1Taita Diostaca cushicuihuan caparichigari.
Tucui cai pachapi causajcuna caparichigari.
2Paipaj sumaj shutita cantaichigari.
Alabashcacunahuan jatunyachichigari.
3Taita Diostaca: “Quiquin rurashcacunaca jatun mancharinamari. Quiquin tucuita rurai tucuj cashcamanta, quiquinta p'iñajcunaca quiquinpaj ucupimari tucungacuna.
4Tucui cai pachapi causajcunamari quiquintaca adorangacuna.
Quiquintaca cantangacunamari. Quiquinpaj shutitaca cantangacunamari” nichigari. Selah
5¡Shamuichigari.
Taita Dios imalla rurashcata ricuichigari.
Huañujlla runacunapajca jatun mancharinacunatamari rurashca!
6Mama cuchaca chaquishca allpamanmi tigrarca.
Jatun yacu chaupitaca chaquillahuanmi
ch'imbarcacuna. Chaimantami Taita Diospi cushicunchij.
7Paica tucuita rurai tucuj cashcahuanmi huiñaita mandacun.
Paipaj ñahuicunaca torremanta chapaj shinami tucui llajtacunata chaparacun.
C'ariyajcuna ama jatun tucuchunmi chashna chapacun. Selah
8¡Llajtacuna alli nichigari.
Ñucanchij Taita Diosta alli nichigari.
Cantocunata cantashpa uyachichigari!
9Paimari ñucanchij causaita huaquichijca.
Ñucanchij chaquicuna lluchcarichunpish mana saquircachu.
10Taita Dios ñucanchij ima shina cajta ricurcanguimi.
Cullquita chuyayachij shinami chuyayachircangui.
11Linchipi urmachunmari saquircangui.
Llashaj quipitamari apachircangui.
12Runacuna ñucanchij umapi montachunmi saquircangui.
¡Nina lunyacuntamari pasarcanchij.
Yacutamari ch'imbachircangui.
Chashna rurashpaca, tucui imapish yallitaj tiyanmanmi llujshichircangui!
13Quiquinpaj huasimanca cushpa tucui rupachinacunahuanmi yaicusha.
Quiquinman cuna tucushcacunataca pajtachishami.
14Llaquihuan cashpa ñuca shimihuan cusha nishcataca cushami.
Ñuca shimi llujshishcataca pajtachishami.
15Tucuita cushpa rupachina animalcunata, huirayashca animalcunata cushami.
Mishquijllata ashnacuj quiquinpajman chayachunca carnerocunata cushami.
Quiquinman cushpa rupachinacunataca torocunatapish, c'ari chivocunatapish cushami. Selah
16¡Taita Diosta manchajcuna tucuicuna shamuichij, uyaichij.
Ñuca causaipi Taita Dios imallata rurashcatami parlasha!
17Ñuca shimihuanca paitami caparircani.
Ñuca c'alluhuanca paitami jatunyachircani.
18Ñuca shungupi millaita huaquichij cajpica, Jatun Diosca mana uyanmanchu carca.
19Ashtahuanpish Taita Diosca uyarcami.
Caparishpa ñuca rogashcataca uyarcami.
20¡Ñuca mañashcata paimanta mana anchuchij, paipaj c'uyaita ñucamanta mana anchuchij Taita Diosca alli nishca cachun!
Who We AreWhat We EelieveWhat We Do
2025 by iamachristian.org,Inc All rights reserved.
