LAMENTACIONES 3 - Quichua Chimborazo Bible

Mandaj Diosllataj llaquishpa quishpichingami

1Ñucaca, ñuca aichapi jatun llaquita apashca runami cani.

Mandaj Diosmari jatunta p'iñarishpa anguhuan macahuarca.

2Ñucataca achij luzman pushanapaj randica,

amsamanmi pushahuarca.

3Tucui punllamari cutin cutin tigrashpa macahuarca.

4Chashnamari utcapi ñuca aichata

chaquichishpa yuyajyachirca,

ñuca tullucunatapish p'aquircami.

5Ñuca muyundijpi baluartecunata shayachishpami, caparirishpa huacana jatun llaquita rurarca.

6Ña uni huañushcacunata shinami amsapi saquirca.

7Ñuca tucui muyundijta chapashpami,

llujshichunca mana saquirca.

Jatun llashaj cadenacunahuanpishmi huatarca.

8Caparishpa ñuca mañajpipish,

ama uyangapaj rinrinta taparircami.

9Miticunaman ricujpipish, labrashca

jatun rumicunahuanmi ñanta jarcarca.

Chashna rurashpami, shujtaj ñanta pusharca.

10Paica oso shinami chaparca,

pacallapi león shuyacuj shinami japirca.

11Shujtaj ñanta cachashpamari japishpaca,

mirga mirgata rurashpa ñuturca.

Chashnatamari shitashcata saquihuarca.

12Paipaj arcota chutashpami puntajlla

caspicunahuanca ñucata ricurashpa shitarca.

13Pai aparina carapi charicushca puntajlla caspicunataca,

tucui caspicunatamari ñuca huijsapi shitarca.

14Ñuca llajtapi causajpuracunaca, punllantamari

chanzata rurashpa asircacuna.

15Cai tucui llaquicunahuanmi ñacachihuarca.

Ajenjota ubyachishpamari machachihuarca.

16Rumicunapi urisinga urmachishpami,

ñuca quirucunatapish p'aquirca.

Ñuca jahuapica, ushpatami shitarca.

17Sumaj causai tiyashcataca ña cungarinimi,

cushicui tiyashcataca mana yuyarinillapishchu.

18Chaimantami ñucaca: “Imata rurana

yuyaitapish mana charinichu.

Mandaj Diospi shunguta churana yuyaipish

mana tiyanchu” yuyarcanimi.

19Jatun llaquihuan ñuca shungu p'aquirishcatapish,

ajenjota, hielta ubyashcatapish yuyarihuayari.

20Ñucapi tiyaj almapish, chai tucui

llaquihuanca manataj casijlla cai tucunchu,

chaitaca ñucapish manataj cungari tucushachu.

21Ñucaca caita yuyaipi charishpamari,

Diospi shunguta churasha nini.

22Mandaj Dios llaquijllapimari, ñucanchijca

mana tucuicuna chingarishcanchij.

Ñucanchijta llaquinataca manataj saquishcachu.

23Cambaj c'uyaica cada tutamanta mushujllatajmi,

ñucanchijtaca manataj saquinguichu.

24Ñuca tucui almahuanmi:

“Ñuca charinaca Mandaj Diosmari”

nishpaca, paillata shuyani.

25Mandaj Diosca paipi shunguta churashpa,

tucui almahuan paita mashcajhuanca allimari.

26Mandaj Dios quishpichichun casijlla

shuyanaca allimari.

27Huambramantapacha yugota apanaca,

pipajpish allimari.

28Mandaj Diosllataj apachishcamantaca,

upajlla quiquinlla tiyarichunlla.

29Llaquirishpa pambaman cumurichunlla.

Chashna llaquirijpica, Mandaj Diosca quishpichipajpishmi.

30Maijan macajpipish quijadusta ricuchichunlla,

mashnata c'amijpipish upalla uyachunlla.

31Jatun Diosca mana huiñaita shitashpa saquinchu.

32Ashtahuanpish llaquichishpapish,

jatunta c'uyaj cashcamantaca paillataj llaquinmi.

33Paica runacunata yanga llaquichinata,

huacachinataca manataj munanchu.

