JEREMÍAS 6 - Quichua Chimborazo Bible

Jerusalenpi Judá llajtapi causajcunata Mandaj Dios llaquichinamanta

1Benjaminpaj huahuacuna, Jerusalenmanta llujshishpa callpaichigari. Ñamari janaj lado llajtamantaca, cancunata tucuchij jatun llaqui shamucun. Tecoa pueblopica, bocinapi tocashpa huillagrichigari. Bet-haquerem pueblo c'uchupi cushnita churashpa ricuchichigari.

2Ñucami Sión urcupi caj sumaj ricunanqui pueblotaca urmachigrini.

3Paita llaquichingapajmari michijcunaca, paicunapaj ovejacunandij shamungacuna. Paicunaca paipaj muyundijpimi, carpa huasicunata shayachishpa tiyaringacuna. Tucuicunami maipi tiyarishcapi tucui michingacuna.

4Paicunaca cashnami ningacuna: “Chai pueblopi causajcunahuan macanacungapaj caparichij. Tucuicuna jatarishpa, chaupi punllapi chai puebloman yaicushpa huañuchishunchij. ¡Aij ñucanchijlla! ña punlla tucurimunca. Ña chishiyashpa tutayacunca.

5Shina cajpipish mandana huasicunataca, tuta yaicushpa tucuchishunchijlla” ningacunami.

6Tucuita Mandaj Diostajmi, paicunata cashna mandashca: “Yuracunata p'itishpa Jerusalén pueblo muyundij torrecunata rurashpa macanacuichij. Cai pueblopi causajcunaca tucuicuna yallitaj millaicunami. Chaimantami paicunataca llaquichinataj canguichij.

7Ima shinami pugyumantaca punllanta yacu llujshin, chashnallataj chai pueblopi causajcunapish millaita ruracunllami. Shujtajcunata llaquichishpa, shuhuashpami causancuna. Punllantami ñuca ñaupajpi chugrichishpa unguchincuna.

8Jerusalenpi causajcunalla, alli tucuichigari. Chashna alli tucujpica, mana p'iñarishpa cancunamanta anchurishachu. Cai llajtapish mana chaquishca, shitashca pamba saquiringachu” ninmi.

9Tucuita Mandaj Diosca cashnapishmi nirca: “Saquirij israelcunatapish uvata tandashca q'uipa saquirishca uvata cutin pallanaman tigraj shinami apangacuna. Uvata pallaj shina cambaj maquicunahuanca tucuita pallayari” nijpimi, ñucaca:

10“Cai runacunaca rinrin huichcashcamari, mana uyashun nincunaca. ¿Pitataj rimashpa cunashari? Can Mandaj Diospaj shimitaca, ima pinganayaj shimicunata shina mana munancunachu” nircani.

11Mandaj Diosca cashnapishmi nirca: “Chashna mana cazushcamantaca, p'iñarishpa huañucunimi. Caita ricushpa casijlla tiyacunallataca shaicunimi. Cunantajca callecunapi puricuj huahuacunapaj jahuapipish, chairaj runacuna tandanacushcapipish jatun llaquitami talligrini. Cusacunatapish, huarmicunatapish, ña yuyajyacujcunatapish, yallitaj yuyajcunatapishmi prezu cachagrini.

12Paicunapaj huasicunatapish, allpacunatapish, huarmicunatapishmi shujtajcuna japingacuna. Ñucatajmi cai llajtapi causajcunataca llaquichisha. Mandaj Diostajmi chashna nini.

13Cunanca ashtahuan uchillacunamanta callarishpa, ashtahuan jatuncunacama tucuicunami jahuanpi jahuanpi charijyanallata yuyancuna. Ñucamanta huillajcunamanta callarishpa, curacunacama tucuicuna umajcunami.

14Ñuca agllashcacuna chugririshcataca: Ñami sumaj causai tiyagrin, ñami sumaj causai tiyagrin nishpami, nanaita cungachisha nincuna. Ashtahuanpish sumaj causaica mana tiyanchu.

15Millananacunata rurashcamantaca ¿pingarincunachu imatagari? Mana yangamanta nicunichu, paicunaca manataj pingancunachu. Ima shina pingarinatapish mana yachancunachu. Chaimantami ñuca llaquichijpica, caishujcuna shinallataj llaquipi urmangacuna” ninmi Mandaj Diosca.

