin mandashcaca
mana llullami.
143Imata mana rurai tucuipaj
llaquicunamari ñucataca japirca. Ashtahuanpish quiquin mandashcacunaca ñuca cushicunamari.
144Ima shina causanata quiquin yachachishcacunaca huiñaita mana shujtajyangachu.
Entendichihuayari, causashallami.
Cof145Mandaj Dioslla, ñuca tucui
shunguhuanmari quiquinta mañapani.
Ñucata uyahuayari.
Quiquin chaitataj pajtachichun nishcacunatamari pajtachisha nini.
146Mandaj Dioslla quiquintami mañapani quishpichihuayari.
Ima shina causanata quiquin
yachachishcacunatamari pajtachisha nini.
147Manaraj pacarijpimari
mañarcani.
Quiquinpaj shimipimari ñuca shunguta churani.
148Quiquin mandashcacunata
alli alli yuyaringapajmi, tutacunapish mana dormircani.
149Ñuca mañashcataca quiquin llaquij cashca shinallataj uyahuayari.
Mandaj Dioslla,
quiquin cashcata ruraj cashca shinallataj cutin fuerzata cuhuayari.
150Ñucata catirashpa llaquichijcunaca millaimanmari ashtahuan c'uchuyancuna. Quiquin
mandashcamantamari caruyancuna.
151Mandaj Dioslla, quiquinca ñuca
c'uchullapimi cangui.
Quiquinpaj mandashcacunaca tucuipi ima mana llullamari.
152Ima shina causanata quiquin yachachishcacunataca, ña unitami yachani.
Chaitaca huiñaipajmi churashcangui.
Resh153Ñuca llaquipi cajta ricuhuayari,
llujshichihuayari. Quiquin mandashcataca manataj cungarircanichu.
154Ñucamanta shayarishpa quishpichihuayari.
Quiquinpaj shimipi nishca shinallataj cutin fuerzata cuhuayari.
155Quiquinta mana rijsijcunaca quiquin chaitataj pajtachichun nishcacunataca mana mashcancunachu.
Chaimanta paicuna quishpirinaca carupimari.
156Mandaj Dioslla, quiquin
llaquij cashcaca yallitaj achcamari. Quiquinpaj mandashcapi nishca shinallataj cutin fuerzata cuhuayari.
157Ñucata catirashpa llaquichijcunaca, ñucata p'iñajcunaca achcacunamari. Ashtahuanpish ima shina
causanata quiquin yachachishcacunamantaca manataj anchurircanichu.
158Huashalla llaquichijcunata ricushpamari p'iñanachircani.
Quiquinpaj shimipi nishcacunata mana pajtachijpimari p'iñanachircani.
159Mandaj Dioslla, quiquin
mandashcacunata ñuca c'uyajtaca
ricunguimi.
Quiquin llaquij cashca shinallataj cutin fuerzata cuhuayari.
160Quiquinpaj tucui shimicunaca ima mana pandachu tucuimi alli.
Cashcata ruranata yachachij quiquin
mandashcacunaca huiñaipajmi.
Sin161Mandajcunaca ñucataca yangamantamari catirashpa llaquichincuna.
Shina cajpipish, ñucaca quiquinpaj
shimicunataca tucui shunguhuanmi mancharcani.
162Ñucaca macanacuita mishashpa achca charinacunata japij shinami quiquinpaj shimicunapica yallitaj cushicuni.
163Llullanataca p'iñanimi, millanimi.
Quiquin mandashcatami c'uyani.
164Punllanta canchis cutinmi quiquintaca alabani.
Cashcata ruraj mandashcacunata cushcamantami chashna alabani.
165Quiquin cushca mandashcacunata c'uyajcunaca,
sumajta causanatami achcata charincuna.
Ima ñitcarinaca paicunapajca mana tiyanchu.
166Mandaj Dioslla, quiquin
quishpichichunmari shuyacurcani. Quiquin mandashcacunata chaitataj pajtachina yuyailla tucushpamari pajtachircani.
167Ima shina causanata quiquin
yachachishcatami ñucaca pajtachini. Chaicunataca ñucaca yallitajmi c'uyani.
168Quiquin mandashcacunata, ima shina causanata quiquin
yachachishcacunatami pajtachircani. Tucui ñuca purishcacunaca quiquinpaj ñaupajpimi.
Tau169Mandaj Dioslla, ñuca mañashcaca quiquinpaj ñaupajman
chayashca cachun.
Quiquinpaj shimipi nishca shinallataj ñucamanca alli yuyaita cuhuayari.
170Ñuca mañashcaca
quiquinpaj ñaupajman chayashca cachun.
Quiquinpaj shimipi nishca shinallataj ñucataca quishpichihuailla.
171Quiquin chaitataj pajtachichun nishcacunata ñucaman yachachijpimi, ñuca shimihuanca quiquinta alabasha.
172Quiquin quiquinpaj shimita cushcamantami cantani.
Quiquinpaj cushca tucui mandashcacunaca cashcata ruraj cashcamantami cantani.
173Quiquin mandashcacunatami agllarcani.
Quiquinpaj
maquihuan utca ayudahuanguiyari.
174Mandaj Dioslla, quiquinpaj
quishpichinatami munani.
Quiquinpaj mandashcacunami ñucataca cushichin.
175Quiquinta alabangapajmi ñucaca causacuni.
Quiquinpaj mandashcacuna
ñucataca ayudashca cachun.
176Chingarishca oveja shinamari puricuni.
Quiquinpajta rurajtaca mashcahuayari.
Quiquin mandashcacunataca manataj cungarij carcanica.
Who We AreWhat We EelieveWhat We Do
2025 by iamachristian.org,Inc All rights reserved.