34Llajtapuracunata prezu churashpa,

sarushpa tucui ñutuchun,

35jahua pachapi causaj Dios ricucujpi,

millaicunataraj allicunapaj randi allipi churachun,

36manapish llaquichina runata mandajcuna

llaquichichunpish, Jatun Diosca manataj

ricunachinchu.

37Jatun Dios manapish mandajllapitaj

imapish tucunllami nishpaca,

¿pitaj ni tucungari?

38Jahua pachapi causaj Diostaj

paipaj shimihuan mandashcamantami,

llaquipish, allipish tiyan.

39Runaca cai pachapica, ima shujtajmanta

llaquilla canapaj randica,

juchayuj cashcamanta caparishpa huacachun.

40Ñucanchij ima shina causacushcataca callarishpa,

alli yuyarishunchij.

Chashna yuyarishpa, Mandaj Diosman cutirishunchij.

41Jahua pachapi caj Diostaca ñucanchij shungutataj cushpa,

maquicunatapish huichi chutashpa mañashunchij.

42Ñucanchijmari cantaca yallitaj mana cazushcanchij.

Ñucanchijmari canmanta anchurishcanchij.

Chaimantamari ñucanchijca llaquita apanataj tucushcanchij.

43Jatunta p'iñarishpamari ñucanchijtaca

catishpa llaquichircangui.

Pita mana llaquishpamari huañuchircangui.

44Ñucanchij mañashcata ama uyangapajpish,

jatun amsa p'uyu chaupipimi miticurcangui.

45Shujtaj runacunapaj chaupipimari,

ñucanchijtaca millashpa c'aminata rurashcangui.

46Ñucanchijta p'iñajcunaca, tucuicunamari

millpunamira shimita pascarcacuna.

47Mancharina jatun llaqui, trampapi urmana,

tucuicuna huañushpa tucurinallami

ñucanchijtaca japirca.

48Ñuca llajtapi causajpuracuna

jatun llaqui tucushcamantami,

ñuca ñahuicunamantaca jatun yacuta

shina huiquita jichani.

49Manataj ashallatapish samarina tiyanchu.

Chaimantami huacanataca, manataj upallashpa huacani.

50Mandaj Dios jahua pachamanta urilla

ricungacama huacacushallami.

51Ñuca causacun pueblopi causaj

huarmicunamantaca ñahuicuna nanajta,

alma shaicujtami huacani.

52Ñucata p'iñajcunaca, yangamantamari pajarocunata shina catishpa japircacuna.

53Ñucataca huañuchunmari jatun jutcupi churarcacuna.

Chaipi churashpaca, jatun rumihuanmi taparcacuna.

54Umacama yacupi huashicushpami:

“Cunantajca huañugrinimi” yuyarcani.

55Mandaj Dioslla, chai jutcu ucupi prezu cashpaca,

cantamari cayarcani.

56Ñuca mañashcataca uyarcanguimari.

Shungu llujshishpa ñuca caparicujtaca,

ama cambaj rinrinta tapashpa mana uyaichu.

57Ñuca canta mañai punllamari

ñucapajman c'uchuyashpaca: “Ama manchaichu” nihuarcangui.

58Jatun Dioslla, mana llujshi tucuipaj

llaquipi cajpica, canmari ñucamanta shayarircangui.

Canmari ña huañugricujpi quishpichihuarcangui.

59Mandaj Dioslla, ñucata yangamanta

llaquichicujtaca canllataj ricunguimi, mitsahuayari.

60Ñucata ima shinalla llaquichisha nicujta,

ñuca ima tucuchun yuyacujtaca canllataj ricunguimi.

61Mandaj Dioslla, ñucata c'amishcata,

ñucata tucuchingapaj ima shinalla

yuyarinacujtapish uyarcanguimi.

62Ñucata llaquichingapaj jatarishpa

imallata parlanacujta,

tucui punlla imallata yuyarinacujta uyanguimi.

63Paicuna tiyarijta, jatarijtapish ricuyari.

Ñucaca, paicuna cantashpa asinamari cani.

64Mandaj Dioslla, paicunapaj maquihuan rurashcamantaca,

japina cashca shinataj cuiyari.

65Paicunapaj shungu sinchiyachun saquilla.

Can cachasha nishca llaquitaca paicunapaj

jahuapi cacharitagari.

66Mandaj Dioslla, jatunta p'iñarishpa llaquichiyari.

Cai pachamanta chingachiyari.