1Chai q'uipami Pabloca Silasndij Derbe puebloman, Listra puebloman chayarcacuna. Chaipica Jesusta catij Timoteo shuti runami causarca. Paica, Jesusta catij judía huarmipaj churimi carca. Paipaj yayaca griegomi carca.
2Listrapi, Iconiopi, caj tandanacushca crijcunaca Timoteotaca alli causajmi nircacunami.
3Pabloca paitami, paihuan richun munarca. Paipaj yaya griego cashcataca, tucui chaipi causaj judiocuna yachashcamantami, paicuna ama juchachichun nishpa Timoteotaca circuncisionta rurachirca.
4Chaimanta rishpaca apostolcunahuan, cunaj yuyajcunahuan tucushpa crijcuna imallata rurana cashcata, cazuna cashcata Jerusalenpi yuyarinacushcatami, tucui pueblocunapi cushpa huillashpa rircacuna.
5Tandanacushca crijcunaca ashtahuan sinchi crijcuna tucurca. Crijcunapish punllantami ashtahuan mirarircacuna.
Macedonia runata muscuipi shina Pablo ricushcami6Chaimanta paicuna rishpaca, Asia llajtapi Taita Diospaj Shimita huillashun nijpimi, jucha illaj Espirituca huillachun mana saquirca. Chaimantami Frigia, Galacia llajtacunata pasashpa,
7Misia llajtaman chayashpaca Bitinia llajtaman yaicunata yuyarcacuna. Chaiman yaicuchunpish Espirituca mana saquircachu.
8Chaimantaca Misia llajtallatataj rishpami, jatun yacu c'uchupi caj Troas puebloman chayarcacuna.
9Chai tutami Pabloca: “Macedoniamanta shuj runa shamushpa, ñucanchij llajtaman shamushpa ñucanchijta yachachipai” nishpa paipaj ñaupajpi shayarishpa rogacujta muscuipi shina ricurca.
10Muscuipi shina ricushcata Pablo huillajpimi: “Taita Diosmi ñucanchijtaca Macedoniapi alli huillaita huillachun cayashca” nishpami, chaiman rina yuyailla tucurcanchij.
Pablotapish Silastapish Filipos pueblo carcelpi churashcami11Troasmantaca shuj barcopi huichiyashpami, yacu chaupipi caj Samotraciaman chayajta rircanchij. Cayandij punllaca, Neapolismanmi chayarcanchij.
12Chaimantaca, Macedoniapi caj tucuita yalli jatun Filipos pueblomanmi rircanchij. Chai puebloca, Roma llajtamanta shamushcacunapaj pueblomi carca. Chaipimi asha punllacunata saquirircanchij.
13Chaipi cashpami samana punlla chayamujpica, pueblomanta llujshishpa jatun yacu uriman rircanchij. Chaipica Taita Diosta mañangapaj tandanacunami cashca carca. Ñucanchijpish chaipi tandanacuj caj huarmicuna tandanacushcapimi tiyarishpa huillarcanchij.
14Chai huarmicunapurapica Tiatira pueblomanta Lidia shuti huarmimi ñucanchij huillashcataca uyacurca. Paica Taita Diosta adoraj, morado sumaj linsocunatapish c'atujmi carca. Pablo huillashcata chasquichunmi Mandaj Jesusca chai huarmipaj shunguta pascarca.
15Chaimi paipaj tucui familiandij bautizarishpa ñucanchijtaca:
–Cancuna ñucata ña Mandaj Jesusta crijtaj cashcata ricushpaca, jacuchij ñuca huasipi pozanguichij– nishpaca saquichircatajmi.
16Taita Diosta mañanaman shuj punlla ñucanchij ricujpica, adivinachij supai japishca huarmi huambrami ñucanchijhuan tupanaman llujshirca. Chai huambraca chashna cashpa adivinajpimi paipaj amocunaca achca cullquita japijcuna carca.
17Chai huambraca Pablotapish, ñucanchijtapish:
–¡Cai runacunaca jahua pachapi caj Taita Diospajta rurajcunamari! Paicunaca ima shina quishpirina cashcata cancunaman huillajcunami– nishpami caparishpa caticujlla carca.
18Achca punllacunata chashna nishpa ñucanchijta caticujllapimi, Pabloca mana uyanachishpa chai espiritutaca:
–Jesucristopaj shutipimi, chai huambramanta llujshi nini– nincami chai huambramantaca llujshirca.
19Chai huambrapaj amocunaca, cullquita japina tucurishcata ricushpami, Pablota Silasta japishpa jatun plazapi caj mandajcunapaj ñaupajman aparcacuna.