Israelcunaca Mandaj Dios rimajpipish mana uyashcamanta

16Mandaj Diosca cashnami nirca: “Ñancuna callaripi shayarishpa cancunallataj alli ricuichij. Ñaupa ñancunamanta tapushpa, maijan alli ñan cajpica, chaita catichij. Chai ñanta purishpaca, samarinatami charinguichij” nirca. Ashtahuanpish cancunaca: “Ñaupa ñantaca manataj purishunchu” nircanguichijmi.

17Shinallataj: “Trompetapi tocashcata uyaichij” nishpa huillajcunatapishmi churarcani. Paicuna chashna nijpipish cancunaca: “Mana uyashun ninchijchu” nircanguichijmi.

18Chashna cashcamantaca, tucui llajtacunapi causajcuna uyaichij: “Ima tucunataca tandanacushcacunapish uyashpa, yuyaita japichigari.

19Tucui cai pachapi causajcunapish uyaichij: Cai runacunapajca jatun llaquitami apamugrini. Paicunallataj ñuca rimashcata mana uyashun nishpa, ñuca mandashcacunata p'iñashpa millaita rurashcamantami, paicuna japina cashcata cugrini.

20Ñucamanca ¿imapajtaj chai Sabá llajta inciensota cushpa rupachinguichigari? Caru llajtamanta apamushca sumaj mishquijllata ashnaj huiru yacutapish ¿imapajtaj ñucamanca cunguichigari? Cancuna animalcunata cushpa tucui rupachishcapish, maita mana chasquipajmi. Animalcunata cushpa huañuchishcatapish manataj ricunanchu” ninmi.

21Mandaj Diosca cashnapishmi nin: “Ñucaca cai runacuna urmachunca, ñucatajmi ñitcarinacunata churani. Chaicunapi ñitcarishpami yayacunapish, churicunapish urmangacuna. C'uchullapi causajcunandij, paicunahuan apanacujcunandijmi huañungacuna” ninmi.

22Mandaj Diosca cashnapishmi nin: “Janaj lado llajta runacunami shamugrin. Cai pacha tucuri llajtamantaca huaranga, huaranga runacunami shamugrin.

23Chai runacunaca arcotapish, shitashpa macanacuna lanzatapish aisashcami shamungacuna. Paicunaca pitapish mana llaquishpa huañuchijcunami. Mama cucha yacu manchanayajta huajiashpa jatarij shinami uyarimungacuna. Sión urcu pueblopi causajcunalla, chaicunaca cancunahuan macanacungapajmi caballocunapi tiyarishpa, allichirishca shamungacuna” ninmi.

24Chai runacunaca pitapish mishajcuna cashcata uyashpaca, ñucanchij rigracunapish chujchushpa huarcurinmi. Ñucanchijtaca jatun manchaimari japin. Huachacuj huarmi shina jatun nanaihuanmari canchij.

25Chagracunamanpish ama llujshichijchu, ñancunapipish ama ricurichijchu. P'iñajcunaca manchanana espadahuanmari maipipish chapacuncuna.

26Ñuca llajtapi causajcunalla, llaquirishpa cañamazuta churarichigari, ushpapi singurichigari. Shujlla churitaj huañushca cajpi shina caparirishpa huacaichigari. Ñucanchijta tucuchijca ñallamari chayamugrin.

27“Cantaca, ñuca agllashcacunapajca miticuna jatun torre shina sinchi cachunmi churarcani. Canllataj paicuna ima shina yuyajta, ima shina causajtaca callarishpami ricungui.

28Tucuicunallataj ñucata mana cazujcuna, huashalla parlarishpa purij millaicunami. Tucuicunallataj bronce shina, fierro shinallami. Tucuicunallataj imatapish ismuchij mapa shinami.

29Nina yallitaj rupashcamantaca, ninata p'ucuchinapish rupashcami. Plomo fierropish tucui yacuyashcami. Shina cashpapish cullquimanta tucui plomo fierrota anchuchingapaj rupachij runaca yangallamari chashna rurashca. Yacuyajta rupachijpipish, chai mapaca manataj anchurishcachu.

30Caicunaca Mandaj Dios mana nishpa shitashcamari. Tucuicunami: Shitashca cullqui ningacuna” nircami.