20Chai mandajcunapaj ñaupajman pushashpaca:
–Cai judío runacunaca ñucanchij pueblopimi mana allita yachachishpa puricuncuna.
21Ñucanchijca romanocunami canchij. Paicunaca ñucanchij manapish chasquipaj, manapish rurai tucuipaj mandashcacunatami yachachicuncuna– nircacunami.
22Chaita uyashpaca, tucui chaipi cajcunami Pablota Silasta llaquichingapaj jatarircacuna. Mandajcunapish:
–Cai runacunataca lluchullata rurashpa caspicunahuan macaichij– nircacunami.
23Achcata macachishca q'uipaca, carcelpi churashpami carcelta cuidajtaca alli alli cuidangui nishpa mandarcacuna.
24Chaita uyashpaca, ashtahuan ucu c'uchuman churashpami, paicunapaj chaquicunataca tablacunata jutcushcapi alli canichishpa churarca.
25Ashtahuanpish Pabloca Silasndijmi chaupi tutataca Taita Diosta mañashpa cantacurcacuna. Chaipi caj shujtaj prezucunapish chaitaca uyacurcacunami.
26Chashna mañashpa cantacujpica, ñapish jatun allpa chujchui shamurcallami. Chaimi cárcel shayacun pamba cuyurijpica, tucui pungucunapish pascarirca. Prezucunata huatashca cadenacunapish tucuicunapajmi cacharirirca.
27Carcelta cuidaj rijcharishpaca, cárcel pungucuna pascarishcata ricushpami, tucui prezucunami llujshishpa rishca canga yuyashpa paipaj espadallatataj llujshichishpa huañuchirigrirca.
28Chaimi Pabloca:
–¡Ama llaquichirichu, tucuicunami caipi canchij!– nishpa sinchita caparirca.
29Chaita uyashpami, carcelta cuidajca ninata mañashpa ucu c'uchuman yaicujta rishpa, manchaihuan chujchucuj Pablopaj Silaspaj chaquiman tupajta cumurirca.
30Chaimanta paicunata canllaman llujshichishpaca:
–Riqui, amocuna. Ñuca quishpiringapajca ¿imatataj rurana cani?– nijpimi,
31paicunaca:
–Mandaj Jesucristota cri. Canpish, cambaj tucui huasi ucu familiapish chashna rurashpaca quishpiringuichijmi– nircacuna.
32Chaimi carcelta cuidajmanpish, paipaj huasi ucu familiamanpish Jatun Diospaj Shimimanta huillarcacuna.
33Chai tutallataj carcelta cuidajca tuta cajpipish Pablopaj Silaspaj chugricunata maillashca qu'ipaca tucui paipaj huasi ucu familiandijmi bautizarircacuna.
34Bautizarishca q'uipaca, paipaj huasiman pushashpami micunata cararca. Chaipimi paipish, paipaj tucui huasi ucu familiapish Taita Diosta crishcamanta yallitaj cushicurcacuna.
35Ña pacarijpimi mandajcunaca:
–Chai runacunataca cacharishpa cachaichijlla– nichun soldadocunata carcelta cuidajpaman cacharcacuna.
36Chaimi carcelta cuidajca, Pablomanca:
–Mandajcunaca cancunataca cacharishpa cachachunlla nishpami ñucataca mandashca nishpa yachaj chayachishpaca, cunanca llujshishpa imata mana manchashpa richijlla– nirca.
37Chaimi Pabloca soldadocunataca:
–Ñucanchijtaca romanocuna cajpipish manaraj imata tapushpami tucuicunapaj ñaupajpi macachishpa, carcelpi churarcacuna. ¿Chai jahuachu, cunanca pacalla cacharishun nincuna? Mana rishunchu. Paicunallataj llujshichij shamuchun– nircami.
38Chashna nishcata soldadocuna mandajcunaman yachaj chayachijpica, paicunaca romanocuna cashcata uyashpami, achcata mancharircacuna.
39Mandajcuna shamushpaca:
–Ñucanchijca cancuna romanocuna cashcataca mana yachashcanchijchu. Cunanca cai pueblomanta llujshishpa ripaichijlla– nircacuna.
40Carcelmanta llujshishpaca, Lidiapaj huasimanmi rircacuna. Chaipi caj crijcunata alli catinguichij nishpa cushichishpaca rircallacunami.
Who We AreWhat We EelieveWhat We Do
2025 by iamachristian.org,Inc All rights reserved.
